ໃນຕອນເຊົ້າຂອງ ວັນທີ 15 ກັນຍາ 2022, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ຫ້ອງການບໍລິການສະຖານທູດ (ຫບສ), ກະຊວງການຕ່າງປະເທດ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຄຸ້ມຄອງພະນັກງານທ້ອງຖິ່ນ ທີ່ເຂົ້າເຮັດວຽກຢູ່ສຳນັກງານຕ່າງປະເທດ ແລະ ອົງການຈັດຕັ້ງສາກົນ ຢູ່ ສປປ ລາວ ໃນໄລຍະຜ່ານມາ ແລະ ທິດທາງແຜນການ ໃນຕໍ່ໜ້າຂຶ້ນ, ພາຍໃຕ້ການເປັນປະທານຂອງ ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ແລະ ມີຕົວແທນທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ ຈໍານວນຫຼາຍກວ່າ 50 ທ່ານ.

ທີ່ປະຊຸມ, ຫ້ອງການບໍລິການສະຖານທູດໃນຖານະເປັນໜ່ວຍງານຫຼັກໃນການປະຕິບັດໜ້າທີ່ສົ່ງເສີມ ແລະ ຄຸ້ມຄອງພະນັກງານທ້ອງຖິ່ນ ໄດ້ຜ່ານບົດສະຫຼຸບ ແລະ ຕີລາຄາການປະຕິບັດວຽກງານດັ່ງກ່າວໃນໄລຍະຜ່ານມາ, ພ້ອມທັງປຶກສາຫາລື ແລະ ວາງທິດທາງແຜນການ ໃນຕໍ່ໜ້າ; ກອງປະຊຸມ ໄດ້ປຶກສາຫາລືບັນຫາຕ່າງໆຢ່າງກົງໄປກົງມາ, ໂດຍສະເພາະສຸມໃສ່ຄົ້ນຄວ້າ ແລະ ປະກອບຄວາມຄິດຄວາມເຫັນໃສ່ການປັບປຸງດຳລັດສະບັບເລກທີ 456/ນຍ, ລົງວັນທີ 01 ພະຈິກ 2010 ດ້ວຍຄວາມເອົາໃຈໃສ່ ເພື່ອໃຫ້ສອດຄ່ອງກັບສະພາບເງື່ອນໄຂໃນປະຈຸບັນ ກໍຄືແນວໂນ້ມໃນອານາຄົດ, ກົນໄກການປະສານງານ ລະຫວ່າງ ສູນກາງ ແລະ ທ້ອງຖິ່ນ ບົນພື້ນຖານຫຼັກການປະຕູດຽວໃຫ້ມີປະສິດຕິພາບສູງຂຶ້ນກວ່າເກົ່າ ໂດຍເປັນການສົ່ງເສີມ, ຕິດຕາມ ແລະ ຄຸ້ມຄອງພະນັກງານທ້ອງຖິ່ນທີ່ເຮັດວຽກຢູ່ໃນສຳນັກງານຕ່າງປະເທດ ແລະ ອົງການຈັດຕັ້ງສາກົນຕ່າງໆ ໃຫ້ເປັນລະບົບ, ບໍ່ກະແຈກກະຈາຍ.

ໃນຕອນທ້າຍຂອງກອງປະຊຸມ, ທ່ານປະທານກອງປະຊຸມ ຍັງໄດ້ເໜັ້ນເຖິງມາດຕະການໃນການຜັນຂະຫຍາຍເນື້ອໃນຈິດໃຈຂອງກອງປະຊຸມໃຫ້ເກີດດອກອອກຜົນເປັນຮູບປະທໍາທີ່ແທ້ຈິງ ໂດຍຖືເອົາກົນໄກການປະສານງານ ແລະ ລະບຸໜ່ວຍງານຮັບຜິດຊອບວຽກງານດັ່ງກ່າວໃຫ້ມີຄວາມກະຈ່າງແຈ້ງ ແລະ ປະຕິບັດວຽກງານຢ່າງມີປະສິດທິພາບ.