ໃນຕອນເຊົ້າຂອງວັນທີ 26 ເມສາ 2022 ທີ່ ກະຊວງການຕ່າງປະເທດ, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ທັງ​ເປັນ​ຫົວ​ໜ້າ​ເຈົ້າ​ໜ້າ​ທີ່ອາວຸໂສອາຊຽນຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ແບບທາງໄກ ພາຍໃຕ້ການເປັນປະທານຂອງກໍາປູເຈຍ ໃນນາມປະທານອາຊຽນ ປີ 2022.

    ກອງປະຊຸມ ໄດ້ຮັບຊາບຄວາມຄືບໜ້າໃນການຈັດຕັ້ງຜັນຂະຫຍາຍບັນດາບູລິມະສິດ ແລະ ກິດຈະກໍາຕ່າງໆພາຍໃຕ້ການເປັນປະທານອາຊຽນຂອງກໍາປູເຈຍ ປີ 2022 ເປັນຕົ້ນ ການຜັນຂະຫຍາຍຜົນຂອງກອງປະຊຸມລັດຖະ ມົນຕີຕ່າງປະເທດອາຊຽນ ວົງແຄບ ໃນເດືອນ ກຸມພາ 2022 ທີ່ ພະນົມເປັນ. ນອກຈາກນີ້, ກໍໄດ້ປຶກສາຫາລືການສືບຕໍ່ຮ່ວມມືກັບແຕ່ລະຄູ່ເຈລະຈາອາຊຽນ ລວມທັງການກະກຽມການຈັດກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ ກັບບາງຄູ່ເຈລະຈາອາຊຽນ ແລະ ການພິຈາລະນາຂໍ້ສະເໜີຂອງປະເທດຕ່າງໆ ເພື່ອເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ຫຼື TAC.  ພ້ອມກັນນີ້, ກອງປະຊຸມຍັງໄດ້ປຶກ ສາຫາລືການກະກຽມທາງດ້ານເນື້ອໃນ ແລະ ພາລະທິການ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ, ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 25, ກອງປະຊຸມສະພາປະສານງານອາຊຽນ ຄັ້ງທີ 31 ແລະ ບັນດາກອງປະຊຸມອື່ນໆທີ່ກ່ຽວຂ້ອງ ທັງໃນລະດັບເຈົ້າໜ້າທີ່ອາວຸໂສ ແລະ ລະດັບລັດຖະມົນຕີ, ຊຶ່ງຈະຈັດຂຶ້ນໃນທ້າຍເດືອນ ກໍລະກົດ ຫຼື ຕົ້ນເດືອນ ສິງຫາ 2022.

     ໃນຕອນບ່າຍຂອງວັນດຽວກັນ, ຄະນະຜູ້ແທນລາວ ກໍໄດ້ສືບຕໍ່ເຂົ້າຮ່ວມກອງປະຊຸມໜ່ວຍງານວິຊາການຂອງສະພາປະສານງານອາຊຽນ ຄັ້ງທີ 12 ກ່ຽວກັບການສະໝັກເປັນສະມາຊິກອາຊຽນ ຂອງຕີມໍແລັດສະເຕ, ຊຶ່ງກອງປະຊຸມ ໄດ້ຮັບຊາບຄວາມຄືບໜ້າໃນການກະກຽມໄປຢ້ຽມຢາມ ແລະ ພົບປະ-ເຮັດວຽກ ກັບຂະແໜງການກ່ຽວ ຂ້ອງຂອງຕີມໍແລັດສະເຕ ຂອງໜ່ວຍງານສັງລວມຂໍ້ມູນຂອງເສົາຄໍ້າປະຊາຄົມເສດຖະກິດອາຊຽນ ແລະ ເສົາຄໍ້າປະຊາຄົມວັດທະນະທຳ-ສັງຄົມອາຊຽນ. ພ້ອມກັນນັ້ນ, ກອງປະຊຸມກໍໄດ້ຮັບຊາບຄວາມຄືບໜ້າ ແລະ ປືກສາຫາລື ກ່ຽວກັບບັນດາກິດຈະກຳສ້າງຂີດຄວາມສາມາດ ພາຍໃຕ້ສາມເສົາຄໍ້າປະຊາຄົມອາຊຽນ ເພື່ອໃຫ້ພະນັກງານກ່ຽວຂ້ອງຂອງ ຕີມໍແລັດສະເຕ ເຂົ້າຮ່ວມ.

---------------------------