ພະນະທ່ານ ບຸນຍັງ ວໍລະຈິດ

ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ,

ໃນນາມສະຫະພາບເອີຣົບ, ພວກຂ້າພະເຈົ້າ ຂໍສະແດງຄວາມຊົມເຊີຍຕໍ່ພະນະທ່ານ ເນື່ອງໃນໂອກາດທີ່ຖືກເລືອກຕັ້ງໃຫ້ດຳລົງຕຳແໜ່ງເປັນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ. ພວກຂ້າພະເຈົ້າ ຂໍອວຍພອນໃຫ້ພະນະທ່ານ ຈົ່ງປະສົບຜົນສຳເລັດທຸກຢ່າງໃນໜ້າທີ່ວຽກງານຂອງພະນະທ່ານ ລວມທັງການເປັນປະທານອາຊຽນຂອງ ສປປ ລາວ ໃນປີນີ້.

ສະຫະພາບເອີຣົບ ແລະ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ປະຕິບັດບາດກ້າວຮ່ວມກັນທີ່ສຳຄັນ ເພື່ອກ້າວໄປສູ່ສະພາບທີ່ສຸກງອມຂອງການເປັນຄູ່ຮ່ວມມືຮອບດ້ານ, ລວມໄປເຖິງການພົບປະຂອງຄະນະກຳມາທິການຮ່ວມຢ່າງເປັນປົກກະຕິຂອງພວກເຮົາ ແລະ ການປຶກສາຫາລືດ້ານສິດທິມະນຸດປະຈຳປີ. ສະຫະພາບເອີຣົບ ມີຄວາມມຸ້ງໝັ້ນທີ່ຈະມີການພົວພັນກັບອາຊຽນໃນລະດັບສູງ ແລະ ເຮັດວຽກຮ່ວມກັບກອງເລຂາອາຊຽນຢ່າງໃກ້ຊິດ, ໂດຍຮ່ວມກັບປະເທດສະມາຊິກອາຊຽນ ແລະ ໃນໂອກາດການເປັນປະທານອາຊຽນຂອງ ສາທາລະນະລັດ ປະຊາທິໄຕ ປະຊາຊົນລາວ ເພື່ອບັນລຸຈຸດໝາຍນີ້.

ພວກເຮົາຫວັງວ່າ ສາຍພົວພັນ ລະຫວ່າງ ເຮົາຈະໄດ້ຮັບການພັດທະນາໃຫ້ດີຍິ່ງຂຶ້ນບົນພື້ນຖານມິດຕະພາບ ແລະ ຄວາມໄວ້ວາງໃຈ ລະຫວ່າງ ປະຊາຊົນ ສະຫະພາບເອີຣົບ ແລະ ສາທາລະນະລັດ ປະຊາທິປະໄຕ ປະຊາຊົນລາວ.

ທ່ານ ໂດນອລ໌ ຕຸສ໌

ປະທານສະພາເອີຣົບ                                                                    

ທ່ານ ຊັງ ໂກຣດເດິ ຈຸງເກີ

ປະທານຄະນະກຳມາທິການເອີຣົບ

ບຣຸກແຊນ, 10 ພຶດສະພາ 2016

ພະນະທ່ານ ທອງລຸນ ສີສຸລິດ

ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ,

ໃນນາມສະຫະພາບເອີຣົບ, ພວກຂ້າພະເຈົ້າ ຂໍສະແດງຄວາມຊົມເຊີຍຕໍ່ ພະນະທ່ານ ເນື່ອງໃນໂອກາດທີ່ຖືກເລືອກຕັ້ງຈາກສະພາແຫ່ງຊາດ ໃຫ້ດຳລົງຕຳແໜ່ງນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ພວກເຮົາໄດ້ຮັບການຊຸກຍູ້ສົ່ງເສີມຈາກການພັດທະນາສາຍພົວພັນຂອງພວກເຮົາໃນໄລຍະປີທີ່ຜ່ານມາ, ໂດຍຜ່ານການຮ່ວມມືດ້ານການເມືອງໄປສູ່ດ້ານເສດຖະກິດ, ການຄ້າ ແລະ ການລົງທຶນ ນັບທັງການຮ່ວມມືເພື່ອການພັດທະນາ.

ພວກຂ້າພະເຈົ້າ ຫວັງວ່າຈະໄດ້ເຮັດວຽກຮ່ວມກັບພະນະທ່ານ ເພື່ອສືບຕໍ່ເສີມຂະຫຍາຍສາຍພົວພັນ ລະຫວ່າງ ສະຫະພາບເອີຣົບ ແລະ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືກັບອາຊຽນໃຫ້ແໜ້ນແຟ້ນຍິ່ງຂຶ້ນ.

ພວກຂ້າພະເຈົ້າ ຂໍອວຍພອນໃຫ້ພະນະທ່ານ ຈົ່ງປະສົບຜົນສຳເລັດໃນໜ້າທີ່ອັນສຳຄັນຂອງພະນະທ່ານ.

ທ່ານ ໂດນອລ໌ ຕຸສ໌

ປະທານສະພາເອີຣົບ  

ທ່ານ ຊັງ ໂກຣດເດິ ຈຸງເກີ

ປະທານຄະນະກຳມາທິການເອີຣົບ

ບຣຸກແຊນ, 10 ພຶດສະພາ 2016

ພະນະທ່ານ ສະເຫຼີມໄຊ ກົມມະສິດ

ລັດຖະມົນຕີ ກະຊວງການຕ່າງປະເທດ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ,

ຂ້າພະເຈົ້າ ຂໍສະແດງຄວາມຊົມເຊີຍໃນໂອກາດທີ່ທ່ານຖືກແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ. ພາຍໃຕ້ການນຳຂອງທ່ານ, ຂ້າພະເຈົ້າ ເຊື່ອໝັ້ນວ່າ ສປປ ລາວ ແລະ ສະຫະພາບເອີຣົບ ຈະມີສ່ວນຮ່ວມໃນການພິຈະລະນາບັນຫາສາກົນທີ່ສອງຝ່າຍມີຄວາມສົນໃຈ ແລະ ປະສົບຜົນສຳເລັດຍິ່ງຂຶ້ນ ໃນການເປັນຄູ່ຮ່ວມມື ແລະ ການຮ່ວມມືຂອງພວກເຮົາ.

ໃນຖານະທີ່ເປັນໜຶ່ງໃນບັນດາຄູ່ຮ່ວມມືສຳຄັນຂອງລາວ, ສະຫະພາບເອີຣົບ ຈະສືບຕໍ່ໃຫ້ການສະໜັບສະໜູນ ເພື່ອແກ້ໄຂສິ່ງທ້າທາຍໃນການພັດທະນາ ໂດຍສຸມໃສ່ບັນດາແຜນງານດ້ານລະບຽບກົດໝາຍ, ການສຶກສາ ແລະ ໂພຊະນາການ. ໃນຮູບແບບຂອງແຜນງານຮ່ວມ, ການຊ່ວຍເຫຼືອເພື່ອການພັດທະນາຂອງສະຫະພາບເອຣົບສຳລັບສົກປີ 2016-2020 ລວມທັງຂອງບັນດາປະເທດສະມາຊິກຈະມີມູນຄ່າເຖິງເຄີ່ງຕື້ເອີໂຣ. ນອກຈາກນີ້, ພວກເຮົາຍັງໃຫ້ຄວາມສຳຄັນ ຢ່າງຍິ່ງໃນການສືບຕໍ່ປຶກສາຫາລືບັນຫາສຳຄັນທີ່ກ່ຽວພັນ ເຖິງ ສິດທິມະນຸດ ແລະ ການປົກຄອງ.

ຂ້າພະເຈົ້າ ຂໍສະແດງຄວາມຊົມເຊີຍຕໍ່ກັບການເປັນປະທານອາຊຽນໃນປີ 2016. ສະຫະພາບເອີຣົບເປັນຜູ້ໃຫ້ການສະໜັບສະໜູນຢ່າງແຂງແຮງຕໍ່ຄວາມເປັນແກນກາງ, ການເຊື່ອມຈອດ ແລະ ການເຊື່ອມໂຍງຂອງອາຊຽນ. ພວກເຮົາເຫັນດີເຫັນພ້ອມນຳວິໄສທັດ ອາຊຽນ ສຳລັບປີ 2025 ເພື່ອຮ່ວມກັນ ສ້າງພາກພື້ນໃຫ້ມີສັນຕິພາບ, ເສລີພາບ ແລະ ຄວາມວັດທະນາຖາວອນ ສຳລັບປະຊາຊົນອາຊຽນ. ສະຫະພາບເອີຣົບ ໄດ້ຕັດສິນໃຈເຮັດວຽກຮ່ວມກັບອາຊຽນ ເພື່ອກ້າວໄປສູ່ການເປັນຄູ່ຮ່ວມມືຍຸດທະສາດ ແລະ ມີຄວາມເຊື່ອໝັ້ນຕໍ່ການສະໜັບສະໜູນຂອງປະທານສຳລັບພັນທະຂອງສະຫະພາບເອີຣົບຕໍ່ອາຊຽນໃນການເຮັດວຽກຮ່ວມກັນ ລວມທັງກອງປະຊຸມສຸດຍອດອາຊີຕາເວັນອອກ.

ຂ້າພະເຈົ້າ ຂໍອວຍພອນໃຫ້ທານ ຈົ່ງປະສົບຜົນສຳເລັດໃນໜ້າທີ່ຮັບຜິດຊອບໃໝ່.

ດ້ວຍຄວາມນັບຖື,

ເຟເດຣິກາ ໂມເກຮີນີ.

ບຣຸກແຊນ, 17 ພຶດສະພາ 2016