ໃນວັນທີ 20 ມິຖຸນາ 2023 ທີ່ ສວນວັດທະນະທໍາຊຽງຄວນ,  ກຸ່ມແມ່ຍິງອາຊຽນ ທີ່ ນະຄອນ ຫຼວງວຽງຈັນ ໄດ້ຈັດກິດຈະກຳຢ້ຽມຢາມສວນວັດທະນະທຳຊຽງຄວນ ແລະ ພົບປະສ້າງສັນລະຫວ່າງ ສະຫະພັນແມ່ຍິງກະຊວງການຕ່າງປະເທດ ແລະ ກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ (ກຍອວ) ໂດຍການເປັນປະທານຂອງ ທ່ານ ນາງ ອາລຸນີ ກົມມະສິດ, ພັນລະຍາທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ປະທານກິດຕິມະສັກກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ    ໂດຍມີບັນດາພັນລະຍາຄະນະນຳກະຊວງການຕ່າງປະເທດ,  ເອກອັກຄະລັດຖະທູດເພດຍິງ ແລະ ບັນດາພັນລະຍາທ່ານທູດ ພ້ອມດ້ວຍສະມາຊິກກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ ເຂົ້າຮ່ວມທັງໝົດປະມານ 30 ກວ່າທ່ານ. ​

ການຈັດກິດຈະກຳໃນຄັ້ງນີ້, ນອກຈາກເພື່ອເປັນການເຜີຍແຜ່ ສະຖານທີ່ທ່ອງທ່ຽວທາງດ້ານວັດທະນະທຳ ກໍຄືສວນວັດທະນະທຳຊຽງຄວນ ທີ່ເປັນມູນມໍລະດົກສືບທອດກັນມາ ເຊິ່ງໄດ້ຖືກຮັບຮອງເປັນມໍລະດົກ​ແຫ່ງ​ຊາດ​ລະດັບ​ທ່ອງ​ຖິ່ນ​ແຫ່ງ​ທໍາ​ອິດ ​ຂອງ​ນະຄອນຫຼວງ​ວຽງ​ຈັນ ​ໃນ​ວັນ​ທີ 22 ທັນວາ 2022 ໃຫ້ບັນດາກຸ່ມ ກຍອວ ໄດ້ຮັບຊາບແລ້ວ, ຍັງເພື່ອເປັນການພົບປະສ້າງສັນ ແລະ ຮັດແໜ້ນຄວາມສາມັກຄີ ລະຫວ່າງ ສະຫະພັນແມ່ຍິງກະຊວງການຕ່າງປະເທດ ແລະ ແມ່ຍິງອາຊຽນ ກໍຄື ກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ (ກຍອວ), ນອກຈາກນັ້ນ, ຍັງຖືເປັນໂອກາດສະແດງຄວາມຊົມເຊີຍສະມາຊິກ ກຍອວ ທີ່ສໍາເລັດການປະຕິບັດໜ້າທີ່ ຢູ່ ສປປ ລາວ ​ແລະ ຈະເດີນທາງກັບຄືນປະເທດຂອງຕົນ, ພ້ອມທັງຕ້ອນຮັບສະມາຊິກ ກຍອວ ທີ່ມາປະຈຳການໃໝ່ ຢູ່ ສປປ ລາວ.

 ກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ  ໄດ້ສ້າງຕັ້ງຂຶ້ນໃນປີ 2017 ໂດຍມີຈຸດປະສົງເພື່ອສົ່ງເສີມຄວາມສາມັກຄີໃນອາຊຽນ ແລະ ເພື່ອສ້າງໃຫ້ມີການແລກປ່ຽນທາງດ້ານວັດທະນະທຳ ລະຫວ່າງສະມາຊິກດ້ວຍກັນ. ສະມາຊິກ ກຍອວ ປະກອບດ້ວຍພັນລະຍາຄະນະນຳກະຊວງການຕ່າງປະເທດຂອງ ສປປ ລາວ, ທຸຕານຸທູດເພດຍິງອາຊຽນ, ພັນລະຍາບັນດາເອກອັກຄະລັດຖະທູດ/ເອກອັກຄະຣາຊະທູດ ອາຊຽນ, ບັນດານັກການທູດຍິງຈາກສະຖານທູດອາຊຽນ ທີ່ ນະຄອນຫຼວງວຽງຈັນ ແລະ ນັກການທູດຍິງຈາກກະຊວງການຕ່າງປະເທດ ສປປ ລາວ, ໂດຍແມ່ນພັນລະຍາລັດຖະມົນຕີກະຊວງການຕ່າງປະເທດເປັນປະທານກິດຕິມະສັກ.