ໃນວັນທີ 13 ທັນວາ 2023, ທີ່ ສູນການຮ່ວມມືສາກົນ ແລະ ການຝຶກອົບຮົມ ໄດ້ມີພິທີເຊັນບົດບັນທຶກຄວາມເຂົ້າໃຈ (MoU) ວ່າດ້ວຍ ການຮ່ວມມືດ້ານວິຊາການ ລະຫວ່າງ ສະຖາບັນການຕ່າງປະເທດ, ກະຊວງການຕ່າງປະເທດ ແຫ່ງ ສປປ ລາວ ແລະ ມະຫາວິທະຍາໄລ ຢູນນານ, ສປ. ຈີນ. ສໍາລັບຝ່າຍລາວ ໃຫ້ກຽດລົງນາມໂດຍ ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ, ສ່ວນ ມະຫາວິທະຍາໄລ ຢູນນານ ຂອງ ສປ. ຈີນ ໃຫ້ກຽດຕາງໜ້າລົງນາມໂດຍ ທ່ານ ສຈ Chen Keqing, ຮອງປະທານຂອງ ມະຫາວິທະຍາໄລ ຢູນນານ, ໂດຍມີ    ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໃຫ້ກຽດເປັນສັກຂີພະຍານ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານ ຈາກ ສະຖາບັນການຕ່າງປະເທດ, ພ້ອມດ້ວຍຜູ້ຕາງໜ້າຈາກ ສະຖານເອກອັກຄະລັດຖະທູດ ສປ. ຈີນ ປະຈໍາ ສປປ ລາວ ເຂົ້າຮ່ວມທັງໝົດ 100 ທ່ານ.

ການເຊັນບົດບັນທຶກຄວາມເຂົ້າໃຈຄັ້ງນີ້ ບໍ່ພຽງແຕ່ເປັນການເສີມຂະຫຍາຍການຮ່ວມມື ແລະ ຮັດແໜ້ນການພົວພັນທີ່ມີມູນເຊື້ອແບບເພື່ອນມິດ ລະຫວ່າງ ສອງສະຖາບັນ ກໍ່ຄື ສອງປະເທດ ແລະ ຍັງເປັນການສ້າງກົນໄກການຮ່ວມມື ກັບ ມະຫາວິທະຍາໄລ ຢູນນານ ເພື່ອແລກປ່ຽນປະສົບການ ແລະ ຖອດຖອນບົດຮຽນ ໃນການຄົ້ນຄວ້າບັນຫາພົ້ນເດັ່ນ, ແລກປ່ຽນທັດສະນະ, ຂໍ້ມູນຂ່າວສານດ້ານວິຊາການ ແລະ ອື່ນໆ ທີ່ສອງຝ່າຍມີຄວາມສົນໃຈຮ່ວມກັນ. ພ້ອມດຽວກັນນັ້ນ, ກໍ່ເພື່ອເປັນການສ້າງໃຫ້ມີນິຕິກໍາຮ່ວມກັນ ເພື່ອເປັນເອກະສານອ້າງອີງ ໃຫ້ແກ່ທັງສອງຝ່າຍ ໃນການພົວພັນຮ່ວມມືກັນໃນອານາຄົດ.

ນອກຈາກເຊັນບົດບັນທຶກຄວາມເຂົ້າໃຈແລ້ວ ສະຖາບັນການຕ່າງປະເທດ ແລະ ມະຫາວິທະຍາໄລ ຢູນນານ ຍັງຈັດກອງປະຊຸມສໍາມະນາຮ່ວມກັນ ພາຍໃຕ້ຫົວຂໍ້: ການທູດປະເທດໃກ້ຄຽງຂອງ ສປ. ຈີນ “China’s Neighborhood Diplomacy” ເນື່ອງຈາກວ່າປີນີ້ເປັນປີແຫ່ງການສ້າງຕັ້ງການທູດປະເທດໃກ້ຄຽງຂອງ ສປ. ຈີນ ຄົບຮອບ 10 ປີ, ເຊິ່ງເປັນໂອກາດດີໃຫ້ແກ່ຜູ້ເຂົ້າຮ່ວມຮັບຮູ້ ກ່ຽວກັບ ຜົນສໍາເລັດດ້ານຕ່າງໆ ລວມທັງແນວທາງນະໂຍບາຍຂອງ ສປ. ຈີນ ຕໍ່ກັບບັນດາປະເທດໃກ້ຄຽງ ແລະ ທັງເປັນການເປີດໂອກາດແລກປ່ຽນຄໍາເຫັນຄໍາເຫັນ ລະຫວ່າງ ນັກຄົ້ນຄວ້າ, ຜູ້ບັນຍາຍຈາກ ສປ.​ ຈີນ ແລະ ຜູ້ເຂົ້າຮ່ວມ ຂອງລາວທີ່ມາຈາກກົມກອງພາຍໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ບັນດາກະຊວງອ້ອມຂ້າງທີ່ກ່ຽວຂ້ອງ ກໍຄື ຜູ້ຕາງໜ້າຈາກ ສະຖານທູດຈີນ ປະຈໍາ ສປປ ລາວ. ການຈັດສໍາມະນາຄັ້ງນີ້ ເປັນກິດຈະກໍາທໍາອິດ ພາຍຫຼັງມີເຊັນ MoU ຮ່ວມກັນ, ເຊິ່ງທັງສອງຝ່າຍ ຈະສືບຕໍ່ປຶກສາຫາລື ກ່ຽວກັບ ການຮ່ວມມືໃນຕໍ່ໜ້າ ລວມທັງບັນຫາຕ່າງໆທີ່ທັງສອງຝ່າຍມີຄວາມສົນໃຈຮ່ວມກັນ ເປັນຕົ້ນ:​ ໂຄງການເຮັດບົດຄົ້ນຄວ້າຮ່ວມ, ໂຄງການຈັດຝຶກອົບຮົມຮ່ວມ, ຈັດກອງປະຊຸມສໍາມະນາດ້ານວິຊາການຮ່ວມ ແລະ ອື່ນໆ. ການຈັດສອງກິດຈະກໍາດັ່ງກ່າວນີ້, ແມ່ນເພື່ອເປັນການຈັດຕັ້ງຜັນຂະຫຍາຍບົນເນື້ອໃນຈິດໃຈຂອງບົດບັນທຶກຄວາມເຂົ້າໃຈທີ່ໄດ້ເຊັນຮ່ວມກັນໃນຄັ້ງນີ້ ເພື່ອໃຫ້ເກີດຜົນປະໂຫຍດສູງສຸດໃຫ້ທັງສອງສະຖາບັນ.