ໃນຕອນແລງ ຂອງວັນທີ 13 ມີນາ 2023 ທີ່ສໍານັກງານປະທານາທິບໍດີ ແຫ່ງ ສາທາລະນະລັດ ໂບລິວາຣຽນ ເວເນຊູເອລາ. ທ່ານ ວັນທາ ແສງເມືອງ ໄດ້ເຂົ້າຍື່ນສານຕາຕັ້ງຕໍ່ທ່ານ ນີໂກລາດສ ມາດູໂຣ ໂມໂຣດສ (Mr. Nicolas Maduro Moros), ປະທານາທິບໍດີ ແຫ່ງ ສາທາລະນະລັດ ໂບລິວາຣຽນ ເວເນຊູເອລາ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ໂບລິວາຣຽນ ເວເນຊູເອລາ, ໂດຍມີສຳນັກງານຕັ້ງຢູ່ນະຄອນຫຼວງ ລາຮາວານ, ສາທາລະນະລັດ ກູບາ.
ໃນໂອກາດສໍາຄັນດັ່ງກ່າວ ທ່ານເອກອັກຄະລັດຖະທູດ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ, ພອນໄຊອັນປະເສີດ ແລະ ຄວາມຮັກແພງຈາກທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ສົ່ງເຖິງທ່ານ ນີໂກລາດສ ມາດູໂຣ ໂມໂຣດສ ແລະ ຜ່ານທ່ານ ໄປຍັງລັດຖະບານ ແລະ ປະຊາຊົນ ເວເນຊູເອລາ ທຸກຖ້ວນໜ້າ ໄດ້ສະແດງຄວາມຊົມເຊີຍພາຍໃຕ້ການນຳພາອັນສະຫຼາດສ່ອງໃສ, ດ້ວຍນ້ຳໃຈຮັກຊາດ ແລະ ມູນເຊື້ອການປະຕິວັດຢ່າງອົງອາດກ້າຫານ ອັນຍາດໄດ້ຜົນສໍາເລັດອັນໃຫຍ່ຫຼວງ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຮັກສາສະຖຽນລະພາບດ້ານປ້ອງກັນຊາດ, ປ້ອງກັນຄວາມສະຫງົບ-ດ້ານການເມືອງ, ທັງເຮັດໃຫ້ຖານະບົດບາດ ຂອງ ສາທາ ລະນະລັດ ໂບລີວາຣຽນ ເອເນຊູເອລາ ໄດ້ຮັບການຍົກສູງຢ່າງບໍ່ຢຸດຢັ້ງ ໃນເວທີສາກົນ ແລະ ພາກພື້ນ.
ທ່ານ ນີໂກລາດສ ມາດູໂຣ ໂມໂຣດສ ໄດ້ຊົມເຊີຍການຕໍ່ສູ້, ປົກຮັກສາ ແລະ ສ້າງສາພັດທະນາປະເທດ ແຫ່ງ ສປປປ ລາວ ແລະ ໄດ້ສະແດງຄວາມຂອບໃຈຕໍ່ຄໍາອວຍພອນອັນອົບອຸ່ນຈາກທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ, ພ້ອມທັງ ອວຍພອນມາຍັງທ່ານ ທອງລຸນ ສີສຸລິດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ສືບຕໍ່ນໍາພາປະຊາຊົນລາວບັນດາເຜົ່າ ພັດທະນາປະເທດໃຫ້ຈະເລີນຮຸ່ງເຮືອງ ແລະ ສີວິໄລຍິ່ງໆຂຶ້ນ ແລະ ອວຍພອນໃຫ້ສາຍພົວພັນມິດຕະພາບ ແລະ ຮ່ວມມືອັນດີງາມລະຫວ່າງສອງປະເທດ ນັບມື້ນັບເກີດດອກອອກຜົນຕົວຈິງ. ພ້ອມນັ້ນ, ທ່ານປະທານາທິບໍດີ ກໍ່ໄດ້ສະແດງຄວາມຍິນດີ ແລະ ຊົມເຊີຍຕໍ່ທ່ານເອກອັກຄະລັດຖະທູດລາວຄົນໃໝ່ ປະຈຳ ສາທາ ລະນະລັດ ໂບລິວາຣຽນ ເວເນຊູເອລາ ແລະ ອວຍພອນໃຫ້ທ່ານທູດ ຈົ່ງປະຕິບັດໜ້າທີ່ການທູດຂອງຕົນ ດ້ວຍຜົນສຳເລັດຢ່າງດີທຸກໆປະການ.