ໃນຕອນເຊົ້າຂອງວັນທີ 16 ກໍລະກົດ 2021 ທີ່ ສະຖານເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ), ທີ່ ນະຄອນຫຼວງສະຕ໋ອກໂຮມ, ຣາຊະອານະຈັກ ຊູແອດ, ທ່ານ ບຸນລຽບ ຮຸ່ງວົງສອນ ໄດ້ຍື່ນສານຕາຕັ້ງ (ຮູບແບບທາງໄກ) ຕໍ່ ທ່ານປະທານາທິບໍດີ Egils Levits, ແຫ່ງ ສາທາລະນະລັດ ລັດເວຍ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ລັດເວຍ, ເຊິ່ງມີສະຖານເອກອັກຄະລັດຖະທູດ ຢູ່ນະຄອນຫຼວງສະຕ໋ອກໂຮມ ຣາຊະອານາຈັກຊູແອດ.
ໃນໂອກາດດັ່ງກ່າວ, ທ່ານປະທານາທິບໍດີ Levits ໄດ້ສະແດງຄວາມຍິນດີ ແລະ ຊົມເຊີຍທ່ານທູດ ບຸນລຽບ ໃນການມາດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ສາທາລະນະລັດ ລັດເວຍ ແລະ ໄດ້ອວຍພອນໃຫ້ ທ່ານທູດ ບຸນລຽບ ປະຕິບັດໜ້າທີ່ການທູດດ້ວຍຜົນສຳເລັດ ເພື່ອສົ່ງເສີມການພົວພັນຮ່ວມມືຂອງສອງປະເທດ ລາວ-ລັດເວຍ ໃຫ້ຂະຫຍາຍຕົວຂຶ້ນໄປເລື້ອຍໆ.
ທ່ານທູດ ບຸນລຽບ ໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານປະທານາທິບໍດີ Levits ແລະ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນພ້ອມດ້ວຍພອນໄຊອັນປະເສີດຂອງ ທ່ານປະທານປະເທດ ແຫ່ງ ສປປ ລາວ ເຖິງ ທ່ານປະທານາທິບໍດີ Levits. ພ້ອມນີ້, ທ່ານທູດ ບຸນລຽບ ໄດ້ແຈ້ງຜົນສຳເລັດກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ສະພາບການແຜ່ລະບາດ COVID-19 ຂອງ ສປປ ລາວ ໃຫ້ທ່ານປະທານາທິບໍດີ Levits ຊາບ. ທ່ານປະທານາທິບໍດີ Levits, ໄດ້ໃຫ້ຄວາມສໍາຄັນຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ລັດເວຍ ເປັນຢ່າງດີ ໂດຍສະເພາະ ການສຶກສາດ້ານການແພດ, ວິທະຍາສາດ ແລະ ການປ່ຽນແປງສະພາບການດິນຟ້າອາກາດ. ພ້ອມນີ້, ທ່ານປະທານາທິບໍດີ Levits ໄດ້ສະແດງຄວາມຂອບໃຈ ແລະ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມສະພາ ແລະ ໄດ້ອວຍພອນໄຊອັນປະເສີດ ເຖິງທ່ານປະທານປະເທດ ແຫ່ງ ສປປ ລາວ ແລະ ຄະນະລັດຖະບານລາວຊຸດໃໝ່ເຊັ່ນດຽວກັນ. ໃນໂອກາດດຽວກັນນີ້, ທ່ານທູດ ບຸນລຽບ ກໍໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນ ລັດເວຍ ທີ່ໄດ້ໃຫ້ການສະໜັບສະໜູນການພົວພັນຮ່ວມມືຕໍ່ ສປປ ລາວ ໃນໄລຍະຜ່ານມາ, ເຊິ່ງເປັນການປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມຂອງລາວ ໃຫ້ຂະຫຍາຍຕົວຫຍີ່ງໆຂຶ້ນ.