ໃນຕອນເຊົ້າຂອງວັນທີ 06 ພຶດສະພາ 20016, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການ ຕ່າງປະເທດ ແຫ່ງ ສປປ ລາວ ໄດ້ໃຫ້ການຕ້ອນຮັບການເຂົ້າຢ້ຽມຄຳນັບຂອງ ທ່ານ ຢູໂກ ແອສຕູໂທ (Ugo Astuto), ຫົວຫນ້າກົມອາຊີ-ປາຊີຟິກ ປະຈຳຫ້ອງການພົວພັນຕ່າງປະເທດ ຂອງສະຫະພາບເອິຣົບ, ຫົວຫນ້າຄະນະຜູ້ແທນສະຫະພາບເອິຣົບ ແລະ ຄະນະ, ເນື່ອງໃນໂອກາດທີ່ມາຮ່ວມ ກອງປະຊຸມເຈົ້າຫນ້າທີ່ອາວຸໂສກະກຽມ ໃຫ້ແກ່ເວທີປຶກສາຫາລືດ້ານຄວາມຫມັ້ນຄົງຂອງອາຊຽນ (ARF SOM), ທີ່ ຫລວງພະບາງ, ສປປ ລາວ.

ໃນ​ການພົບປະຄັ້ງນີ້, ​ສອງ​ຝ່າຍ ​ໄດ້​ພ້ອມ​ກັນ​ຕີ​ລາ​ຄາສູງ​ ກ່ຽວ​ກັບ​ການ​ພົວ​ພັນ​ຮ່ວມ​ມື​ດ້ານ​ຕ່າງໆ​ ລະ​ຫວ່າງ​ ສປປ ລາວ ແລະ ສະຫະພາບເອິຣົບ ໃນ​ໄລ​ຍະ​ຜ່ານ​ມາ ແລະ ​ປຶກ​ສາ​ຫາ​ລື​ບາງ​ທິດ​ທາງ ທີ່​ຈະ​ສືບ​ຕໍ່​ເສີມ​ຂະ​ຫ​ຍາຍ​ການ​ພົວ​ພັນ​ຮ່ວມ​ມື​ໃນ​ຕໍ່​ໜ້າ. ນອກ​ນັ້ນ, ຍັງ​ໄດ້​ແລກ​ປ່ຽນ​ຄຳ​ຄິດ​​ເຫັນ​ຕໍ່​ບັນ​ຫາ​ສາ​ກົນ ແລະ ພາກ​ພື້ນ ທີ່​ສອງ​ຝ່າຍ​ມີ​ຄວາມ​ສົນ​ໃຈ. ການ​ຢ້ຽມ​ຢາມ​ຂອງຄະນະຜູ້ແທນສະຫະພາບເອິຣົບໃນຄັ້ງນີ້ ເປັນ​ຂີດ​ໝາຍ​ອັນ​ສຳ​ຄັນ, ທັງເປັນການປະ​ກອບ​ສ່ວນ​ຢ່າງ​ຕັ້ງ​ໜ້າ​ເຂົ້າ​ໃນ​ການ​ເສີມ​ຂະ​ຫ​ຍາ​ຍ​ການ​ພົວ​ພັນ​ຮ່ວມ​ມື​ ລະ​ຫວ່າງ​ ສປປ ລາວ ແລະ ສະຫະພາບເອິຣົບ ​ໃຫ້​ນັບມື້​ນັບ​ມີ​ປະ​ສິດ​ທິ​ຜົນຍິ່ງຂື້ນ.