ໃນວັນທີ 23 ທັນວາ 2022, ກະຊວງການຕ່າງປະເທດ (ກົມສົນທິສັນຍາ ແລະ ກົດໝາຍ ໃນນາມສະມາຊິກອງເລຂາຄະນະກຳມະການຕ້ານການຄ້າມະນຸດລະດັບຊາດ) ໄດ້ຈັດກອງປະຊຸມສຳມະນາເຜີຍແຜ່ ກ່ຽວກັບ ສົນທິສັນຍາທີ່ ສປປ ລາວ ເປັນພາຄີ, ກົດໝາຍ ແລະ ນິຕິກໍາພາຍໃນ ທີ່ກ່ຽວຂ້ອງກັບວຽກງານການສະກັດກັ້ນ ແລະ ຕ້ານການຄ້າມະນຸດ ໃຫ້ແກ່ພະນັກງານບາງຂະແໜງການທີ່ກ່ຽວຂ້ອງ ຂັ້ນແຂວງ ແລະ ເມືອງຂອງ ແຂວງ ຜົ້ງສາລີ ທີ່ ຫ້ອງວ່າການປົກຄອງແຂວງ ຜົ້ງສາລີ ພາຍໃຕ້ການເປັນປະທານກ່າວເປີດກອງປະຊຸມຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ເຂົ້າຮ່ວມກ່າວຄຳເຫັນຂອງ ທ່ານ ຄຳເຫລັກ ໃຈອີສານ, ຮອງເຈົ້າແຂວງ ແຂວງ ຜົ້ງສາລີ.
ຈຸດປະສົງຂອງກອງປະຊຸມສຳມະນາເຜີຍແຜ່ ແມ່ນເພື່ອເຜີຍແຜ່ສົນທິສັນຍາ ທີ່ ສປປ ລາວ ເປັນພາຄີ ແລະ ນິຕິກຳພາຍໃນທີ່ກ່ຽວຂ້ອງກັບວຽກງານການສະກັດກັ້ນ ແລະ ຕ້ານການຄ້າມະນຸດ ໃຫ້ໄດ້ຮັບການເສີມຂະຫຍາຍສູ່ລວງເລິກໃຫ້ແກ່ພະນັກງານບາງຂະແໜງການທີ່ກ່ຽວຂ້ອງຂັ້ນເມືອງ ແລະ ແຂວງ ບ່ອນທີ່ມີຊາຍແດນຕິດຈອດກັບຕ່າງປະເທດ ແລະ ບ່ອນທີ່ມີຄວາມສ່ຽງຕໍ່ຂະບວນການຄ້າມະນຸດ. ພ້ອມກັນນັ້ນ, ກອງປະຊຸມຍັງເປັນເວທີໃຫ້ບັນ ດາພະນັກງານຂະແໜງການກ່ຽວຂ້ອງຂອງແຂວງ ແລະ ເມືອງ ໄດ້ມີການປຶກສາຫາລື ແລະ ແລກປ່ຽນຄຳຄິດເຫັນທາງດ້ານວິຊາການ ຍົກລະດັບຄວາມເຂົ້າໃຈດ້ານວຽກງານສະກັດກັ້ນ ແລະ ຕ້ານການຄ້າມະນຸດ ໂດຍສະເພາະການປະສານງານລະຫວ່າງເມືອງ, ແຂວງ ແລະ ສູນກາງ ຕາມກົນໄກທີ່ມີຢູ່ໃຫ້ມີຄວາມໂລ່ງລ່ຽນ ແລະ ວ່ອງໄວ ມີປະສິດ ທິພາບ ແລະ ປະສິດທິຜົນ ເພື່ອຮັບປະກັນການປົກປ້ອງສິດຜົນປະໂຫຍດຂອງປະຊາຊົນ ເພື່ອບໍ່ໃຫ້ຕົກເປັນເຫຍື່ອຂອງຂະບວນການຄ້າມະນຸດ ແລະ ໃຫ້ສາມາດນຳເອົາຜູ້ກະທຳຜິດມາລົງໂທດຕາມກົດໝາຍ.
ກອງປະຊຸມສຳມະນາເຜີຍແຜ່ດັ່ງກ່າວມີນັກວິທະຍາກອນຈາກ ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ ແລະ ສູນກາງສະຫະພັນແມ່ຍິງລາວ ເຂົ້າຮ່ວມນຳສະເໜີບົດໃນຫົວຂໍ້ທີ່ພົວພັນກັບພາລະບົດບາດ, ສິດ ແລະ ໜ້າທີ່ ທີ່ກ່ຽວຂ້ອງກັບຂະແໜງການຂອງຕົນໃນວຽກງານການສະກັດກັ້ນ ແລະ ຕ້ານການຄ້າມະນຸດ ລວມທັງການຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດ ຊຶ່ງມີຜູ້ເຂົ້າຮ່ວມທັງໝົດ 60 ທ່ານ (ຍິງ 22 ທ່ານ).