ໃນວັນທີ 15-16 ທັນວາ 2022, ທີ່ ນະຄອນຫຼວງວຽງຈັນ, ສະຖາບັນການຕ່າງປະເທດ, ສໍານັກງານຜູ້ຕ່າງໜ້າຖາວອນ ແຫ່ງ ສປປ ລາວ ປະຈຳ ອາຊຽນ ແລະ ສະຖາບັນ ເພື່ອສັນຕິພາບ ແລະ ຄວາມປອງດອງ ຂອງ ອາຊຽນ ແລະ ໄດ້ຮັບການສະໜັບສະໜູນຈາກລັດຖະບານ ສ.ເກົາຫຼີ ໄດ້ເປັນເຈົ້າພາບຮ່ວມກັນ ຈັດກອງປະຊຸມສຳມະນາ ພາຍໃຕ້ຫົວຂໍ້: “ ປະສົບການພາຍຫລັງການເກິດຄວາມຂັດແຍ້ງ ແລະ ການເຕົ້າໂຮມຄວາມສາມັກຄີພາຍໃນ ຂອງພາກພື້ນອາຊີຕາເວັນອອກສຽງໃຕ້-ASEAN-IPR Training: Leg 3 Training-Post-Conflict and Reintegration Experience in Southeast Asia: Focus on Reconciliation Models ”, ໂດຍການໃຫ້ກຽດເປັນປະທານຮ່ວມພິທີເປີດຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ. ກອງປະຊຸມສໍາມະນາດັ່ງກ່າວ, ມີຜູ້ເຂົ້າຮ່ວມທັງໝົດ 100 ທ່ານ ທີ່ມາຈາກຫຼາຍພາກສ່ວນ ເຊັ່ນ: ກະຊວງການຕ່າງປະ ເທດ, ຄະນະພົວພັນຕ່າງປະເທດສູນກາງພັກ ແລະ ກະຊວງອ້ອມຂ້າງສູນກາງ, ບັນດາສະຖາບັນຄົ້ນຄວ້າຂອງ ສປປ ລາວ, ນັກການທູດ ແລະ ນັກຄົ້ນຄວ້າຫນຸ່ມນ້ອຍຈາກບັນດາປະເທດສະມາຊິກອາຊຽນ.
ກອງປະຊຸມສໍາມະນາ “ປະສົບການພາຍຫລັງການເກີດຄວາມຂັດແຍ້ງ ແລະ ການເຕົ້າໂຮມຄວາມສາມັກຄີພາຍໃນ ຂອງພາກພື້ນອາຊີຕາເວັນອອກສຽງໃຕ້” ແມ່ນໜື່ງໃນສາມກອງປະຊຸມ ທີ່ໄດ້ຮັບການສະໜັບສະໜຸນຈາກກອງທຶນຮ່ວມອາຊຽນ-ເກົາຫຼີ, ເຊິ່ງໃນເບື້ອງຕົ້ນ ແມ່ນມີແຜນຈະຈັດກອງປະຊຸມສໍາມະນາດັ່ງກ່າວ ໃນທ້າຍປີ 2021, ແຕ່ຍ້ອນສະພາບການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ໂຄງການດັ່ງກ່າວ ຖືກເລື່ອນມາຈັດໃນທ້າຍປີ 2022. ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນເພື່ອສ້າງຄວາມເຂົ້າໃຈທົ່ວໄປ ກ່ຽວກັບ ບັນຫາຄວາມຂັດແຍ່ງ ໂດຍອີງໃສ່ຫລັກທິດສະດີ, ການສ້າງສັນຕິພາບ ແລະ ການເຕົ້າໂຮມຄວາມສາມັກຄີພາຍໃນ, ສົ່ງເສີມຄວາມເຂົ້າໃຈໃຫ້ ເລິກເຊິ່ງ ກ່ຽວກັບ ບັນຫາສົງຄາມເຢັນ ທີ່ສົ່ງຜົນກະທົບຕໍ່ພາກພື້ນ ແລະ ສາກົນ ໃຫ້ແກ່ນັກການທູດໜຸ່ມນ້ອຍ ແລະ ນັກຄົ້ນຄວ້າຂອງບັນດາປະເທດສະມາຊິກອາຊຽນ. ຜູ້ເຂົ້າຮ່ວມກອງປະຊຸມສໍາມະນາດັ່ງກ່າວ ຈະໄດ້ຮັບຟັງການບັນຍາຍ ແລະ ແລກປ່ຽນປະສົບການ-ຄໍາຄິດຄໍາເຫັນ ກ່ຽວກັບ ບັນຫາຄວາມຂັດແຍ່ງ ແລະ ສະພາບການພາຍຫຼັງມີຄວາມຂັດແຍ້ງ, ສົງຄາມເຢັນໃນອາຊີຕາເວັນອອກສຽງໃຕ້, ປະສົບການ ແລະ ກໍລະນີສຶກສາຕ່າງໆ ໃນພາກພື້ນອາຊີຕາເວັນອອກສຽງໃຕ້ ຈາກຜູ້ບັນຍາຍທີ່ມີຄວາມຮູ້ ແລະ ມີປະສົບການ ຈາກຫລາຍປະເທດໃນພາກພື້ນ ແລະ ສາກົນ. ພ້ອມດຽວກັນ, ຄະນະຜູ້ແທນທີ່ມາເຂົ້າຮ່ວມກອງປະຊຸມສຳມະນາຄັ້ງນີ້ ຍັງຈະໄດ້ເດີນທາງໄປຢ້ຽມຢາມ ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ເພື່ອບັນຍາຍ ກ່ຽວກັບ ພາລະບົດບາດຂອງ ສະຖາບັນ ສັນຕິພາບ ແລະ ຄວາມປອງດອງອາຊຽນ ໃຫ້ແກ່ບັນດາຄູອາຈານ ແລະ ນັກສຶກສາ ຂອງຄະນະດັ່ງກ່າວອີກດ້ວຍ.
ກອງປະຊຸມສໍາມະນາດັ່ງກ່າວ ໄດ້ປະກອບສ່ວນສໍາຄັນ ໃນການສ້າງຂີດຄວາມສາມາດ ໃຫ້ແກ່ນັກການທູດ ແລະ ນັກຄົ້ນຄວ້າໜຸ່ມນ້ອຍຂອງບັນດາປະເທດສະມາຊິກອາຊຽນ ກໍຄື ສປປ ລາວ ໃຫ້ມີຄວາມຮູ້ຄວາມເຂົ້າໃຈຢ່າງເລິກເຊິ່ງ ກ່ຽວກັບ ສະພາບຄວາມຂັດແຍ້ງໃນພາກພື້ນ, ວິທີທາງ ແລະ ຄວາມພະຍາຍາມ ເພື່ອນໍາໄປສູ່ການສ້າງຄວາມປອງດອງຊາດ ແລະ ສ້າງສັນຕິພາບໃນປະເທດ, ການສ້າງສາ ແລະ ຮັກສາສັນຕິພາບ ໃນພາກພື້ນ ພ້ອມທັງຊ່ວຍສົ່ງເສີມບົດບາດຂອງ ສປປ ລາວ ໃນເວທີສາ ກົນໃນການຮັດແໜ້ນ ແລະ ເຊື່ອມໂຍງເຄື່ອຂ່າຍນັກຄົ້ນຄວ້າຂອງ ສປປ ລາວ ກັບ ບັນດາສະຖາບັນຄັງປັນສາກົນ.