ນະຄອນຫຼວງວຽງຈັນ, ວັນທີ     ທັນວາ 2021

ພະບາດສົມເດັດພະວະຊິຣະເກົ້າເຈົ້າຢູ່ຫົວ ແຫ່ງ ຣາຊະອານາຈັກໄທ

ທີ່ ບາງກອກ

ພະບາດສົມເດັດ,

          ເນື່ອງໃນໂອກາດວັນຄ້າຍວັນສະເຫຼີມພະຊົນມະພັນສາ ຂອງ ພະບາດສົມເດັດພະບໍຣົມຊະນະກາທິເບດ   ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດ, ວັນຊາດ ແລະ ວັນພໍ່ແຫ່ງຊາດ ແຫ່ງ ຣາຊະອານາຈັກໄທ, ໃນນາມປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າ ຂໍຖືເປັນກຽດຢ່າງສູງ ຖວາຍຄວາມຊົມເຊີຍອັນຈິງໃຈ ແລະ ຄຳອວຍພອນໄຊອັນປະເສີດ ມາຍັງ ພະອົງ, ພະລາຊີນີ ແລະ ພະບໍຣົມວົງສານຸວົງທຸກພະອົງ.

ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືໃນຖານະປະເທດເພື່ອນບ້ານໃກ້ຄຽງທີ່ດີ ລະຫວ່າງສອງປະເທດ ລາວ ແລະ ໄທ ໃນໄລຍະຜ່ານມາ ໄດ້ມີບາດກ້າວຂະຫຍາຍ ຕົວອັນໃໝ່ໃນຫຼາຍດ້ານ. ຂ້າພະເຈົ້າ ຫວັງເປັນຢ່າງຍິ່ງວ່າ ດ້ວຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອທີ່ດີງາມດັ່ງກ່າວ ຈະສືບຕໍ່ໄດ້ຮັບການພັດທະນາ ແລະ ເສີມຂະຫຍາຍຢ່າງບໍ່ຢຸດຢັ້ງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ໄທ ນັບມື້ນັບເພີ່ມຂຶ້ນ.

ຂ້າພະເຈົ້າ ເຊື່ອໝັ້ນຢ່າງຍິ່ງວ່າ ພາຍໃຕ້ພະບໍຣົມໂພທິສົມພານຂອງພະອົງ, ຣາຊະອານາຈັກໄທ ຈະສືບຕໍ່ມີຄວາມຮົ່ມເຢັນເປັນສຸກ, ຈະເລີນຮຸ່ງເຮືອງ ແລະ ມີຄວາມວັດທະນະຖາວອນຢ່າງບໍ່ຢຸດຢັ້ງ ແລະ ຂໍຖວາຍພອນໄຊອັນປະເສີດແດ່ ພະອົງ ຈົ່ງມີພະລານາໄມສົມບູນ, ມີຄວາມຜາສຸກ ແລະ ອາຍຸຍິ່ງຍືນຍາວນານ ເປັນຮົ່ມໂພຮົ່ມໄຊ ໃຫ້ແກ່ປະຊາຊົນຊາວໄທທຸກຖ້ວນໜ້າຕະຫຼອດໄປ ກໍ່ຄືເພື່ອຄວາມຈະເລີນງອກງາມຂອງສາຍພົວພັນມິດຕະພາບສອງຊາດ ລາວ-ໄທ.

          ດ້ວຍຄວາມນັບຖືຢ່າງສູງ.

ທອງລຸນ ສີສຸລິດ

ປະທານປະເທດ

         ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ,

          ເນື່ອງໃນໂອກາດ ອັນສະຫງ່າລາສີ ແຫ່ງ ວັນຄ້າຍວັນສະເຫຼີມພະຊົນມະພັນສາຂອງ ພະບາດສົມເດັດ     ພະບໍຣົມຊະນະກາທິເບດ ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດ, ວັນຊາດ ແລະ ວັນພໍ່ ແຫ່ງຊາດ ແຫ່ງ ຣາຊະອານາຈັກໄທ, ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄໍາຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງພະນະທ່ານ ແລະ ໂດຍຜ່ານ ພະນະທ່ານ ໄປຍັງ ລັດຖະບານ ແລະ ປະຊາຊົນໄທ ທຸກຖ້ວນໜ້າ.

ຂ້າພະເຈົ້າ ມີຄວາມພາກພູມໃຈ ແລະ ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສອງປະເທດລາວ ແລະ ໄທ ທີ່ໄດ້ຮັບການເສີມຂະຫຍາຍໃຫ້ດີຂຶ້ນເປັນກ້າວໆ ແລະ ຢ່າງຕໍ່ເນື່ອງ ນັບແຕ່ຂັ້ນສູນກາງຮອດຂັ້ນທ້ອງຖິ່ນ ແລະ ເຫັນຄວນສືບຕໍ່ເພີ່ມທະວີ ແລະ ຮັດແໜ້ນໃນການສ້າງປັດໃຈການເຊື່ອມໂຍງ, ການເຊື່ອມຈອດໃຫ້ມີຄວາມໂລ່ງລ່ຽນ ເພື່ອອໍານວຍໃຫ້ແກ່ການຟື້ນຟູເສດຖະກິດພາຍຫຼັງສະພາບການແຜ່ລະບາດ ໂຄວິດ-19 ມີຄວາມຜ່ອນຄາຍລົງ ເພື່ອພ້ອມກັນພັດທະນາປະເທດໃຫ້ມີຄວາມຮັ່ງມີເຂັ້ມແຂງ ບົນພື້ນຖານຄວາມເຂົ້າອົກເຂົ້າໃຈ ຊ່ວຍເຫຼືອເຊິ່ງກັນ ແລະ ກັນ ຖານເພື່ອນບ້ານໃກ້ເຮືອນຄຽງທີ່ດີ ກໍ່ຄືຄອບຄົວອາຊຽນດ້ວຍກັນ ເພື່ອ ນໍາເອົາຜົນປະໂຫຍດຕົວຈິງອັນສູງສຸດມາສູ່ປະຊາຊົນສອງຊາດພວກເຮົາ ແລະ ທັງເປັນການປະກອບສ່ວນອັນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຢູ່ໃນພາກພື້ນ ແລະ ໃນໂລກ.

          ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໃຫ້ ພະນະທ່ານ ພ້ອມດ້ວຍຄອບຄົວ ແລະ ປະຊາຊົນໄທທຸກຖ້ວນໜ້າ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດ ໃນໜ້າທີ່ອັນມີກຽດຂອງພະນະທ່ານ.

          ດ້ວຍຄວາມນັບຖືຢ່າງສູງ.

                                                                                   ພັນຄໍາ ວິພາວັນ

                                                                                 ນາຍົກລັດຖະມົນຕີ

                                                              ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ ພົນເອກ ປຣະຢຸດ ຈັນໂອຊາ

ນາຍົກລັດຖະມົນຕີ ແຫ່ງ ຣາຊະອານາຈັກໄທ

ທີ່ ບາງກອກ

ພະນະທ່ານ,

          ຂ້າພະເຈົ້າ ຂໍຖືເປັນກຽດຢ່າງສູງ ສົ່ງຄຳອວຍພອນໄຊອັນປະເສີດມາຍັງ ພະນະທ່ານ ແລະ ຜ່ານພະນະທ່ານ ໄປຍັງພະນັກງານກະຊວງການຕ່າງປະເທດ ແຫ່ງ ຣາຊະອານາຈັກໄທ ທຸກຖ້ວນໜ້າ, ເນື່ອງໃນໂອກາດວັນຄ້າຍ ວັນສະເຫຼີມພະຊົນມະພັນສາ ຂອງ ພະບາດສົມເດັດພະບໍຣົມຊະນະກາທິເບດ ມະຫາພູມິພົນອະດຸນຍະເດດມະຫາຣາດ ບໍຣົມມະນາດບໍພິດ, ວັນຊາດ ແລະ ວັນພໍ່ແຫ່ງຊາດ ແຫ່ງ ຣາຊະອານາຈັກໄທ.

          ຂ້າພະເຈົ້າ ມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກໄທ ກໍ່ຄືສອງກະຊວງການຕ່າງປະ ເທດ ລາວ-ໄທ ໄດ້ມີບາດກ້າວຂະຫຍາຍຕົວຂຶ້ນຢ່າງຕໍ່ເນື່ອງໃນຊຸມປີຜ່ານມາ. ເຖິງວ່າຈະມີສະພາບການແຜ່ລະບາດຂອງພະຍາດ ໂຄວິດ-19 ກໍ່ຕາມ, ແຕ່ພວກເຮົາກໍ່ໄດ້ມີການພົບປະກັນ ໂດຍຜ່ານຮູບແບບທາງໄກ ແລະ ແບບເຊິ່ງໜ້າ. ໃນປີ 2021 ນີ້ ພວກເຮົາສາມາດຈັດກອງປະຊຸມຄະນະກໍາມາທິການຮ່ວມ ວ່າດ້ວຍການຮ່ວມມື ລາວ-ໄທ, ໄທ-ລາວ ຄັ້ງທີ 22 ແລະ ກອງປະຊຸມຄະນະກໍາມາທິການຊາຍແດນຮ່ວມ ລາວ-ໄທ, ໄທ-ລາວ ແບບບໍ່ເປັນທາງການ ດ້ວຍຜົນສໍາເລັດຢ່າງຈົບງາມ ແລະ ສອງຝ່າຍຈະໄດ້ຮ່ວມມືກັນຈັດຕັ້ງຜັນຂະຫຍາຍຜົນຂອງກອງຊຸມດັ່ງກ່າວໃຫ້ເປັນຮູບປະທໍາ ເພື່ອນໍາເອົາຜົນປະໂຫຍດຕົວຈິງ ແລະ ຄວາມຈະເລີນວັດທະນາມາສູ່ປະຊາຊົນສອງຊາດ ລາວ ແລະ ໄທ ທັງເປັນການປະກອບສ່ວນອັນສໍາຄັນເຂົ້າໃນການສືບຕໍ່ສ້າງພື້ນຖານອັນໜັກແໜ້ນຍິ່ງຂຶ້ນ ເພື່ອກ້າວໄປສູ່ການຍົກລະ ດັບການພົວພັນຮ່ວມມື ໃຫ້ເປັນ “ຄູ່ຮ່ວມມືຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ” ໃນອະນາຄົດ ກໍ່ຄືການປະກອບສ່ວນເຂົ້າໃນການສ້າງຄວາມເຂັ້ມແຂງໃຫ້ແກ່ຄອບຄົວອາຊຽນຂອງພວກເຮົາ.

          ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໃຫ້ພະນະທ່ານ ພ້ອມດ້ວຍພະນັກງານກະຊວງການຕ່າງປະເທດ ແຫ່ງ ຣາຊະອານາຈັກໄທ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງຕົນ.

          ດ້ວຍຄວາມນັບຖືຢ່າງສູງ.

                                                                          ສະເຫຼີມໄຊ ກົມມະສິດ

                                                                     ລັດຖະມົນຕີກະຊວງການຕ່າງປະເທດ

                                                               ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ                                                     

ພະນະທ່ານ ດອນ ປຣະມັດວິໄນ

ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ

ແຫ່ງ ຣາຊະອານາຈັກໄທ

ທີ່ ບາງກອກ