ໃນຕອນເຊົ້າຂອງວັນທີ 07 ມີນາ 2023, ສະຖາບັັນການຕ່າງປະເທດ, ກະຊວງການຕ່າງປະເທດ ໄດ້ຮ່ວມກັບ ສະຖານທູດ ສ. ອາເມຣິກາ ປະຈໍາ ສປປ ລາວ ໄດ້ຈັັດປະຖະກະຖາຂື້ນ, ໃນຫົວຂໍ້: “ຫວນຄືນ 25 ປີ ແຫ່ງ ການພົວພັນການທູດ ລາວ-ອາເມຣິກາ ແລະ ທິດທາງການຮ່ວມມືໃນຕໍ່ໜ້າ”, ທີ່ ສູນການຝືກອົບຮົມ ແລະ ການຮ່ວມມືສາກົນ,  ພາຍໃຕ້ການເປັນປະທານກ່າວເປີດຂອງ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ເປັນຜູ້ດໍາເນີນກອງປະຊຸມ.

ການຈັດປະຖາກະຖາຄັ້ງນີ້ໃຫ້ກຽດບັນຍາຍໂດຍ ທ່ານ ປີເຕີ ເຮມອນ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສ. ອາເມຣິກາ ປະຈໍາ ສປປ ລາວ, ເຊິ່ງມີຜູ້ເຂົ້າຮ່ວມຈາກບັນດາກົມພາຍໃນກະຊວງການຕ່າງປະເທດ, ນັກການທູດອາວຸໂສຂອງ ກະຊວງການຕ່າງປະເທດ, ຄະນະພົວພັນການຕ່າງປະເທດສູນກາງພັກ, ບັນດາກະຊວງ ແລະ ຂະແໜງການກ່ຽວຂ້ອງອ້ອມຂ້າງສູນກາງ ຂອງລາວ ແລະ ຄະນະຜູ້ຕິດຕາມຈາກ ສະຖານທູດ ອາເມຣິກາ ປະຈໍາລາວ ເຂົ້າຮ່ວມທັງໝົດ 100 ທ່ານ.

ຈຸດປະສົງຂອງປະຖະກະຖາໃນຄັ້ງນີ້ ເພື່ອເປັນການສົ່ງເສີມການພົວພັນການທູດ ລະຫວ່າງ ສປປ ລາວ ແລະ ສ. ອາເມຣິກາ ແລະ ທົບທວນຄືນຜົນສໍາເລັດຂອງການພົວພັນຮ່ວມມືໃນຂອບສອງຝ່າຍ ແລະ ຫຼາຍຝ່າຍ ລະຫວ່າງ ສປປ ລາວ ແລະ ສ. ອາເມຣິກາ ໃນໄລຍະ 25 ປີ ເຊິ່ງເປັນໄລຍະເວລາທີ່ ທ່ານທູດ ປີເຕີ ເຮມອນ ມີປະສົບການຕົວຈິງໃນການສົ່ງເສີມການພົວພັນຮ່ວມມື ລະຫວ່າງ ສ. ອາເມລິກາ ແລະ ສປປ ລາວ. ພ້ອມນັ້ນກໍ່ໄດ້ ສະເໜີກ່ຽວກັບທິດທາງການຮ່ວມມືໃນຕໍ່ໜ້າ ເຊີ່ງໃຫ້ກຽດບັນຍາຍໂດຍ ທ່ານ ປີເຕີ ເຮມອນ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສ. ອາເມຣິກາ ປະຈໍາ ສປປ ລາວ.

ໃນໂອກາດເປີດພິທີ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ ໄດ້ກ່າວເນັ້ນຢໍ້າການພົວພັນການທູດຂອງສອງຝ່າຍ ລາວ-ອາເມຣິກາ ທີ່ມີມາຍາວນານ ນັບແຕ່ ວັນທີ 10 ສິງຫາ ປິ 1955 ທີ່ໄດ້ສ້າງຕັ້ງສາຍພົວພັນການທູດຮ່ວມກັນເປັນຕົ້ນມາ, ລາວ ແລະ ອາເມຣິກາ ໄດ້ມີຜົນສໍາເລັດຮ່ວມກັນໃນຫຼາຍດ້ານ ບໍ່ວ່າຈະເປັນດ້ານການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນາທໍາ-ສັງຄົມ ທີ່ມີການຊ່ວຍເຫຼືອສະໜັບສະໜູນ ເຊິ່ງ ແລະ ກັນມາໂດຍຕະຫຼອດ. ນອກຈາກນີ້, ໃນອະນາຄົດສອງຝ່າຍຍັງຈະສືບຕໍ່ ສົ່ງເສີມການພົວພັນຮ່ວມມື ລາວ-ອາເມຣິກາ, ອາເມຣິກາ-ລາວ ໃຫ້ກ້າວເຂົ້າສູ່ລວງເລິກ.

ພ້ອມດຽວກັນນີ້, ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ຍັງໄດ້ສະແດງຄວາມຊົມເຊີຍ ແລະ ຂອບໃຈ ຢ່າງສູງ ຕໍ່ຜູ້ບັນຍາ ແລະ ຜູ້ເຂົ້າຮ່ວມ ທີ່ໄດ້ສະຫຼະເວລາເຂົ້າຮ່ວມ ພ້ອມທັງແລກປ່ຽນບົດຮຽນ ແລະ ປະສົບການໃນການເຄື່ອນໄຫວຕົວຈິງ, ເຮັດໃຫ້ກອງປະຊຸມຄັ້ງນີ້ມີບັນຍາກາດ ແລະ ເນື້ອໃນຄົບຖ້ວນສົມບູນ, ພ້ອມທັງເຊື່ອໝັ້ນວ່າການພົວພັນການທຸດ ແລະ ການຮ່ວມມື ລະຫວ່າງ ລາວ ແລະ ອາເມຣິກາ ຈະສືບຕໍ່ຮັດແໜ້ນ ແລະ ຜັນຂະຫຍາຍໃຫ້ເປັນຮູບປະທຳຂຶ້ນເລື້ອຍໆໄປ.