ໃນລະຫວ່າງວັນທີ 17-20 ພຶດສະພາ 2023, ຄະນະສະຫະພັນແມ່ຍິງກະຊວງການຕ່າງປະເທດ ນຳໂດຍ ທ່ານ ນາງ ອາລຸນີ ກົມມະສິດ, ພັນລະຍາຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ສປປ ລາວ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ ແລະ ປະທານກິດຕິມະສັກກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ ພ້ອມດ້ວຍຄະນະບໍລິຫານງານສະຫະພັນແມ່ຍິງກະຊວງການຕ່າງປະເທດ ສປປ ລາວ, ພັນລະຍາຄະນະນຳກະຊວງ ແລະ ຄະນະກົມເພດຍິງ ຈຳນວນໜຶ່ງ ໄດ້ເດີນທາງຢ້ຽມຢາມ ແລະ ເຮັດວຽກຮ່ວມກັບ ສະຫະພັນແມ່ຍິງກະຊວງການຕ່າງປະເທດ ສສ ຫວຽດນາມ ທີ່ ນະຄອນຫຼວງຮ່າໂນ້ຍ, ສສ ຫວຽດນາມ. ການຢ້ຽມຢາມຄັ້ງນີ້ ເປັນການຢ້ຽມຢາມ ແລະ ແລກປ່ຽນປະຈຳປີ ຂອງສະຫະພັນແມ່ຍິງສອງກະຊວງການຕ່າງປະເທດ ສປປ ລາວ ແລະ ສສ ຫວຽດນາມ ເພື່ອຮັດແໜ້ນຄວາມສາມັກຄີ ແລະ ແລກປ່ຽນບົດຮຽນເຊິ່ງກັນ ແລະ ກັນ.
ໃນໂອກາດການຢ້ຽມຢາມຄັ້ງນີ້, ແມ່ຍິງຂອງສອງກະຊວງການຕ່າງປະເທດ ສປປ ລາວ ແລະ ສສ ຫວຽດນາມໄດ້ ມີກອງປະຊຸມພົບປະ ແລະ ແລກປ່ຽນບົດຮຽນຮ່ວມກັນ, ໂດຍໄດ້ແຈ້ງໃຫ້ກັນຊາບ ສະພາບ ແລະ ການເຄື່ອນໄຫວ ຂອງ ສະຫະພັນແມ່ຍິງກະຊວງຂອງຕົນ ໃນໄລຍະຜ່ານມາ, ຄວາມຄືບໜ້າໃນການຈັດຕັ້ງປະຕິບັດແຜນການຮ່ວມມືທີ່ໄດ້ຕົກລົງກັນໃນກອງປະຊຸມພົບປະຄັ້ງຜ່ານມາ (ປີ 2022) ໃນນັ້ນ, ແມ່ນວຽກສ້າງຄວາມເຂັ້ມແຂງແກ່ແມ່ຍິງກະຊວງການຕ່າງປະເທດ ຊຶ່ງ ສະຫະພັນແມ່ຍິງກະຊວງການຕ່າງປະເທດ ຝ່າຍ ສສ ຫວຽດນາມ ໄດ້ເຫັນດີໃຫ້ການສະໜັບສະໜູນການຈັດຝຶກອົບຮົມ 2 ຊຸດແກ່ແມ່ຍິງກະຊວງການຕ່າງປະເທດ ສປປ ລາວ ຊຶ່ງປະຈຸບັນຢູ່ໃນຂັ້ນຕອນການດຳເນີນງານ ແລະ ປະສານສົມທົບຂອງສອງຝ່າຍ. ນອກນັ້ນ, ການພົບປະຄັ້ງນີ້ຍັງໄດ້ປຶກສາຫາລືແຜນການຮ່ວມມືໃນຕໍ່ໜ້າຂອງແມ່ຍິງສອງກະຊວງການຕ່າງປະເທດ ສປປ ລາວ ແລະ ສສ ຫວຽດນາມ.
ເຂົ້າຢ້ຽມຂໍ່ານັບ ສະຫາຍ ນາງ ຫງວຽນ ເຟືອງ ຫງ່າ, ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ
ເຂົ້າຢ້ຽມຂໍ່ານັບ ທ່ານ ຮ່ວາງ ມິງ ເກືອງ, ຮອງເຈົ້າຄອງນະຄອນຮາຍຟ່ອງ
ນອກຈາກນັ້ນ, ຄະນະສະຫະພັນແມ່ຍິງກະຊວງການຕ່າງປະເທດ ສປປ ລາວ ຍັງໄດ້ເຂົ້າຢ້ຽມຂໍ່ານັບ ສະຫາຍ ນາງ ຫງວຽນ ເຟືອງ ຫງ່າ, ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ແລະ ຢ້ຽມຂໍ່ານັບ ທ່ານ ຮ່ວາງ ມິງ ເກືອງ, ຮອງເຈົ້າຄອງນະຄອນຮາຍຟ່ອງ ເພື່ອເພີ່ມທະວີສາຍພົວພັນຮ່ວມມື, ຄວາມສາມັກຄີພິເສດ ຂອງສອງຊາດລາວ-ຫວຽດນາມ. ພ້ອມດຽວກັນນີ້, ຄະນະສະຫະພັນແມ່ຍິງຍັງໄດ້ມີໂອກາດໄປຢ້ຽມສະຖານທີ່ທ່ອງທ່ຽວສຳຄັນຕ່າງໆ ຢູ່ ນະຄອນຫຼວງຮ່າໂນ້ຍ ແລະ ແຂວງຮາຍຟ່ອງ.
ການແລກປ່ຽນຢ້ຽມຢາມຂອງສອງສະຫະພັນແມ່ຍິງກະຊວງການຕ່າງປະເທດ ສປປ ລາວ ແລະ ສສ ຫວຽດນາມ ເປັນກົນໄກການຮ່ວມມືທີ່ສຳຄັນໜຶ່ງ ໂດຍໄດ້ມີການຜັດປ່ຽນຢ້ຽມຢາມເຊິ່ງກັນ ແລະ ກັນ ເປັນປະຈຳທຸກປີ ແລະ ໃນປີ 2024 ສະຫະພັນແມ່ຍິງກະຊວງການຕ່າງປະເທດ ຫວຽດນາມ ຈະມາຢ້ຽມຢາມ ສປປ ລາວ.