ໃນວັນທີ 21 ມີນາ 2023 ທີ່ ນະຄອນຫຼວງວຽງຈັນ, ກົມອົງການຈັດຕັ້ງສາກົນ, ກະຊວງການຕ່າງປະເທດ ຮ່ວມກັບ ຫ້ອງການຜູ້ປະສານງານ ອົງການ ສປຊ ປະຈໍາ ສປປ ລາວ ໄດ້ຈັດກອງປະຊຸມວິຊາການຂອງ ຄະນະກໍາມະການຊີ້ນໍາຮ່ວມລະຫວ່າງ ລັດຖະບານເເຫ່ງ ສປປ ລາວ ເເລະ ອົງການ ສະຫະປະຊາຊາດ ​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ຂອບ​ການ​ຮ່ວມ​ມື ເພື່ອ​ການ​ພັດ​ທະ​ນາ​ແບບ​ຍືນ​ຍົງ ລະ​ຫວ່າງ​ ສ​ປ​ປ ລາວ ແລະ ອົງ​ການ ສ​ປ​ຊ ສົກປີ 2022-2026 (The Technical Meeting of the Joint Steering Committee on the Implementation of the UN Sustainable Development Cooperation Framework 2022-2026), ພາຍໃຕ້ການເປັນປະທານຮ່ວມໂດຍ ທ່ານ ດາວວີ ວົງໄຊ, ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ແລະ ທ່ານ ນາງ ຊາຣາ ເຊເກັນເນສ, ຜູ້ປະສານງານ ອົງການ ສປຊ ປະຈໍາ ສປປ ລາວ, ໂດຍມີຜູ້ຕາງໜ້າຈາກບັນດາກະຊວງ ເເລະ ອົງການທຽບເທົ່າກະຊວງທີ່ກ່ຽວຂ້ອງ ເເລະ ບັນດາອົງການເຄືອຂ່າຍ ສປຊ ເຂົ້າຮ່ວມຫຼາຍກວ່າ 60 ທ່ານ.

ກອງປະຊຸມຄັ້ງນີ້ ໄດ້ທົບທວນຄືນຄວາມຄືບໜ້າໃນການຈັດຕັ້ງປະຕິບັດ ຂອບການຮ່ວມມືເພື່ອການພັດທະນາແບບຍືນຍົງ ລະຫວ່າງ ສປປ ລາວ ແລະ ອົງການ ສປຊ ສົກປີ 2022-2026 ຫຼື UNSDCF 2022-2026; ໂດຍ​ສະ​ເພາະ​ການ​ພິ​ຈາ​ລະ​ນາ​ບົດ​ລາຍ​ງານ​ຜົນ​ການຈັດຕັ້ງປະຕິບັດຂອບ​ການ​ຮ່ວມ​ມື​ດັ່ງ​ກ່າວ ປະ​ຈຳ​ປີ 2022 ແລະ ແຜນ​ວຽກ​ບູລິ​ມະ​ສິດ​ຮ່ວມ ສຳ​ລັບ​ປີ 2023 ພາຍໃຕ້ 4 ຄາດໝາຍຫຼັກຄື: 1. ຊີວິດການເປັນຢູ່ທີດີ; 2. ຄວາມຈະເລີນຮຸ່ງເຮືອງທີ່ທົ່​ວ​ເຖິງ; 3. ການ​ປົກ​ຄອງ ແລະ ການບໍລິຫານລັດດ້ວຍກົດໝາຍ ເເລະ 4. ສິ່ງເເວດລ້ອມ, ການປ່ຽນເເປງດິນຟ້າອາກາດ ເເລະ ການສ້າງຄວາມທົນທານ ພ້ອມ​ທັງ​ປຶກ​ສາ​ຫາ​ລື​ກ່ຽວ​ກັ​ບ​ຂະ​ບວນ​ການ​ກະ​ກຽມຫຼຸດ​ພົ້ນ​ອອກ​ຈາກ​ສະ​ຖາ​ນະ​ພາບ​ປະ​ເທດ​ດ້ອຍ​ພັດ​ທະ​ນາ ໃນ​ປີ 2026.

ໃນການ​ກ່າວ​ເປີດກອງປະຊຸມ, ທ່ານ ດາວວີ ວົງໄຊ, ປະທານຮ່ວມ ໄດ້ຢໍ້າຄືນຄວາມສໍາຄັນຂອງຂອບການຮ່ວມມື ລະຫວ່າງ ລັດຖະບານເເຫ່ງ ສປປ ລາວ ເເລະ ອົງການ ສປຊ, ໂດຍສະເພາະບົດບາດຂອງທິ​ມ​ງານ ອົງການ ສປຊ ໃນຖານະເປັນຄູ່ຮ່ວມຫຼັກ ທີ່ໃຫ້ການສະໜັບສະໜູນຊ່ວຍເຫຼືອດ້ານເຕັກນິກ ເເລະ ລະດົມທຶນຮອນເຂົ້າໃນການຈັດຕັ້ງປະຕິບັດເເຜນງານ ເເລະ ໂຄງການຮ່ວມກັບລັດຖະບານໃນຫຼາຍຂະເເໜງການບູລິມະສິດ ເເນໃສ່ປະ​ກອບ​ສ່ວນ​ເຂົ້າ​ໃນການບັນລຸບັນດາຄາດໝາຍ ເເລະ ເປົ້າໝາຍຂອງເເຜນພັດທະນາເສດຖະກິດ-ສັງຄົມເເຫ່ງຊາດ, ກໍຄືຄວາມ​ພະ​ຍາ​ຍາມ​ໃນການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ ເເລະ ​ບັນ​ລຸ​ເປົ້າ​ໝາຍການພັດທະນາເເບບຍືນຍົງໃນອະນາຄົດ. ພ້ອມ​ກັນ​ນັ້ນ, ທ່ານ ໄດ້ເນັ້ນໜັກເຖິງຄວາມສໍາຄັນ ທີ່​ແຕ່​ລະ​ຂະ​ແໜງ​ການ ​ຕ້ອງ​ສືບ​ຕໍ່​ເພີ່ມ​ທະ​ວີ​ຄວາມເປັນເຈົ້າການ ແລະ ຄວາມ​ຮັບ​ຜິ​ດຊ​ອບໃນການຄົ້ນຄວ້າປະກອບຄໍາເຫັນຕໍ່​ບົດ​ລາຍ​ງານ ເເລະ ນໍາສະເໜີເເຜນວຽກ ເເລະ ກິດຈະກໍາໃນຂອບການຮ່ວມມື ສຳ​ລັບປີ 2023.

ຂອບວຽກການຮ່ວມມືລະຫວ່າງລັດຖະບານ ສປປ ລາວ ແລະ ອົງການ ສປຊ ໄດ້ຖືກຮັບຮອງເອົາໃນທ້າຍປີ 2021 ເພື່ອສະໜັບສະໜູນການປະຕິບັດບູລິມະສິດ ແລະ ຍຸດທະສາດການພັດທະນາຂອງ ສປປ ລາວ, ກໍຄື ແຜນພັດທະນາເສດຖະກິດ-ສັງຄົມແຫ່ງຊາດ 2021-2025, ວາລະ 2030 ເພື່ອການພັດທະນາແບບຍືນຍົງ ແລະ ເປົ້າໝາຍການພັດທະນາແບບຍືນຍົງ ຂອງອົງການ ສປຊ ແລະ ການກະກຽມຄວາມພ້ອມ ເພື່ອຫຼດ​ພົ້ນອອກຈາກສະຖານະພາບປະເທດດ້ອຍ ພັດທະນາຂອງ ສປປ ລາວ ໃນປີ 2026.

ກອງປະຊຸມລະດັບວິຊາການໃນຄັ້ງນີ້ ໄດ້ດໍາເນີນໄປດ້ວຍບັນຍາກາດທີ່ສ້າງສັນ ແລະ ສໍາເລັດລົງຢ່າງຈົບງາມ. ສໍາລັບຜົນຂອງກອງປະຊຸມໃນຄັ້ງນີ້ແມ່ນຈະຖືກນໍາໄປລາຍງານຕໍໍ່ ກອງປະຊຸມລະດັບສູງຂອງຄະນະກໍາມະການຊີ້ນໍາຮ່ວມ ການຈັດຕັ້ງປະຕິບັດຂອບການຮ່ວມມືເພືື່ອການພັດທະນາແບບຍືນຍົງ ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການ ສະຫະປະຊາຊາດ ເຊິ່ງຄາດວ່າຈະຈັດຂືີ້ນໃນທ້າຍ ເດືອນ ພືດສະພາ ທີ່ຈະມາເຖິງນີ້.