ພະບາດ ສົມເດັດ ພະວະຊິຣະເກົ້າເຈົ້າຢູ່ຫົວ

ແຫ່ງ ຣາຊະອານາຈັກໄທ

ທີ່ ບາງກອກ

ພະບາດສົມເດັດ,

ໃນນາມປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍຖືເປັນກຽດຢ່າງສູງ ສົ່ງຄໍາອວຍພອນໄຊອັນປະເສີດ ມາຍັງ ພະອົງ ເນື່ອງໃນໂອກາດວັນສະເຫຼີມພະຊົນພັນສາ ຄົບຮອບ 71 ພັນສາ.

ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານຖານປະເທດເພື່ອນບ້ານໃກ້ເຮືອນຄຽງທີ່ດີ ລະຫວ່າງ ສອງປະເທດພວກເຮົາ ທີ່ມີວັດທະນະທໍາ, ຮີດຄອງປະເພນີຄ້າຍຄືກັນ, ພາສາປາກເວົ້າເຂົ້າໃຈກັນ ແລະ ມີປະຫວັດສາດການພົວພັນການທູດນໍາກັນທີ່ຍາວນານຫຼາຍກວ່າ 7 ທົດສະວັດ ແລະ ໄດ້ຮັບການເສີມຂະຫຍາຍຢ່າງຕໍ່ເນື່ອງ, ໂດຍສະເພາະ ແມ່ນການຈັດຕັ້ງປະຕິບັດ ແລະ ຜັນຂະຫຍາຍແຜນປະຕິບັດງານ ວ່າດ້ວຍການເປັນຄູ່ຮ່ວມມືຍຸດທະສາດ ເພື່ອການຈະເລີນເຕີບໂຕ ແລະ ພັດທະນາແບບຍືນຍົງໃຫ້ເປັນຮູບປະທໍາ ໂດຍຜ່ານກົນໄກການຮ່ວມມືດ້ານຕ່າງໆຢ່າງເປັນຂະບວນນັບແຕ່ຂັ້ນສູນກາງຮອດທ້ອງຖິ່ນ ເພື່ອພ້ອມກັນພັດທະນາປະເທດ ໃຫ້ມີຄວາມຮັ່ງມີ ເຂັ້ມແຂງ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ໄທ ໃຫ້ນັບມື້ນັບຫຼາຍຂຶ້ນ.

ຂ້າພະເຈົ້າ ເຊື່ອໝັ້ນຢ່າງຍິ່ງວ່າ ພາຍໃຕ້ພະບໍຣົມໂພທິສົມພານຂອງພະອົງ, ຣາຊະອານາຈັກໄທ ຈະສືບຕໍ່ມີຄວາມຮົ່ມເຢັນເປັນສຸກ, ຈະເລີນຮຸ່ງເຮືອງ ແລະ ມີຄວາມວັດທະນະຖາວອນຢ່າງບໍ່ຢຸດຢັ້ງ. ຂ້າພະເຈົ້າ ຂໍໃຫ້ພະອົງ    ຈົ່ງກະລຸນາຮັບເອົາຄໍາອວຍພອນປະເສີດ ຈາກຂ້າພະເຈົ້າ ເນື່ອງໃນໂອກາດ ອັນເປັນສິຣິມຸງຄຸນນີ້ດ້ວຍ ແລະ ຂໍຖືໂອກາດນີ້ ສົ່ງຄໍາອວຍພອນແດ່ພະລາຊີນີ ແລະ ພະບໍຣົມວົງສານຸວົງ ທຸກພະອົງ ຈົ່ງມີພະກະເສມສໍາລານ ມານະໂອກາດນີ້ດ້ວຍ.

ດ້ວຍຄວາມນັບຖືຢ່າງສູງ.

ທອງລຸນ ສີສຸລິດ

ປະທານປະເທດ ແຫ່ງ ສປປ ລາວ

ນະຄອນຫຼວງວຽງຈັນ, ວັນທີ 27 ກໍລະກົດ 2023