ໃນວັນທີ 23 ມິຖຸນາ 2023, ທີ່ ກະຊວງອຸດສາຫະກຳ ແລະ ການຄ້າ, ໄດ້ມີກອງປະຊຸມພົບປະແລກປ່ຽນບົດຮຽນ ການເຄື່ອນໄຫວວຽກງານຊາວໜຸ່ມ ແລະ ວິຊາສະເພາະ ລະຫວ່າງ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງອຸດສະຫະກຳ ແລະ ການຄ້າ ແລະ ກະຊວງການຕ່າງປະເທດ ໂດຍການເປັນປະທານຮ່ວມຂອງ ສະຫາຍ ມະໄລທອງ ກົມມະສິດ, ກຳມະການສຳຮອງສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງ ອຸດສະຫະກຳ ແລະ ການຄ້າ; ສະຫາຍ ມອນໄຊ ລາວມົວຊົ່ງ, ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ; ແລະ ສະຫາຍ ທອງຜ່ານ ສະຫວັນເພັດ, ຄະນະປະຈຳພັກ, ຮອງລັດຖະມົນຕີກະຊວງການຕ່າງປະເທດ; ມີບັນດາຄະນະບໍລິຫານງານຊາວຫນຸ່ມ ແລະ ສະມາຊິກຊາວຫນຸ່ມຂອງກະຊວງອຸດສາຫະກຳ ແລະ ການຄ້າ ແລະ ກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນກອງປະຊຸມຄັ້ງນີ້, ຊາວຫນຸ່ມຂອງສອງກະຊວງ ໄດ້ຮັບຟັງການແລກປ່ຽນບົດຮຽນນຳກັນ ໂດຍມີຜູ້ຕາງຫນ້າຈາກຄະນະບໍລິຫານງານຊາວຫນຸ່ມຂອງສອງກະຊວງ ຂຶ້ນລາຍງານຫຍໍ້ ກ່ຽວກັບ ວຽກງານຊາວຫນຸ່ມ ແລະ ວຽກງານວິຊາສະເພາະທີ່ກ່ຽວຂ້ອງກັບສອງຂະແຫນງການ ເຊັ່ນ: ການເຄື່ອນໄຫວວຽກງານຊາວຫນຸ່ມ, ການຈັດຕັ້ງປະຕິບັດວຽກງານ 4 ບຸກ, ການອຳນວຍຄວາມສະດວກທາງດ້ານການຄ້າ ແລະ ສິ່ງທ້າທາຍຂອງສະພາບເສດຖະກິດຫຼັງ ໂຄວິດ-19 ຢູ່ ສປປ ລາວ.
ພ້ອມດຽວກັນນີ້, ສະມາຊິກຊາວຫນຸ່ມຂອງສອງກະຊວງ ຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກຄະນະປະທານ, ໂດຍຄະນະປະທານໄດ້ສະແດງຄວາມຊົມເຊີຍຕໍ່ຄະນະບໍລິຫານງານຊາວຫນຸ່ມຂອງສອງກະຊວງ ທີ່ໄດ້ຈັດກອງປະຊຸມພົບປະແລກປ່ຽນບົດຮຽນໃນຄັ້ງນີ້, ເຊິ່ງເຫັນວ່າມີຄວາມຫມາຍຄວາມສຳຄັນ ແລະ ເປັນໂອກາດທີ່ດີ ສຳລັບ ສະມາຊິກຊາວຫນຸ່ມຂອງສອງພາກສ່ວນ ໃນການຖອດຖອນບົດຮຽນນຳກັນ ໃນວຽກງານຊາວຫນຸ່ມ ກໍຄື ວຽກງານວິຊາສະເພາະ ທີ່ເປັນປະໂຫຍດ ໃຫ້ແກ່ສະມາຊິກຊາວຫນຸ່ມ. ໃນໂອກາດນີ້, ຄະນະປະທານ ຍັງໄດ້ເນັ້ນໃຫ້ສະມາຊິກຊາວຫນຸ່ມທຸກສະຫາຍ ຕ້ອງເພີ່ມທະວີຄວາມຫນັກແຫນ້ນທາງດ້ານການເມືອງ ໃນທ່າມກາງສະພາບການທີ່ມີຄວາມຫຍຸ້ງຍາກໃນໄລຍະນີ້ ແລະ ຕັ້ງຫນ້າປະຕິບັດຫນ້າທີ່ວຽກງານຂອງຕົນ ໃຫ້ປະສົບຜົນສຳເລັດຕາມການມອບຫມາຍຂອງການຈັດຕັ້ງຕົນ.
ໃນຕອນແລງຂອງວັນດຽວກັນ, ສະມາຊິກຊາວຫນຸ່ມຂອງສອງກະຊວງ ຍັງໄດ້ຈັດການແຂ່ງຂັນກິລາບານເຕະມິດຕະພາບຂຶ້ນ ເພື່ອສ້າງຄວາມສາມັກຄີຮັກແພງເຊິ່ງກັນ ແລະ ກັນ ລະຫວ່າງ ກະຊວງອຸດສາຫະກຳ ແລະ ການຄ້າ ແລະ ກະຊວງການຕ່າງປະເທດ ໃຫ້ແຫນ້ນແຟ້ນຍິ່ງໆຂຶ້ນ.