ໃນຕອນເຊົ້າຂອງວັນທີ 22 ກຸມພາ 2024, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ,          ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນ. ອາລີ ວົງໜໍ່ບຸນທຳ, ກຳມະການສູນກາງພັກ, ເລຂາຄະນະບໍລິຫານງານພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມດ້ວຍຄະນະ, ໃນໂອກາດທີ່ມາພົບປະເຮັດວຽກກັບການນຳກະຊວງການຕ່າງປະເທດ ແລະ ຄະນະບໍລິຫານງານສະຫະພັນແມ່ຍິງກະຊວງການຕ່າງປະເທດ.

ໃນວັນດຽວກັນ, ຄະນະປະທານສູນກາງສະຫະພັນແມ່ຍິງລາວ ໄດ້ພົບປະເຮດວຽກກັບ ທ່ານ ຕິ່ງ ສຸກສັນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງການຕ່າງປະເທດ ໂດຍມີທ່ານ ໄມທອງ ທຳມະວົງສາ, ກຳມະການຄະນະພັກກະຊວງ, ຫົວໜ້າກົມຈັດຕັ້ງ-ພະນັກງານ ແລະ ທ່ານ ນ. ໄກມະນີ ອໍລະບູນ, ກຳມະການຄະນະພັກກະຊວງ, ປະທານສະຫະພັນແມ່ຍິງກະຊວງ, ຫົວໜ້າກົມກວດກາ  ກໍໄດ້ເຂົ້າຮ່ວມພົບປະ. ຫຼັງຈາກນັ້ນ, ທ່ານ ນ. ອາລີ ວົງໜໍ່ບຸນທຳ ພ້ອມດ້ວຍຄະນະ ກໍໄດ້ສືບຕໍ່ເຮັດວຽກສະເພາະກັບ ຄະນະບໍລິຫານງານສະຫະພັນແມ່ຍິງກະຊວງການຕ່າງປະເທດ.

ຈຸດປະສົງຂອງການພົບປະເຮັດວຽກໃນຄັ້ງນີ້, ແມ່ນເພື່ອຕິດຕາມ, ຊຸກຍູ້ວຽກງານການສ້າງພະນັກງານນຳພາ-ຄຸ້ມຄອງເພດຍິງ ແລະ ການກະກຽມກອງປະຊຸມໃຫຍ່ຂອງສະຫະພັນແມ່ຍິງ ຕິດພັນກັບການກະກຽມດຳເນີນກອງປະຊຸມໃຫຍ່ 03 ຂັ້ນ ຂອງພັກ. ໃນໂອກາດນີ້, ກະຊວງການຕ່າງປະເທດ ໄດ້ແຈ້ງໃຫ້ຊາບກ່ຽວກັບ ແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ແລະ ຂັ້ນກະຊວງຄຸ້ມຄອງ ທີ່ ຕິດພັນກັບເພດຍິງ; ການບຳລຸງ-ກໍ່ສ້າງ ແລະ ບັນຈຸ, ສັບຊ້ອນພະນັກງານ ນຳພາ-ຄຸ້ມຄອງເພດຍິງ ຂອງກະຊວງ ໃນໄລຍະຜ່ານມາ ແລະ ແຜນການໃນຕໍ່ໜ້າ; ແຜນຄາດຄະເນເປົ້າໝາຍຄະນະປະທານສະຫະພັນແມ່ຍິງກະຊວງ, ລວມເຖິງລາຍງານການເຄື່ອນໄຫວວຽກງານຮອບ ດ້ານ ຂອງສະຫະພັນແມ່ຍິງກະຊວງການຕ່າງປະເທດ ໃນໄລຍະຜ່ານມາ ແລະ ການກະກຽມດຳເນີນກອງປະຊຸມໃຫຍ່ ຂອງສະຫະພັນແມ່ຍິງກະຊວງ.

ການພົບປະເຮັດວຽກໃນຄັ້ງນີ້ ໄດ້ດໍາເນີນໄປດ້ວຍບັນຍາກາດທີ່ເປັນກັນເອງ ແລະ ໄດ້ມີການປຶກສາຫາລືແລກປ່ຽນຄໍາຄິດຄຳເຫັນໃນການປະຕິບັດວຽກງານດ້ານຕ່າງໆ ຢ່າງກົງໄປກົງມາ ແລະ ສໍາເລັດຜົນຕາມຄາດໝາຍ.

-------------------------------------