ໃນ​ຕອນ​ບ່າຍ​​ວັນ​ທີ 27 ກຸມພາ 2024, ທີ່ ຫ້ອງຮັບແຂກກະຊວງ​ການ​ຕ່າງປະ​ເທດ,​ ທ່ານ ໂພໄຊ ໄຂຄໍາພິທູນ, ​ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ​ໄດ້​ຕ້ອນຮັບ​ການເຂົ້າຢ້ຽມອຳລາຂອງ ທ່ານ ດຣ. ຫຍິງຣູ ຈາຄວາລິນ ໂລ (Dr. Ying-Ru Jacqueline LO), ຜູ້ຕາງໜ້າອົງການອະນາໄມໂລກ (WHO) ປະຈຳ ສປປ ລາວ ທີ່ສຳເລັດການປະຕິບັດໜ້າທີ່ເປັນຜູ້ຕາງໜ້າຢູ່ ສປປ ລາວ.​

ໃນ​ໂອກາດ​ດັ່ງກ່າວ, ທ່ານ ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ​ ​ໄດ້​ສະ​ແດງ​ຄວາມ ​ຊົມ​ເຊີຍ​ທ່ານ ຜູ້ຕາງໜ້າຂອງ​ອົງການ WHO ທີ່ໄດ້ປະຕິບັດໜ້າທີ່ຢ່າງມີຜົນສຳເລັດ ເຊິ່ງເຮັດ​ໃຫ້ການ​ພົວພັນຮ່ວມມື ​ລະຫວ່າງ ສປປ ລາວ ແລະ ອົງການອະນາໄມໂລກ ສືບຕໍ່​ມີ​ໝາກຜົນ​​ຍິ່ງຂຶ້ນໃນໄລຍະຜ່ານມາ ພ້ອມທັງສະ​ແດງ​ຄວາມ​ຂອບ​ໃຈ​ ອົງ​ການ WHO ທີ່ໄດ້ໃຫ້​ການ​ຊ່ວຍ​ເຫຼືອ​ແກ່ ສ​ປ​ປ ລາວ ໃນ​ຂະ​ແໜງ​ການ​ທີ່​ກ່ຽວ​ຂ້ອງ​ກັບ ​ເປົ້າໝາຍການພັດທະນາແບບຍືນຍົງ ຫຼື ປພຍ 3: ມີສຸຂະພາບ ແລະ ຊີວິດການເປັນຢູ່ທີ່ດີ, ປພຍ 13: ແກ້ໄຂບັນຫາການປ່ຽນແປງດິນຟ້າອາກາດ ໂດຍສະເພາະແມ່ນ 3 ບູລິມະສິດໃນການຮ່ວມມື: 1. ສົ່ງເສີມຄວາມທົນທານ ແລະ ຄວາມຍືນຍົງ ຂອງລະບົບສາທາລະນະສຸກ ເພື່ອຮັບປະກັນການເຂົ້າເຖິງລະບົບສາທາລະນະສຸກແບບທົ່ວເຖິງ, 2. ໃຫ້ການປົກປ້ອງຊຸມຊົນຈາກພະຍາດລະບາດ ແລະ ເຫດການສຸກເສີນດ້ານສາທາລະນະສຸກ, ແລະ 3. ໃຫ້ການປົກປ້ອງສຸຂະພາບຈາກການປ່ຽນແປງດິນຟ້າອາກາດ ແລະ ບັນດາໄພຂົ່ມຂູ່ດ້ານສິ່ງແວດລ້ອມ. ນອກຈາກນີ້, ສປປ ລາວ ແລະ ອົງການອະນາໄມໂລກ ໄດ້ຈັດຕັ້ງປະຕິບັດ ກິດຈະກຳຕ່າງໆ ກ່ຽວກັບການຫຼຸດຜ່ອນຜົນກະທົບ ຈາກການປ່ຽນແປງດິນຟ້າອາກາດ, ໄດ້ຮ່ວມກັນ ພັດທະນາຍຸດທະສາດການຮ່ວມມືລະຫວ່າງອົງການ WHO ແລະ ສປປ ລາວ ສຳລັບສົກປີ 2024-2028, ເຊິ່ງໄດ້ຖືກຮັບຮອງຢ່າງເປັນທາງການໃນເດືອນ ກຸມພາ 2024 ນີ້. ຍຸດທະສາດດັ່ງກ່າວ ຈະຊ່ວຍສະໜັບສະໜູນໃຫ້ແກ່ວຽກງານຂອງກະຊວງສາທາລະນະສຸກ, ກະຊວງຊັບພະຍາ ກອນທຳມະຊາດ ແລະ ສິ່ງແວດລ້ອມ, ກະຊວງສຶກສາທິການ ແລະ ກິລາ, ກະຊວງພາຍໃນ, ກະຊວງໂຍທາທິການ ແລະ ຂົນສົ່ງ ແລະ ສະພາແຫ່ງຊາດ. ພ້ອມດຽວກັນນັ້ນ, ທ່ານ ໂພໄຊ ໄຂຄຳພິທູນ ໄດ້ຢໍ້າຄືນຄວາມໝາຍໝັ້ນຂອງລັດຖະບານ ກໍ່ຄື ກະຊວງການຕ່າງປະເທດ ທີ່ຈະສືບຕໍ່ໃຫ້ການຮ່ວມມື ແລະ ສະໜັບສະໜູນການປະຕິບັດວຽກງານຂອງອົງການ WHO ໃນອະນາຄົດ; ແລະ ໄດ້ອວຍພອນໄຊ ໃຫ້ ທ່ານ ດຣ. ຫຍິງຣູ ຈາຄວາລິນ ໂລ ຈົ່ງມີຄວາມຜາສຸກ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.

​

ໃນໂອກາດ​ດຽວ​ກັນ​ນີ້,​ ທ່ານ ດຣ. ຫຍິງຣູ ຈາຄວາລິນ ໂລ ກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບ​ອົບ​ອຸ່ນ​ຂອງ ທ່ານ ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ສະ​ແດງ​ຄວາມ​ຂອບ​ໃຈ​ມາ​ຍັງ​ລັດຖະບານ ​ແຫ່ງ ສປປ ລາວ ທີ່​ໄດ້​ອຳນວຍຄວາມສະດວກ ແລະ ໃຫ້ການຮ່ວມມືເປັນຢ່າງດີຕະຫຼອດໄລຍະການປະຕິບັດ​ໜ້າ​ທີ່ຢູ່ ສປປ ລາວ ຂອງຕົນ ແລະ ຫວັງຢ່າງຍິ່ງວ່າ ຈະໄດ້ກັບມາຢ້ຽມຢາມ ສປປ ລາວ ອີກຄັ້ງ.