ໃນວັນທີ 13-17 ພຶດສະພາ 2018, ຄະນະຜູ້ແທນລາວນຳໂດຍທ່ານ ພູໂຂງ ສີສຸລາດ, ຜູ້ຕາງໜ້າ ສປປ ລາວ ປະຈຳ ຄະນະກຳມາທິການ ລະຫວ່າງລັດຖະບານອາຊຽນວ່າດ້ວຍສິດທິມະນຸດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມຄັ້ງທີ 27 ຂອງຄະນະກຳມາທິການລະຫວ່າງ ລັດຖະ ບານອາຊຽນວ່າດ້ວຍສິດທິມະນຸດ (AICHR) ຊຶ່ງຈັດຂື້ນທີ່ກອງເລຂາອາຊຽນ, ນະຄອນຫຼວງຈາກາກຕາ, ປະເທດອິນໂດເນເຊຍ ພາຍໃຕ້ການເປັນປະທານຂອງສິງກະໂປ ໃນນາມປະທານອາຊຽນ ສຳລັບປີ 2018, ມີຜູ້ຕາງໜ້າຄະນະກຳມາທິການ ລະຫວ່າງລັດຖະບານອາຊຽນວ່າດ້ວຍສິດທິມະນຸດ ຈາກ ບັນດາປະເທດສະມາຊິກອາຊຽນເຂົ້າຮ່ວມ.

ໃນກອງປະຊຸມ, ຄະນະກຳມາທິການ ໄດ້ປຶກສາຫາລືບັນດາແຜນກິດຈະກໍາຂອງຕົນ ເປັນຕົ້ນແມ່ນ ການກະກຽມການພົບປະກັບລັດຖະມົນຕີຕ່າງປະເທດອາຊຽນ, ບົດລາຍງານ ປະຈຳປີ 2018 ແລະ ແຜນກິດຈະກຳບູລິມະສິດສຳລັບປີ 2019 ເພື່ອນຳສະເໜີຕໍ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 51 ທີ່ຈະຈັດຂຶ້ນໃນຕົ້ນເດືອນ ສິງຫາ 2018 ຢູ່ ສິງກະໂປ. ກອງປະຊຸມ ຍັງໄດ້ຮັບຮອງລະບຽບການ ກ່ຽວກັບ ການດໍາເນີນວຽກງານ ແລະ ງົບປະມານຂອງຄະນະກຳມາທິການ.

ສຳລັບ ການຈັດຕັ້ງປະຕິບັດແຜນກິດຈະກໍາບຸລິມະສິດຂອງຄະນະກຳມາທິການ ລະຫວ່າງລັດຖະບານອາຊຽນວ່າດ້ວຍສິດທິມະນຸດ ໃນໄລຍະຮອດທ້າຍປີ 2018, ກອງປະຊຸມໄດ້ພິຈາລະນາ ແລະ ຮັບຮອງ ແຜນກິດຈະກໍາ ຊຶ່ງລວມມີ: ການຈັດໂຕ້ວາທີ ກ່ຽວກັບ ສິດທິມະນຸດຊາວໜຸ່ມອາຊຽນ; ການຝຶກອົບຮົມດ້ານສິດທິມະນຸດ, ສິດຂອງຜູ້ຖືກຫາໃນຄະດີອາຍາ, ສິດໃນການໄດ້ຮັບນຳດື່ມທີ່ສະອາດປອດໄພ ແລະ ສຸຂະອະນາໄມໃນອາຊຽນ, ສິດທິໃນການພັດທະນາພາຍໃຕ້ມາດຕາທີ 35 ຂອງຖະແຫຼງການສິດທິມະນຸດອາຊຽນ, ສິດທິມະນຸດຂອງແມ່ຍິງ ແລະ ເດັກນ້ອຍ, ການສົ່ງເສີມຄວາມສະເໝີພາບຍິງ-ຊາຍ ແລະ ການສົ່ງເສີມແມ່ຍິງຜ່ານເຕັກໂນໂລຊີຂໍ້ມູນຂ່າວສານ ເພື່ອບັນລຸເປົ້າໝາຍການພັດທະນາແບບຍືນຍົງ.

ໃນກອງປະຊຸມ, ສປປ ລາວ ໄດ້ແຈ້ງຄວາມຄືບໜ້າຂອງ ການສຶກສາຄົ້ນຄວ້າ ກ່ຽວກັບ ສິດທິດ້ານການສຶກສາ ແລະ ສິດທິໃນການດໍາລົງຊີວິດໃນສັນຕິພາບ ຊຶ່ງ ສປປ ລາວ ເປັນຜູ້ນຳພາຈັດຕັ້ງປະຕິບັດ. ກອງປະຊຸມ ຍັງໄດ້ເຫັນດີຮັບຮອງເອົາຂໍ້ສະເໜີຂອງ ສປປ ລາວ ກ່ຽວກັບການຈັດກອງປະຊຸມສໍາມະນາ ກ່ຽວກັບ ສິດທິມະນຸດ ແລະ ການລຶບລ້າງຄວາມທຸກຍາກ ໃນຂອບເປົ້າໝາຍການພັດທະນາແບບຍຶນຍົງ ແລະ ຖະແຫລງການສິດທິມະນຸດອາຊຽນ ໃນປີ 2019.

ໃນລະຫວ່າງການດຳເນີນກອງປະຊຸມຄັ້ງທີ 27 ນີ້, ຄະນະກຳມາທິການລະຫວ່າງລັດຖະບານອາຊຽນວ່າດ້ວຍສິດທິມະນຸດໄດ້ພົບປະກັບເລຂາທິການໃຫຍ່ອາຊຽນແລະຄະນະກຳມະການຜູ້ຕາງໜ້າຖາວອນ ປະຈຳອາຊຽນເພື່ອແລກປ່ຽນຄວາມຄິດເຫັນ ກ່ຽວກັບ ການສົ່ງເສີມ ແລະ ປົກປ້ອງສິດທິມະນຸດໃນອາຊຽນຜ່ານການປະຕິບັດພາລະບົດບາດຢ່າງມີປະສິດທິພາບ ແລະ ປະສິດທິຜົນຂອງຄະນະກຳມາທິການອາຊຽນວ່າດ້ວຍສິດທິມະນຸດ.ນອກນີ້ຍັງໄດ້ພົບປະກັບຄູ່ຮ່ວມມືພາຍນອກເຊັ່ນ:ອົງການສະຫະປະຊາຊາດ, ອົດສະຕາລີ,ການາດາແລະ ອາເມລິກາເພື່ອປຶກສາຫາລືກ່ຽວກັບການຮ່ວມມືໃນວຽກງງານການສົ່ງເສີມສິດທິມະນຸດ. ບັນດາຄູ່ຮ່ວມມືພາຍນອກ ໄດ້ຕີລາຄາສູງຕໍ່ຄວາມພະຍາຍາມຂອງອາຊຽນໃນການສົ່ງເສີມສິດທິມະນຸດຕິດພັນກັບການສ້າງປະຊາຄົມອາຊຽນ ບົນພື້ນຖານຖະແຫຼງການອາຊຽນ ວ່າດ້ວຍ ສິດທິມະນຸດ. ບັນດາຜູ້ຕາງໜ້າ ຄະນະກຳມະການລະຫວ່າງລັດຖະບານອາຊຽນວ່າດ້ວຍສິດທິມະນຸດໄດ້ເນັ້ນໜັກລັກສະນະຈຸດພິເສດຂອງອາຊຽນ ກໍຄື ຂອງແຕ່ລະປະເທດສະມາຊິກອາຊຽນ ກ່ຽວກັບ ຄວາມເປັນແກນກາງ, ເຈົ້າການ ແລະ ນຳພາຂອງອາຊຽນ ໃນການຮ່ວມມືດ້ານສິດທິມະນຸດກັບຄຸ່ຮ່ວມມືພາຍນອກ.

            ຄະນະກຳມາທິການລະຫວ່າງລັດຖະບານອາຊຽນວ່າດ້ວຍສິດທິມະນຸດ ສ້າງຕັ້ງຂຶ້ນພາຍໃຕ້ມາດຕາ 14 ຂອງກົດບັດອາຊຽນເປັນອົງກອນຫຼັກຂອງອາຊຽນໃນການຮ່ວມມືເພື່ອສົ່ງເສີມແລະປົກປ້ອງສິດທິມະນຸດຢູ່ອາຊຽນ, ຄະນະກໍາມາທິການເຄື່ອນໄຫວພາຍໃຕ້ ພາລະບົດບາດ (TOR) ຊຶ່ງຖືກຮັບຮອງເອົາໂດຍກອງປະຊຸມລັດຖະມົນຕີຕ່າງປະເທດໃນປີ 2009.