ໃນວັນທີ 24 ກັນຍາ 2022, ສາມອົງການຈັດຕັ້ງມະຫາຊົນ ປະກອບດ້ວຍ ກໍາມະບານຮາກຖານ, ໜ່ວຍຊາວໜຸ່ມ ແລະ ໜ່ວຍແມ່ຍິງ ຂອງກົມການຂ່າວ, ກະຊວງການຕ່າງປະເທດ ໄດ້ມອບເຄື່ອງອຸປະຖຳໃຫ້ແກ່ ຫ້ອງເສນາທິການ ກອງພົນທະຫານຮາບທີ 1, ພິທີມອບໄດ້ຈັດຂຶ້ນ ທີ່ ນະຄອນຫຼວງວຽງຈັນ, ຊຶ່ງຕາງໜ້າຈາກສາມອົງການຈັດຕັ້ງມະຫາຊົນກົມການຂ່າວ ກ່າວມອບໂດຍ ທ່ານ ພອນທະວີ ບຸດດາລາ, ຫົວໜ້າກົມການຂ່າວ, ກະຊວງການຕ່າງປະເທດ ແລະ ກ່າວຮັບໂດຍ ທ່ານ ພັທ ສຸລິໄຊ ພິຈິດ, ຮອງຫົວໜ້າຫ້ອງເສນາທິການ ກອງພົນທະຫານຮາບທີ 1 ແລະ ມີຄະນະນຳຂອງຫ້ອງເສນາທິການ ແລະ ຄະນະອົງການຈັດຕັ້ງມະຫາຊົນຂອງຫ້ອງເສນາທິການ ກອງພົນທະຫານຮາບທີ 1, ພ້ອມດ້ວຍຄະນະກົມ, ຄະນະພະແນກ, ພະນັກງານວິຊາການ ແລະ ສະມາຊິກຈາກສາມອົງການຈັດຕັ້ງມະຫາຊົນຂອງກົມການຂ່າວ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງການນໍາເຄື່ອງອຸປະຖໍາມາມອບໃຫ້ຫ້ອງເສນາທິການ ກອງພົນທະຫານຮາບທີ 1 ໃນຄັ້ງນີ້ ແມ່ນເພື່ອເປັນການປະກອບສ່ວນສືບຕໍ່ປະຕິບັດບັນດາມາດຕະການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ ລັດຖະບານວາງອອກ, ສະໜັບສະໜູນການເຄື່ອນໄຫວວຽກງານຂອງ ຫ້ອງເສນາທິການກອງພົນທະຫານຮາບທີ 1 ໃນການປະຕິບັດໜ້າທີ່ວຽກງານຂອງຕົນ, ເຄື່ອງຊ່ວຍເຫຼືອດັ່ງກ່າວ ປະກອບດ້ວຍຜ້າອັດປາກ-ດັງ, ສະບູລ້າງມື, ລຳໂພງລາກ, ວາລະສານຈໍາປາ ແລະ ເຄື່ອງໃຊ້ຫ້ອງການຈຳນວນໜຶ່ງ.
ການຈັດກິດຈະກຳມອບເຄື່ອງອຸປະຖຳຄັ້ງນີ້ ຍັງເປັນການສ້າງຄວາມຮູ້ຈັກ, ຮັກແພງສາມັກຄີ ແລະ ສ້າງເຄືອຂ່າຍການປະສານງານກັນລະຫວ່າງ ອົງການຈັດຕັ້ງມະຫາຊົນ ກໍຄືລະຫວ່າງກົມການຂ່າວ ກັບຫ້ອງເສນາທິການ ທະຫານຮາບທີ 1 ໃຫ້ມີຄວາມໃກ້ຊິດກັນ ແລະ ຊ່ວຍເຫຼືອກັນຕື່ມໃນອະນາຄົດ.
**************************