ໃນລະຫວ່າງວັນທີ 10-11 ກໍລະກົດ 2021, ທ່ານ ຄໍາພັນ ອັ່ນລາວັນ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ປະເທດສະຫະລັດ ອາເມລິກາ ແລະ ການາດາ, ພ້ອມດ້ວຍ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການສະຫະປະຊາຊາດ ທີ່ ນິວຢອກ ແລະ ຄະນະ ໄດ້ເຄື່ອນໄຫວຢ້ຽມຢາມພີ່ນ້ອງເຊື້ອຊາດລາວທີ່ດໍາລົງຊີວິດຢູ່ເຂດນິວອິງແລນ ໂດຍສະເພາະຢູ່ລັດໂຣດໄອແລນ ແລະ ລັດໃກ້ຄຽງ ທາງພາກຕາເວັນອອກສ່ຽງເໜືອຂອງ ສ. ອາເມລິກາ ເຊິ່ງເປັນຄັ້ງທໍາອິດພາຍຫຼັງມີການລະບາດຂອງພະຍາດໂຄວິດ-19 ແຕ່ຕົ້ນປີ 2020 ເປັນຕົ້ນມາ ຕາມການເຊື້ອເຊີນຂອງ ທ່ານ ວຽງຄອນ ພົມມະສິດ, ປະທານສະມາຄົມລາວ ແຫ່ງ ລັດໂຣດໄອແລນ ແລະ ທ່ານ ຄໍາເຜີຍ ສຸຣິຍາ, ປະທານສະມາຄົມ ສາຍສໍາພັນ ສະຫວັນນະເຂດ ແຫ່ງ ເຂດນິວອິງແລນ.

ໃນໂອກາດເຄື່ອນໄຫວດັ່ງກ່າວ, ທັງສອງຫົວໜ້າສໍານັກງານ ໄດ້ມີການພົບປະໂອ້ລົມກັບປະທານສະມາຄົມທັງ 2 ທ່ານ ພ້ອມດ້ວຍພີ່ນ້ອງເຊື້ອຊາດລາວ ໂດຍໄດ້ແຈ້ງໃຫ້ຊາບ ກ່ຽວກັບສະພາບການພົ້ນເດັ່ນດ້ານການພັດທະນາເສດຖະກິດ-ສັງຄົມ ຢູ່ ສປປ ລາວ ລວມທັງສະພາບການລະບາດຂອງພະຍາດໂຄວິດ-19 ຢູ່ ສປປ ລາວ, ຜົນກະທົບຕ່າງໆ ແລະ ການແກ້ໄຂບັນຫາຕ່າງໆ ເປັນຕົ້ນແມ່ນການອອກມາດຕະການຈໍາກັດການເຂົ້າ-ອອກ ສປປ ລາວ ໃນແຕ່ລະໄລຍະ ຍົກເວັ້ນຜູ້ທີ່ມີຄວາມຈໍາເປັນແທ້ ເພື່ອປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19. ພ້ອມນີ້, ຍັງໄດ້ແຈ້ງ ແລະ ອະທິບາຍ ການສືບຕໍ່ໃຫ້ການບໍລິການ ກໍຄືການປົກປ້ອງສິດຜົນປະໂຫຍດ ຂອງຄົນລາວຢູ່ຕ່າງປະເທດ ຂອງສະຖານທູດ ເຊິ່ງຄົນລາວ ແລະ ພີ່ນ້ອງເຊື້ອຊາດລາວໃຫ້ຄວາມສົນໃຈ ແລະ ຕິດຕໍ່ສອບຖາມສະຖານທູດຕະຫຼອດເວລາ ໂດຍສະເພາະການເດີນທາງຢ້ຽມຢາມລາວ ກໍຄືການສະເໜີຂໍກັບລາວຢ່າງຖາວອນ ຂອງຫຼາຍໆທ່ານ. ນອກຈາກນັ້ນ, ກໍໄດ້ຖາມຂ່າວຄາວ ກ່ຽວກັບສະພາບການດໍາລົງຊີວິດ ຂອງພີ່ນ້ອງເຊື້ອຊາດລາວ ໃນໄລຍະການລະບາດຂອງພະຍາດໂຄວິດ-19 ແລະ ຍັງໄດ້ເປີດໂອກາດໃຫ້ມີການສົນທະນາຖາມ-ຕອບບັນຫາອື່ນໆ ທີ່ພີ່ນ້ອງເຊື້ອຊາດລາວມີຄວາມສົນໃຈ.

ໃນຕອນແລງຂອງວັນທີ 10 ກໍລະກົດ 2021, ປະທານສະມາຄົມດັ່ງກ່າວ ພ້ອມດ້ວຍພີ່ນ້ອງເຊື້ອຊາດລາວ ໄດ້ຮ່ວມກັນຈັດງານລ້ຽງຕ້ອນຮັບ ໃຫ້ແກ່ຄະນະຂອງ 2 ສໍານັກງານ, ເຊິ່ງໃນນັ້ນ ທ່ານ ວຽງຄອນ ພົມມະສິດ, ປະທານສະມາຄົມລາວ ແຫ່ງ ລັດໂຣດໄອແລນ ໄດ້ກ່າວສະແດງຄວາມຍິນດີຕ້ອນຮັບທ່ານທູດທັງສອງ ພ້ອມດ້ວຍຄະນະ ຢ່າງອົບອຸ່ນ. ໃນໂອກາດດຽວກັນ, ທ່ານທູດ ຄໍາພັນ ອັ່ນລາວັນ ແລະ ທ່ານທູດ ອານຸພາບ ວົງໜໍ່ແກ້ວ ກໍ່ໄດ້ພັດປ່ຽນກັນແນະນໍາຕົນເອງ ພ້ອມທັງສະແດງຄວາມດີໃຈ ທີ່ໄດ້ມີໂອກາດມາຢ້ຽມຢາມພີ່ນ້ອງຄົນເຊື້ອຊາດລາວຢູ່ເຂດດັ່ງກ່າວ ພ້ອມທັງສະແດງຄວາມຂອບໃຈຕໍ່ ປະທານສະມາຄົມທັງສອງທ່ານ ກໍຄື ພີ່ນ້ອງເຊື້ອຊາດລາວ ທີ່ໄດ້ໃຫ້ການເຊື້ອເຊີນ ແລະ ຕ້ອນຮັບອັນອົບອຸ່ນ ແລະ ຖືໂອກາດນີ້ ຝາກຄໍາຢ້ຽມຢາມຖາມຂ່າວເຖິງພີ່ນ້ອງເຊື້ອຊາດລາວທຸກທ່ານ ທີ່ບໍ່ສາມາດເຂົ້າຮ່ວມງານລ້ຽງພົບປະໃນຄັ້ງນີ້ ພ້ອມທັງ ໄດ້ອວຍພອນໄຊໃຫ້ທຸກຄົນ ຈົ່ງມີແຕ່ຄວາມຜາສຸກ ຄວາມຈະເລີນ ປາສະຈາກໂລກໄພໄຂ້ເຈັບທັງປວງ. ການພົບປະ ແລະ ງານລ້ຽງຄັ້ງນີ້ ທີ່ມີຜູ້ເຂົ້າຮ່ວມທັງໝົດປະມານ 100 ຄົນ ແມ່ນເຕັມໄປດ້ວຍບັນຍາກາດເບີກບານມ່ວນຊື່ນ, ສະໜິດສະໜົມ ແລະ ຄວາມດີໃຈ ຂອງພີ່ນ້ອງຄົນເຊື້ອຊາດລາວ.

------------**-----------