ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 – 20 ກໍລະກົດ 2023) ທີ່ໄດ້ໝູນວຽນມາເຖິງ, ສະຫະພັນແມ່ຍິງ ກະຊວງການຕ່າງປະເທດ ໄດ້ພ້ອມກັນຈັດກິດຈະກຳຕ່າງໆ ເພື່ອເປັນການສະເຫຼີມສະຫຼອງວັນສຳຄັນດັ່ງກ່າວ ດັ່ງນີ້:

• ໃນວັນທີ 28 ກໍລະກົດ 2023, ສະຫະພັນແມ່ຍິງກະຊວງການຕ່າງປະເທດ ໄດ້ຈັດງານຂາຍອາຫານ ແລະ ເຄື່ອງດື່ມ ຂຶ້ນ ທີ່ ກະຊວງການຕ່າງປະເທດ ໂດຍເປັນກຽດເຂົ້າຮ່ວມງານຂອງທ່ານ ນາງ ອາລຸນີ ກົມມະສິດ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ພັນລະຍາທ່ານຮອງນາຍົົກລັດຖະມົນຕີ, ລັດຖະມົນຕີກະຊວງການຕ່າງປະເທດ; ມີບັນດາພັນລະຍາຄະນະນຳກະຊວງ, ພະນັກງານບຳນານເພດຍິງ, ອົງການຈັດຕັ້ງກຳມະບານ, ຊາວໜູ່ມ, ຄະນະກົມພາຍໃນກະຊວງ, ບັນດາເອື້ອຍນ້ອງແມ່ຍິງ ແລະ ອ້າຍນ້ອງຊາຍ ພາຍໃນກະຊວງ ແລະ ຕາງໜ້າແມ່ຍິງກະຊວງອ້ອມຂ້າງເຂົ້າຮ່ວມຫຼາຍກວ່າ 200 ຄົນ. ງານຂາຍອາຫານ ແລະ ເຄື່ອງດື່ມ ຄັ້ງນີ້ ແມ່ນການປະກອບສ່ວນຂອງບັນດາໜ່ວຍແມ່ຍິງໃນກະຊວງການຕ່າງປະເທດ ຊຶ່ງມີປະເພດ ອາຫານ, ເຄື່ອງດື່ມ ແລະ ເຄື່ອງຫັດຖະກຳ ຈຳນວນນຶ່ງ ເພື່ອຫາລາຍໄດ້ສົມທົບທຶນເຂົ້າໃນໜ່ວຍແມ່ຍິງຂອງຕົນ. ໃນພິທີເປີດງານ, ຍັງໄດ້ມີການມອບຂອງຂວັນ ໃຫ້ແກ່ພະນັກງານບຳນານເພດຍິງ ເພື່ອສະແດງຄວາຮູ້ບຸນຄຸນ ຕໍ່ຜົນງານທີ່ພວກເພິ່ນໄດ້ສ້າງໄວ້ໃນໄລຍະທີ່ຜ່ານມາ.

• ພ້ອມນ້ັ້ນ, ຄະນະບໍລິຫານງານສະຫະພັນແມ່ຍິງກະຊວງການຕ່າງປະເທດ ຍັງໄດ້ນຳພາເອື້ອຍນ້ອງແມ່ຍິງເຄື່ອນໄຫວຢ້ຽມຢາມ ແລະ ແລກປ່ຽນບົດຮຽນ ກັບສູນໃຫ້ຄຳປຶກສາ ແລະ ປົກປ້ອງແມ່ຍິງ ຊຶ່ງຈັດຂຶ້ນໃນວັນທີ 21 ກໍລະກົດ 2023 ຜ່ານມາ ນຳໂດຍ ທ່ານ ນາງ ຂັນມາລາ ພັນດານຸວົງ, ຮອງປະທານສະຫະພັນແມ່ຍິງກະຊວງການຕ່າງປະເທດ ແລະ ມີບັນດາຄະນະບໍລິຫານງານສະຫະພັນແມ່ຍິງ ແລະ ຕາງໜ້າສະມາຊິກແມ່ຍິງແຕ່ລະກົມພາຍໃນກະຊວງເຂົ້າຮ່ວມຢ່າງພ້ອມພຽງ.  ໃນໂອກາດດັ່ງກ່າວ, ໄດ້ມີການປຶກສາຫາລື ແລະ ແລກປ່ຽນບົດຮຽນ ກ່ຽວກັບກົດໝາຍວ່າດ້ວຍການຕ້ານການຄ້າມະນຸດ ຊຶ່ງນຳສະເໜີໂດຍ ແມ່ຍິງກະຊວງການຕ່າງປະເທດ ແລະ ການແລກປ່ຽນຂໍ້ມູນຂ່າວສານ ກ່ຽວກັບ ພາລະບົດບາດ ແລະ ການຊ່ວຍເຫຼືອແມ່ຍິງ ແລະ ເດັກນ້ອຍຂອງສູນໃຫ້ຄຳປຶກສາດັ່ງກ່າວ. ສູນໃຫ້ຄຳປຶກສາປົກປ້ອງແມ່ຍິງ ແລະ ເດັກນ້ອຍ ນອກຈາກເຮັດໜ້າທີ່ໃນການຊ່ວຍເຫລືອແມ່ຍິງ ແລະ ເດັກນ້ອຍຜູ້ທີ່ຖືກເຄາະຮ້າຍ ແລ້ວ, ທາງສູນຍັງໄດ້ເອົາໃຈໃສ່ໃນການເຜີຍແຜ່ຄວາມຮູ້ ກ່ຽວກັບສິດຂອງແມ່ຍິງຕໍ່ກຽດສັກສີ ແລະ ການປົກປ້ອງຈາກຮູບແບບຄວາມຮຸນແຮງ ແລະ ການຈຳແນກທຸກຮູບແບບ ໃຫ້ແກ່ແມ່ຍິງພາກສ່ວນຕ່າງໆໄດ້ເຂົ້າໃຈ. 

• ນອກຈາກ 2 ກິດຈະກຳຂ້າງເທິງນັ້ນ, ຄະນະບໍລິຫານງານສະຫະພັນແມ່ຍິງກະຊວງ ຍັງໄດ້ໄປຢ້ຽມຢາມ ແລະ ອວຍພອນພະນັກງານອາວຸໂສບໍານານເພດຍິງຂອງກະຊວງການຕ່າງປະເທດຈຳນວນໜຶ່ງ, ເພື່ອສະແດງຄວາມເປັນຫ່ວງເປັນໄຍ, ເພື່ອສ້າງຄວາມຮັກແພງ ແລະ ທັງເປັນກຳລັງໃຈໃຫ້ແກ່ພະນັກງານບຳນານ.