ໃນວັນທີ 21 ພຶດສະພາ 2022, ສາມອົງການຈັດຕັ້ງມະຫາຊົນປະກອບດ້ວຍ ກຳມະບານຮາກຖານ, ໜ່ວຍຊາວໜຸ່ມ ແລະ ໜ່ວຍແມ່ຍິງ ຂອງກົມການຂ່າວ, ກະຊວງການຕ່າງປະເທດ, ໄດ້ເດີນທາງໄປມອບເຄື່ອງຊ່ວຍເຫຼືອໃຫ້ແກ່ໂຮງຮຽນປະຖົມສົມບູນແກ້ງໄຄ້, ບ້ານແກ້ງໄຄ້, ເມືອງໄຊທານີ, ນະຄອນຫຼວງວຽງຈັນ, ເຊິ່ງຕາງໜ້າຈາກສາມອົງການຈັດຕັ້ງມະຫາຊົນກ່າວມອບໂດຍ ທ່ານ ພອນທະວີ ບຸດດາລາ, ຫົວຫນ້າກົມການຂ່າວ, ກະຊວງການຕ່າງປະເທດ ແລະ ກ່າວຮັບໂດຍ ທ່ານ ນາງ ພອນແສງ ລາຄຳ, ຜູ້ອຳນວຍການໂຮງຮຽນປະຖົມສົມບູນແກ້ງໄຄ້, ໂດຍມີທ່ານຮອງນາຍບ້ານ ບ້ານແກ້ງໄຄ້, ບັນດາຄະນະກົມ, ຄະນະພະແນກ, ພະນັກງານວິຊາການ ແລະ ສະມາຊິກຈາກສາມອົງການຈັດຕັ້ງມະຫາຊົນຂອງກົມການຂ່າວ, ບັນດາຄູອາຈານ ແລະ ນ້ອງນັກຮຽນປະຖົມແກ້ງໄຄ້ ເຂົ້າຮ່ວມຢ່າງພ້ອມພຽງ.

     ໃນພິທີມອບຮັບເຄື່ອງຊ່ວຍເຫຼືອ, ທ່ານຫົວຫນ້າກົມ ພອນທະວີ ບຸດດາລາ ໄດ້ກ່າວວ່າ ການນຳເຄື່ອງອຸປະຖຳຊ່ວຍເຫຼືອມາມອບໃຫ້ແກ່ໂຮງຮຽນປະຖົມສົມບູນແກ້ງໄຄ້ໃນຄັ້ງນີ້ແມ່ນເພື່ອປະກອບສ່ວນເຂົ້າໃນການປະຕິບັດບັນດາມາດຕະການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ແນໃສ່ໃຫ້ຄູອາຈານ ແລະ ນ້ອງນັກຮຽນ ກໍຄືໂຮງຮຽນແຫ່ງນີ້ປອດຈາກພະຍາດໂຄວິດ-19, ພ້ອມທັງສົ່ງເສີມໃຫ້ລູກຫຼານນ້ອງນັກຮຽນ ມີຄວາມມັກຮັກໃນການຮໍ່າຮຽນ ແລະ ການຫຼີ້ນກິລາ ເພື່ອໃຫ້ມີສຸຂະພາບແຂງແຮງ ແລະ ສ້າງພູມຄຸມກັນໃຫ້ແກ່ຮ່າງກາຍ. ເຄື່ອງຊ່ວຍເຫຼືອດັ່ງກ່າວປະກອບດ້ວຍອຸປະກອນຕ້ານພະຍາດໂຄວິດ-19 ປະເພດ ສະບູລ້າງມື, ເຈວລ້າງມືຂ້າເຊື້ອ, ໜ້າກາກອັດປາກ-ດັງ, ເຄື່ອງວັດແທກອຸນນະພູມ ແລະ ເຄື່ອງວັດແທກນ້ຳຫນັກ-ລວງສູງ, ພ້ອມດ້ວຍອຸປະກອນສົ່ງເສີມການສຶກສາ ແລະ ເຄື່ອງກິລາສຳລັບນັກຮຽນ, ລວມມູນຄ່າທັງໝົດ 9.412.000 ກີບ.

       ໃນໂອກາດດຽວກັນ, ທ່ານ ນາງ ພອນແສງ ລາຄຳ, ຜູ້ອໍານວຍການໂຮງຮຽນປະຖົມສົມບູນແກ້ງໄຄ ກໍໄດ້ຕາງໜ້າໃຫ້ພະນັກງານຄູອາຈານ ສະແດງຄວາມຍິນດີຕ້ອນຮັບ ແລະ ຮູ້ບຸນຄຸນຢ່າງສູງມາຍັງສາມອົງການຈັດຕັ້ງມະຫາຊົນຂອງກົມການຂ່າວ ກະຊວງການຕ່າງປະເທດ ທີ່ໄດ້ມອບເຄື່ອງອຸປະຖໍາຊ່ວຍເຫຼືອຄັ້ງນີ້, ເຊິ່ງເປັນການປະກອບສ່ວນສຳຄັນເຂົ້າໃນການສົ່ງເສີມການສຶກສາຮ່ຳຮຽນຂອງເດັກນັກຮຽນ ແລະ ທາງໂຮງຮຽນຈະນຳໃຊ້ເຄື່ອງຊ່ວຍເຫຼືອດັ່ງກ່າວໃຫ້ເກີດປະໂຫຍດສູງສຸດເຂົ້າໃນໂຄງການສອນ-ການຮຽນ ຂອງຄູອາຈານ ແລະ ນ້ອງນັກຮຽນ, ກໍຄືການຈັດຕັ້ງປະຕິບັດບັນດາມາດຕະການປ້ອງການ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຂອງໂຮງຮຽນ ເພື່ອໃຫ້ປອດຈາກເຊື້ອໂຄວິດ 19.

ນອກຈາກນີ້, ສາມອົງການຈັດຕັ້ງມະຫາຊົນຂອງກົມການຂ່າວ ຍັງໄດ້ມອບເຈວລ້າງມືຂ້າເຊື້ອ ແລະ ໜ້າກາກອັດປາກ-ດັງ ຈຳນວນໜຶ່ງໃຫ້ແກ່ຫ້ອງການບ້ານແກ້ງໄຄ້ ແລະ ວັດຊົນລະປະທານໄຊຍະຣາມ ຢູ່ບ້ານແກ້ງໄຄ້ເຊັ່ນດຽວກັນ.