ໃນວັນທີ 20 ເມສາ 2022 ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້​ນຳພາຄະນະຜູ້ແທນລາວ ຊຶ່ງປະກອບມີຫົວໜ້າເຈົ້າໜ້າທີ່ອາວຸໂສເສດຖະກິດອາຊຽນ ແລະ ຫົວໜ້າເຈົ້າໜ້າທີ່ອາວຸໂສວັດທະນະທໍາ-ສັງຄົມອາຊຽນ ເຂົ້າຮ່ວມກອງປະຊຸມປຶກສາຫາລືຮ່ວມເຈົ້າໜ້າທີ່ອາວຸໂສສາມເສົາຄໍ້າປະຊາຄົມອາຊຽນ  ແບບທາງໄກ ພາຍໃຕ້ການເປັນປະທານຂອງກໍາປູເຈຍ ໃນຖານະປະທານອາຊຽນ ສົກປີ 2022 ແລະ ມີການເຂົ້າຮ່ວມຂອງບັນດາເຈົ້າໜ້າທີ່ອາວຸໂສສາມເສົາຄໍ້າປະຊາຄົມອາຊຽນປະເທດອາຊຽນອື່ນ ແລະ ບັນດາຮອງເລຂາທິການໃຫຍ່ອາຊຽນ ຢ່າງພ້ອມພຽງ.

          ​ກອງປະຊຸມ ໄດ້ຮັບຊາບຄວາມຄືບໜ້າໃນການຈັດຕັ້ງຜັນຂະຫຍາຍບັນດາບູລິມະສິດ ແລະ ກິດຈະກໍາຕ່າງໆພາຍໃຕ້ການເປັນປະທານອາຊຽນຂອງກໍາປູເຈຍ ສົກປີ 2022; ໄດ້ຮັບຊາບຄວາມຄືບໜ້າໃນການຮ່າງວິໄສທັດປະຊາຄົມອາຊຽນ ຫຼັງປີ 2025, ຊຶ່ງໄດ້ຈັດກອງປະຊຸມຄັ້ງທີ 1 ໃນວັນທີ 31 ມີນາ - 1 ເມສາ 2022 ທີ່ສໍານັກງານກອງເລຂາອາຊຽນ, ຈາກາກຕາ, ອິນໂດເນເຊຍ ແລະ ການຮ່າງວິໄສທັດດັ່ງກ່າວແມ່ນຈະດໍາເນີນໄປຈົນເຖິງປີ 2025 ຈຶ່ງຈະສໍາເລັດ; ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດບັນດາຂໍ້ລິເລີ່ມອາຊຽນເພື່ອຮັບມືກັບພະຍາດໂຄວິດ-19; ໄດ້ຮັບຊາບການປະສານງານ ແລະ ບັນຫາທັບຊ້ອນຂ້າມເສົາຄໍ້າ ແລະ ບັນຫາອື່ນໆ. ພ້ອມກັນນັ້ນ, ກອງປະຊຸມກໍໄດ້ປຶກສາຫາລືການກະກຽມດ້ານເນື້ອໃນ ແລະ ພາລະທິການ ໃຫ້ແກ່ກອງປະຊຸມສະພາປະສານງານອາຊຽນ ຄັ້ງທີ 31 ຊຶ່ງຈະຈັດຂຶ້ນໃນເດືອນພຶດສະພາ 2022.