ໃນລະຫວ່າງວັນທີ 3-5 ກັນຍາ 2022, ສະຫາຍ ເຮຣາຣໂດ ເປຫຍາເວນຣ ໂປຣຕານ (Gerardo Penalver Portal), ຮອງລັດຖະມົນຕີຕ່າງປະເທດ ແຫ່ງ ສາທາລະນະລັດ ກູບາ ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ເພື່ອສືບຕໍ່ເພີ່ມທະວີສາຍພົວພັນມິດຕະພາບ ແລະ ການຮ່ວມມືອັນດີ ທີ່ເປັນມູນເຊື້ອມາແຕ່ດົນນານ ລະຫວ່າງ ສອງຊາດ ລາວ-ກູບາ ໃຫ້ນັບມື້ໄດ້ຮັບການເສີມຂະຫຍາຍຍິ່ງໆຂຶ້ນ.
ໃນວັນທີ 5 ກັນຍາ 2022, ທີ່ ກະຊວງການຕ່າງປະເທດລາວ ໄດ້ມີກອງປະຊຸມປຶກສາຫາລືສອງຝ່າຍ ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສ. ກູບາ ຄັ້ງທີ I ໄລຍະການຮ່ວມມື 2022-2025, ໂດຍການເປັນປະທານຮ່ວມຂອງ ສະຫາຍ ບຸນເຫຼືອ ພັນດານຸວົງ, ຮອງລັດຖະມົນຕີຕ່າງປະເທດ ແຫ່ງ ສປປ ລາວ ແລະ ສະຫາຍ ເຮຣາຣໂດ ເປຫຍາເວນຣ ໂປຣຕານ, ຮອງລັດຖະມົນຕີຕ່າງປະເທດ ແຫ່ງ ສ.ກູບາ. ໃນໂອກາດດັ່ງກ່າວນີ້, ສະຫາຍ ຮອງລັດຖະມົນຕີ ບຸນເຫຼືອ ພັນດານຸວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຄັ້ງນີ້ ຂອງສະຫາຍ ເຮຣາຣໂດ ເປຫຍາເວນຣ ໂປຣຕານ ພ້ອມດ້ວຍຄະນະ, ເຊິ່ງເປັນການປະກອບສ່ວນອັນສຳຄັນເຂົ້າໃນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີ ຖານອ້າຍນ້ອງຮ່ວມອຸດົມການສັງຄົມນິຍົມ ທີ່ມີມູນເຊື້ອມາຍາວນານ ໄດ້ຮັບການເສີມຂະຫຍາຍຂຶ້ນສູ່ບາດກ້າວອັນໃຫມ່.
ກອງປະຊຸມປຶກສາຫາລື ໃນຄັ້ງນີ້ ຖືເປັນນິມິດໝາຍອັນສຳຄັນສຳລັບສອງຝ່າຍ ໃນການສືບຕໍ່ຮັດແໜ້ນ ແລະ ຊຸກຍຸ້ສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງຊາດ ລາວ-ກູບາ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ກູບາ ພາຍຫລັງທີ່ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 04 ພະຈິກ 1974 ເປັນຕົ້ນມາ, ສອງຝ່າຍ ໄດ້ມີການແລກປ່ຽນການຢ້ຽມຢາມຂອງຄະນະຜູ້ແທນໃນລະດັບຕ່າງໆ ທັງສາຍພັກ ແລະ ສາຍລັດ ເປັນແຕ່ລະໄລຍະ, ມີການພົວພັນຮ່ວມມື ແລະ ຈັດຕັ້ງປະຕິບັດບັນດາໂຄງການໃນຫຼາຍຂະແໜງ ການເປັນຕົ້ນແມ່ນ ດ້ານສາທາລະນະສຸກ, ການສຶກສາ-ກິລາ, ເສດຖະກິດ-ການຄ້າ, ວັດທະນະທຳ ແລະ ອື່ນໆ.ພ້ອມນີ້, ສອງຝ່າຍ ໄດ້ຮ່ວມກັນສະຫຼຸບຕີລາຄາ ແລະ ທົບທວນຄືນການພົວພັນຮ່ວມມືໃນໄລຍະຜ່ານມາ, ຖອດຖອນບົດຮຽນ, ປັບປຸງບັນຫາຂໍ້ຄົງຄ້າງ ແລະ ວາງທິດທາງແຜນການຮ່ວມມືກັນໃນຕໍ່ໜ້າ ເພື່ອສົ່ງເສີມການພົວພັນຮ່ວມມືໃຫ້ກວ້າງຂວາງ, ເລິກເຊິ່ງ ແລະ ມີຫມາກຜົນຍິ່ງຂຶ້ນ ເວົ້າລວມ, ເວົ້າສະເພາະ ກໍຄື ຊຸກຍູ້ໃຫ້ມີການປະສານສົມທົບກັນຢ່າງແໜ້ນແຟ້ນ ລະຫວ່າງ ສອງກະຊວງການຕ່າງປະເທດ ລາວ-ກູບາ ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ການພົວພັນຮ່ວມມືສອງຝ່າຍ ໂດຍສະເພາະ ການພົວພັນຮ່ວມມື ລະຫວ່າງ ບັນດາຂະແໜງການຕ່າງໆຂອງສອງຝ່າຍໃຫ້ມີປະສິດທິຜົນຍິ່ງຂຶ້ນ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ ລາວ-ກູບາ, ທັງສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນຂອບການຮ່ວມມືສອງຝ່າຍ, ຫຼາຍຝ່າຍ, ໃນເວທີພາກພື້ນ ແລະ ສາກົນ. ນອກຈາກນີ້, ສອງຝ່າຍ ຍັງໄດ້ແຈ້ງໃຫ້ກັນຊາບ ກ່ຽວກັບ ສະພາບການພັດທະນາເສດຖະກິດ-ສັງຄົມ ພາຍໃນຂອງແຕ່ລະປະເທດ ແລະ ແລກປ່ຽນຄໍາຄິດເຫັນ ກ່ຽວກັບ ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.
ພາຍຫຼັງສຳເລັດກອງປະຊຸມປຶກສາຫາລື, ສະຫາຍ ຮອງລັດຖະມົນຕີ ບຸນເຫຼືອ ພັນດານຸວົງ ແລະ ສະຫາຍຮອງລັດຖະມົນຕີ ເຮຣາຣໂດ ເປຫຍາເວນຣ ໂປຣຕານ ກໍ່ໄດ້ເຂົ້າຮ່ວມພິທີລົງນາມສັນຍາ ວ່າດ້ວຍ ແຜນການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ສ.ກູບາ ສຳລັບ ປີ 2022-2025.
ໃນວັນດຽວກັນ, ສະຫາຍ ຮອງລັດຖະມົນຕີ ເຮຣາຣໂດ ເປຫຍາເວນຣ ໂປຣຕານ ພ້ອມດ້ວຍຄະນະ ກໍ່ໄດ້ເຂົ້າຢ້ຽມຂ່ຳນັບ ສະຫາຍ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ແລະ ເຂົ້າຢ້ຽມຂ່ຳນັບ ສະຫາຍ ທອງສະຫວັນ ພົມວິຫານ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ. ໃນໂອກາດດັ່ງກ່າວ, ບັນດາການນຳຂອງ ສປປ ລາວ ກໍ່ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນ ກູບາ ທີ່ໄດ້ເດີນທາງມາຢ້ຽມຢາມເຮັດວຽກຢູ່ ສປປ ລາວ ຄັ້ງນີ້, ພ້ອມທັງອວຍພອນໃຫ້ ຄະນະຜູ້ແທນ ກູບາ ຈົ່ງປະສົບຜົນສຳເລັດຕາມລະດັບຄາດໝາຍ.
ນອກຈາກນີ້, ຄະນະຜູ້ແທນ ສ.ກູບາ ຍັງຈະໄດ້ເດີນທາງຢ້ຽມຢາມ ເຂດພັດທະນາກວມລວມໄຊເຊດຖາ, ໂຮງຮຽນມັດທະຍົມສຶກສາ ດົງບັງ ມິດຕະພາບ ລາວ-ກູບາ, ຢ້ຽມຊົມ ຫໍພິພິຕະພັນ ໄກສອນ ພົມວິຫານ ແລະ ບັນດາສະຖານທີ່ທາງປະຫວັດສາດ ແລະ ວັດທະນະທຳ ຂອງ ສປປ ລາວ.