ໃນລະຫວ່າງວັນທີ 12-13 ຕຸລາ 2022, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ປະທານຄະນະເຈົ້າໜ້າທີ່ອາວຸໂສຊາຍແດນ ລາວ-ກໍາປູເຈຍ ພ້ອມດ້ວຍຕາງຫນ້າຈາກພາກສ່ວນກ່ຽວຂ້ອງຈາກສູນກາງຈໍານວນຫນຶ່ງ ໄດ້ລົງເຄື່ອນໄຫວເຮັດວຽກ ຢູ່ ແຂວງອັດຕະປື.​

ໃນໂອກາດການເຄື່ອນໄຫວໃນຄັ້ງນີ້ ຄະນະໄດ້ພົບປະ ແລະ ເຮັດວຽກຮ່ວມກັບຄະນະຮັບຜິດຊອບວຽກງານຊາຍແດນຂອງແຂວງ ຊຶ່ງນໍາໂດຍ ທ່ານ ທະນູໄຊ ບັນຊາລິດ, ​ຮອງເຈົ້າແຂວງ ແລະ ພາກສ່ວນທີ່ກ່ຽວຂ້ອງຂອງແຂວງ. ໃນການເຮັດວຽກຮ່ວມກັນຄັ້ງນີ້, ຄະນະຈາກສູນກາງ ແລະ ແຂວງ ໄດ້ປຶກສາຫາລືແລກປ່ຽນສະພາບຢູ່ຕາມບໍລິເວນຊາຍແດນລະຫວ່າງ ແຂວງອັດຕະປື ກັບ ປະເທດໃກ້ຄຽງ ເພື່ອແນໃສ່ສືບຕໍ່ຮັດແຫນ້ນການພົວພັນຮ່ວມມື ລະຫວ່າງ ແຂວງຊາຍແດນນໍາກັນ.

ຈາກນັ້ນ, ທ່ານຮອງລັດຖະມົນຕີ ພ້ອມຄະນະ ກໍ່ໄດ້ລົງຢ້ຽມຢາມ ແລະ ໂອ້ລົມອ້າຍນ້ອງທະຫານທີ່ປະຕິບັດຫນ້າທີ່ຢູ່ເຂດຫ່າງໄກສອກຫລີກທີ່ຂື້ນກັບແຂວງອັດຕະປື ໃຫ້ມີຄວາມອຸ່ນອ່ຽນທຸນທຽ່ງ ແລະ ຕັ້ງຫນ້າປະຕິບັດຫນ້າທີ່ການເມືອງຂອງເຂົາເຈົ້າດ້ວຍຄວາມຮັບຜິດຊອບ  ເພື່ອແນໃສ່ຮັບປະກັນຄວາມສະຫງົບຕາມບໍລິເວນຊາຍແດນກັບປະເທດໃກ້ຄຽງ. ພ້ອມນີ້ ທ່ານຮອງລັດຖະມົນຕີກະຊວງການຕ່າງປະເທດ ກໍໄດ້ມອບອຸປະກອນເຕັກນິກ ແລະ ເຄື່ອງບໍລິໂພກຈໍານວນໜຶ່ງ.​ ໃນໂອກາດນີ້, ທ່ານຮອງລັດຖະມົນຕີກະຊວງການຕ່າງປະເທດ ພ້ອມຄະນະ ກໍໄດ້ເຄື່ອນໄຫວຢ້ຽມຢາມເຂດຜະລິດກະສິກໍາ, ປູກຝັງ, ລ້ຽງສັດ ຄົບວົງຈອນຂອງ ບໍລິສັດທາໂກກະສິກໍາ  ຢູ່ ເມືອງໄຊເສດຖາ ຊຶ່ງເປັນໂຄງການລົງທຶນທີ່ໃຫຍ່ແຫ່ງຫນຶ່ງຈາກ ສສ.ຫວຽດນາມ ຢູ່ ແຂວງອັດຕະປື ທີ່ສາມາດຕອບສະຫນອງວຽກເຮັດງານທໍາໃຫ້ແກ່ພົນລະເມືອງແຂວງອັດຕະປື ແລະ ແຂວງອື່ນໆຂອງ ສປປ ລາວ ອີກດ້ວຍ.