ວັນທີ 05 ກັນຍາ 2023, ທີ່ ໂຮງຮຽນມິດຕະພາບ T78 ໄດ້ຈັດພິທີເປີດສົກຮຽນໃໝ່ ສົກປີ 2023-2024,  ເຂົ້າຮ່ວມພິທີມີ ທ່ານ ເວືອງ ດິງ ເຫວ (Vuong Dinh Hue), ກໍາມະການກົມການ ເມືອງສູນກາງພັກ, ປະທານສະພາແຫ່ງຊາດຫວຽດນາມ. ສ່ວນຝ່າຍສະຖານທູດມີທ່ານ ແສງເພັດ  ຮຸ່ງບຸນ ຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ  ສສ ຫວຽດນາມ ນອກນີ້ຍັງມີການນຳຈາກສະພາແຫ່ງຊາດ, ກະຊວງສຶກສາກໍ່ສ້າງ, ການນຳຈາກນະຄອນຫຼວງຮ່າໂນ້ຍ, ການນຳເມືອງຟຸກເຖາະ, ສະມາຄົມມິດຕະພາບຫວຽດນາມ-ລາວ ພ້ອມດ້ວຍພະນັກງານຄູອາຈານ ແລະ ນັກຮຽນຢ່າງພ້ອມພຽງ.

ໃນພິທີກ່າວເປີດ ທ່ານເລ ຟູ່ ຖັ່ງ, ເລຂາພັກ, ອຳນວຍການໂຮງຮຽນມິດຕະພາບ T78 ໄດ້ຍົກ ໃຫ້ເຫັນທີ່ມາ ແລະ ຕົ້ນກໍາເນີດຂອງໂຮງຮຽນຊຶ່ງໄດ້ສ້າງຕັ້ງມາແຕ່ວັນທີ 01/01/ 1958 ໂດຍພາຍໃຕ້ ແນວຄິດຂອງປະທານໂຮ່ຈີ່ມິນ ຊ່ວຍເຫຼືອການປະຕິວັດລາວເພື່ອສ້າງບຸກຄະລາກອນໃນການປົດປ່ອຍ ປະ ເທດຊາດ, ເປັນໂຮງຮຽນແຫ່ງທຳອິດທີ່ສອນພາສາຫວຽດ ແລະ ວັດທະນະທຳໃຫ້ນັກຮຽນລາວຢູ່ຫວຽດ ນາມ, ຜ່ານການຍົກຍ້າຍຫຼາຍຄັ້ງແຕ່ປີ 1980 ຮອດປັດຈຸບັນໂຮງຮຽນແຫ່ງດັ່ງກ່າວໄດ້ຕັ້ງຢູ່ຕາແສງ ເຖາະຫຼົກ, ເມືອງ ຟຸກ ເຖາະ, ນະຄອນຫຼວງຮ່າໂນ້ຍ. ໄລຍະ 65 ປີ ຜ່ານມາໂຮງຮຽນແຫ່ງດັ່ງກ່າວໄດ້ ສ້າງ ບຸກຄະລະລາກອນໃຫ້ແກ່ລາວໄດ້ຫຼາຍກວ່າ 27 ພັນຄົນ, ມີຫຼາຍສະຫາຍໄດ້ເປັນການນຳຂັ້ນສູງຂອງພັກ, ລັດ ແລະ ກາຍເປັນພະນັກງານຫຼັກແຫຼ່ງຂອງບັນດາກະຊວງ, ຂະແໜງການຂັ້ນສູນກາງ ແລະ ທ້ອງຖິ່ນ ຂອງລາວ, ປີ 2022-2023 ເນື່ອງໃນໂອກາດວັນສ້າງຕັ້ງໂຮງຮຽນຄົບຮອບ 65 ປີ ລັດຖະບານ ລາວໄດ້ມອບ ຫຼຽນໄຊແຮງງານຊັ້ນ I ໃຫ້ແກ່ລວມໝູ່, ພະນັກງານຄູອາຈານຫຼາຍສະຫາຍໄດ້ຮັບຫຼຽນໄຊ, ຫຼຽນກາ ແລະ ໃບຍ້ອງຍໍຈາກລັດຖະບານສອງປະເທດອີກດ້ວຍ.

ໂຮງຮຽນມິດຕະພາບ T78 ເປັນໂຮງຮຽນທີ່ຂຶ້ນກັບກະຊວງສຶກສາກໍ່ສ້າງຫວຽດນາມໂດຍກົງ, ມີໜ້າທີ່ສອນພາສາຫວຽດໃຫ້ນັກສຶກສາລາວ ແລະ ສຶກສາສາມັນໃຫ້ນັກຮຽນຊົນເຜົ່າສ່ວນໜ້ອຍ ຂອງ ວຽດນາມ ແລະ ນັກຮຽນລາວຈຳນວນໜຶ່ງທີ່ຮຽນສາມັນ ຊຶ່ງນັ້ນກໍໄດ້ປະກອບສ່ວນໜ້າທີ່ການເມືອງ ອັນສຳຄັນເປັນການເພີ່ມພູນຄູນສ້າງເຂົ້າໃນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ-ລາວ.

ໂອກາດນີ້, ທ່ານ ເວືອງ ດິງ ເຫວ ກໍໄດ້ຕີລາຄາສູງ ແລະ ຍ້ອງຍໍສັນລະເສີນມາຍັງຄູອາຈານຫຼານຮຸ່ນ ຄົນໄດ້ມີຜົນງານດີເດັ່ນຫຼາຍດ້ານໃນໄລຍະຜ່ານມາ, ໃນໄລຍະ 65 ປີ ຜ່ານມາໄດ້ຮັບການເອົາໃຈໃສ ຂອງສອງພັກ, ສອງລັດ​ຫວຽດນາມ-ລາວ ໃນການຊຸກຍູ້ໃຫ້ກໍາລັງໃຈໃນການປະກອບສ່ວນຂອງພະນັກ ງານຄູອາຈານທີ່ຜ່ານຜ່າຄວາມຫຍຸ້ງຍາກນາໆປະການ ໄດ້ສຳເລັດໜ້າທີ່ໆໄດ້ມອບໝາຍທີ່ພັກ, ລັດມອບ ໝາຍໃຫ້ ໂດຍສະເພາະແມ່ນການກໍ່ສ້າງບຸກຄະລາກອນຊົນເຜົ່າສ່ວນໜ້ອຍຂອງຫວຽດນາມ ກໍຄືບຸກຄະລາ ກອນຂອງ ສປປ ລາວ. ທ່ານປະທານສະພາຍັງໄດ້ກ່າວເຖິງຄວາມສຳຄັນຂອງການສຶກສາ ເພາະເປັນປັດໄຈ ໃນການຕັດສິນຂອງການພັດທະນາເສດຖະກິດ-ສັງຄົມຂອງຊາດ, ຈຶ່ງເນັ້ນໜັກໃຫ້ຄູອາຈານ ແລະ ນັກຮຽນທຸກຄົນເອົາໃຈໃສ່ ສືບຕໍ່ຮັກສາມູນເຊື້ອອັນດີງາມຂອງໂຮງຮຽນຍາດມາໄດ້ ເພື່ອກໍສ້າງຊັບພະຍາ ກອນມະນຸດ ດັ່ງຄຳເວົ້າຂອງປະທານໂຮ່ຈີມິນ ເຄີຍກ່າວ: ເພື່ອຜົນປະໂຫຍດສີບປີຕ້ອງປູກຕົ້ນໄມ້ ແຕ່ເພື່ອຜົນປະໂຫຍດຮ້ອຍປີຕ້ອງໄດ້ສ້າງຄົນ.

ນອກຈາກນັ້ນ, ທ່ານປະທານສະພາພ້ອມດ້ວຍ ທ່ານທູດ ແລະ ຄະນະ ຍັງໄດ້ໄປຢ້ຽມຊົມຫໍພັກ ນັກສຶກສາລາວ-ຫວຽດນາມ ແລະ ຮ່ວມພິທີປູກຕົ້ນໄມ້ອີກດ້ວຍ.