ທ່ານ ນາງ Melissa Brown, ຮອງຜູ້ຊ່ວຍລັດຖະມົນຕີຕ່າງປະເທດ, ຮັບຜິດຊອບນະໂຍ ບາຍການຕ່າງປະເທດ ແລະ ປະສານງານວຽກງານໃນຂົງເຂດອາຊີຕາເວັນອອກ ແລະ ປາຊີຟິກ, ກະຊວງການຕ່າງປະເທດ ສະຫະລັດ ອາເມຣິກາ, ໄດ້ເດີນທາງມາຢ້ຽມຢາມເຄື່ອນໄຫວເຮັດວຽກຢູ່ ສປປ ລາວ ໃນລະຫວ່າງ ວັນທີ 01-05 ມີນາ 2023.
ໃນໂອກາດດັ່ງກ່າວ ທ່ານ ນາງ Melissa Brown ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທີ່ ກະຊວງການຕ່າງປະເທດ. ຊຶ່ງທັງສອງຝ່າຍໄດ້ປຶກສາຫາລືວຽກງານການຮ່ວມມືສອງຝ່າຍ ທີ່ກຳລັງຈັດຕັ້ງປະຕິບັດ ແລະ ທິດທາງສໍາລັບການຮ່ວມມືໃນຕໍ່ໜ້າ ລະຫວ່າງ ສອງປະເທດທັງໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນແມ່ນການປາບປາມຢາເສບຕິດ, ການຄ້າ ແລະ ການລົງທຶນ, ການສຶກສາ, ສາທາລະນະສຸກ, ວັດທະນະທຳ-ສັງຄົມ ແລະ ອື່ນໆ, ລວມທັງການຮ່ວມມືໃນຂອບຫຼາຍຝ່າຍ ເຊັ່ນ: ການຮ່ວມມືໃນຂອບ ແມ່ນໍ້າຂອງ-ສ.ອາເມຣິກາ (Mekong – U.S. Partnership), ການເປັນເຈົ້າພາບຈັດກອງປະຊຸມສຸດຍອດ ອາຊຽນຂອງ ສປປ ລາວ ໃນປີ 2024. ນອກຈາກນັ້ນ, ຍັງໄດ້ແລກປ່ຽນຄໍາເຫັນກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນທີ່ທັງສອງຝ່າຍມີຄວາມສົນໃຈນໍາກັນ.
ການເດີນທາງເຄື່ອນໄຫວເຮັດວຽກຢູ່ ສປປ ລາວ ຂອງ ທ່ານ ນາງ Melissa Brown, ຮອງຜູ້ຊ່ວຍລັດຖະມົນຕີກະຊວງຕ່າງປະເທດ ສະຫະລັດ ອາເມຣິກາ ແລະ ຄະນະ ໃນຄັ້ງນີ້, ຄະນະຝ່າຍອາເມຣິກາ ຍັງໄດ້ເດີນທາງໄປເຄື່ອນໄຫວວຽກຢູ່ແຂວງຊຽງຂວາງ ແລະ ແຂວງຫຼວງພະບາງ ເພື່ອຢ້ຽມຢາມບັນດາໂຄງການທີ່ໄດ້ຮັບການສະໜັບສະໜູນຈາກລັດຖະບານ ສະຫະລັດ ອາເມຣິກາ ໂດຍສະເພາະໂຄງການເກັບກູ້ລະເບີດທີ່ບໍ່ທັນແຕກຢູ່ ແຂວງຊຽງຂວາງ ແລະ ຢ້ຽມຢາມຫໍສະໝຸດແຂວງຫຼວງພະບາງ. ການເດີນທາງມາ ສປປ ລາວ ຄັ້ງນີ້ຂອງ ທ່ານ ນາງ Melissa Brown ໄດ້ຮັບຜົນສຳເລັດຢ່າງຈົບງາມ.