ໃນຕອນບ່າຍ ວັນທີ 8 ເມສາ 2016, ທີ່ ຫໍປະຊຸມແຫ່ງຊາດ (NCC), ກະຊວງການຕ່າງປະເທດ ໄດ້ຈັດພິທີມອບ-ຮັບເຄື່ອງຊ່ວຍເຫຼືອລ້າຈາກລັດຖະບານ ສປ ຈີນ ໃຫ້ແກ່ ສປປ ລາວ ເພື່ອຮັບໃຊ້ການເປັນເຈົ້າພາບ ແລະ ປະທານອາຊຽນ ໃນປີ 2016. ຕາງໜ້າໃຫ້ແກ່ລັດຖະບານ ສປ ຈີນ ມອບໂດຍ ທ່ານ Guan Huabing, ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ ແລະ ຮັບໂດຍທ່ານ ນາງ ຄຳເພົາ ເອີນທະວັນ, ລັດຖະມົນຕີຊ່ວຍວ່າການກະຊວງການຕ່າງປະເທດ ໂດຍຊ້ອງໜ້າພະນັກງານທັງສອງຝ່າຍເຂົ້າຮ່ວມເປັນສັກຂີພີຍານ.
ເຄື່ອງຊ່ວຍເຫລືອທີ່ນຳມາມອບຄັ້ງນີ້ ປະກອບມີລົດຈິບ (ຍີ່ຫໍ້ DONGFENG SUV) ຈຳນວນ 10 ຄັນ, ລົດເກັງ (ຍີ່ຫໍ້ BYD SEDAN G6) ຈຳນວນ 20 ຄັນ, ເຄື່ອງ X-Ray ກວດຄວາມປອດໄພ ຈຳນວນ 4 ເຄື່ອງ, ຄອມພີວເຕີຕັ້ງໂຕະ ຈຳນວນ 150 ໜ່ວຍ, ຄອມພິວເຕີ ແບບພົກພາ (Laptop) ຈຳນວນ 100 ໜ່ວຍ ແລະ ອຸປະກອນຮັບໃຊ້ຈຳນວນໜຶ່ງ. ເຄື່ອງຊ່ວຍເຫຼືອດັ່ງກ່າວຈະນຳໃຊ້ເຂົ້າໃນການກະກຽມວຽກງານດ້ານຕ່າງໆ ໃນການເປັນເຈົ້າພາບ ແລະ ປະທານອາຊຽນ ຂອງ ສປປ ລາວ ໃນປີ 2016. ການຊ່ວຍເຫລືອຄັ້ງນີ້ ຈະເປັນການປະກອບສ່ວນອັນສໍາຄັນ ເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ມີຜົນສຳເລັດຢ່າງຈົບງາມ.
ໃນໂອກາດດັ່ງກ່າວ, ທ່ານ ນາງ ຄຳເພົາ ເອີນທະວັນ, ໄດ້ຕາງໜ້າໃຫ້ລັດຖະບານ ສປປ ລາວ ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ສປ ຈີນ ທີ່ໄດ້ສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອຕະຫລອດມາ.