ໃນຕອນເຊົ້າຂອງວັນທີ 17 ພະຈິກ 2022, ທີ່ ກະຊວງການຕ່າງປະເທດ, ສະຫາຍ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອໍາລາຂອງ ສະຫາຍ ຫວູ ແອັງ ຢຸງ, ກົງສູນໃຫຍ່ ແຫ່ງ ສສ ຫວຽດນາມ ປະຈໍາ ແຂວງສະຫວັນນະເຂດ ໃນໂອກາດສໍາເລັດການປະຕິບັດໜ້າຢູ່ ສປປ ລາວ.

ໃນໂອກາດນີ້, ສະຫາຍ ໂພໄຊ ໄຂຄໍາພິທູນ ໄດ້ສະ​ແດ​ງ​ຄວາມຊົມເຊີຍ ສະຫາຍ ຫວູ ແອັງ ຢຸງ ທີ່ໄດ້ສໍາເລັດການປະຕິບັດໜ້າທີ່ດ້ວຍໝາກຜົນອັນຈົບງາມ, ເຊິ່ງຕະຫລອດໄລຍະການປະຕິບັດໜ້າທີ່ທາງການທູດ ເປັນເວລາ 3 ປີ ຢູ່ ສປປ ລາວ, ສະຫາຍໄດ້ປະກອບສ່ວນຢ່າງຕັ້ງໜ້າເຂົ້າໃນການເປັນຂົວຕໍ່ປະສານງານການພົວພັນຮ່ວມມືໃນຫລາຍໆດ້ານ ລະຫວ່າງ ບັນດາແຂວງພາກກາງ ຂອງ ສປປ ລາວ ກັບ ບັນດາແຂວງຂອງ ຫວຽດນາມ ແລະ ປະກອບສ່ວນຊຸກຍູ້ຍົກສູງຄຸນນະພາບການພົວພັນຮ່ວມມືກັບບັນດາແຂວງແຮກສ່ຽວ ໄດ້ຮັບຜົນສໍາເລັດຢ່າງຈົບງາມ ເປັນຕົ້ນ ປະກອບສ່ວນຊຸກຍູ້ການຈັດງານວາງສະແດງສິນຄ້າ ລາວ-ຫວຽດນາມ ທີ່ຈັດຂຶ້ນຢູ່ແຂວງສະຫວັນນະເຂດ ເພື່ອຊຸກຍູ້ການຮ່ວມມືດ້ານການຄ້າລະຫວ່າງສອງປະເທດ ແລະ ອື່ນໆ.

ພ້ອມນີ້, ສະຫາຍ ໂພໄຊ ໄຂຄໍາພິທູນ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການພົວພັນຮ່ວມມືແບບພິເສດ ໃກ້ຊິດສະໜິດສະໜົມຖານສະຫາຍອ້າຍນ້ອງ ລະຫວ່າງ ລາວ-ຫວຽດນາມ, ຫວຽດນາມ-ລາວ ທີ່ນັບມື້ແຕກດອກອອກຜົນງົດງາມຂື້ນໄປເລື້ອຍໆ, ພ້ອມທັງໄດ້ສະແດງຄວາມຊົມ​ເຊີຍ ສະຫາຍ ຫວູ ແອັງ ຢຸງ ຕໍ່ຜົນງານການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ລາວ-ຫວຽດນາມ ແລະ ສະແດງຄວາມເຊື່ອໝັ້ນວ່າ ພາຍຫລັງທີ່ ສະຫາຍ ຫວູ ແອັງ ຢຸງ ກັບຄືນປະເທດ, ສະຫາຍ ຈະສືບຕໍ່ເຄື່ອນໄຫວຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

ໃນໂອກາດດຽວກັນນີ້, ສະຫາຍ ຫວູ ແອັງ ຢຸງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນການເຂົ້າຢ້ຽມອໍາລາໃນຄັ້ງນີ້ ແລະ ສະແດງຄວາມຂອບໃຈຕໍ່ ພັກ, ລັດ ແລະ ປະຊາຊົນລາວອ້າຍນ້ອງ ໂດຍສະເພາະ ກະຊວງການຕ່າງປະເທດລາວ ທີ່ໄດ້ໃຫ້ການຮ່ວມມືທີ່ດີ ແລະ ຊ່ວຍອໍານວຍຄວາມສະດວກ ຕະລອດໄລຍະເວລາທີ່ປະຕິບັດໜ້າທີ່ ຢູ່ ສປປ ລາວ, ພ້ອມທັງໄດ້ໃຫ້ຄໍາໝັ້ນສັນຍາວ່າ ພາຍຫຼັງກັບຄືນປະເທດ ຍັງຈະສືບຕໍ່ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ, ລາວ-ຫວຽດນາມ ໃຫ້ໄດ້ຮັບການພັດທະນາຂຶ້ນເປັນກ້າວໆ.