ໃນຕອນເຊົ້າຂອງວັນທີ 17 ກຸມພາ 2023, ທີ່ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ອາຣິມະ ຢູທະກະ, ຫົວໜ້າກົມອາຊີຕາເວັນອອກ ສ່ຽງໃຕ້ ແລະ ຕາເວັນຕົກສ່ຽງໃຕ້, ກະຊວງການຕ່າງປະເທດຍີ່ປຸ່ນ ໃນໂອກາດທີ່ຝ່າຍຍີ່ປຸ່ນເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນລະຫວ່າງວັນທີ 16-17 ກຸມພາ 2023.

ໃນໂອກາດນີ້, ທ່ານ ຮອງລັດຖະມົນຕີກະຊວງການຕ່າງປະເທດ ໂພໄຊ ໄຂຄຳພິທູນ, ກໍໄດ້ສະແດງຄວາມຊົມເຊີຍ ຕໍ່ການເຮັດວຽກ ແລະ ການປະສານງານຢ່າງໃກ້ຊິດ ລະຫວ່າງ ສອງກະຊວງການຕ່າງປະເທດ ລາວ ແລະ ຍີ່ປຸ່ນ, ຊຶ່ງໄດ້ປະກອບສ່ວນເຮັດໃຫ້ການແລກປ່ຽນຢ້ຽມຢາມ ແລະ ພົບປະກັນ ຂອງການນໍາຂັ້ນຕ່າງໆຂອງສອງຝ່າຍ ລາວ-ຍີ່ປຸ່ນ ໄດ້ຮັບຜົນສໍາເລັດຢ່າງຈົບງາມໃນແຕ່ລະໄລຍະ, ລວມທັງການຊຸກຍູ້ສົ່ງເສີມການຈັດຕັ້ງປະຕິບັດບັນດາໂຄງການຮ່ວມມື ກໍຄືການຕົກລົງຂອງການນໍາຂັ້ນສູງສອງຝ່າຍ ກໍໄດ້ຮັບຜົນສໍາເລັດຕາມຄາດໝາຍ ເປັນຕົ້ນແມ່ນ ການຈັດພິທີປູກຕົ້ນຊາກູຣະ ຈໍານວນ 150 ຕົ້ນ ຢູ່ ສວນຊາກຸຣະມິດຕະພາບ ລາວ-ຍີ່ປຸ່ນ, ເມືອງວຽງໄຊ, ແຂວງຫົວພັນ ໃນວັນທີ 24 ມັງກອນ ຜ່ານມາ. ພ້ອມດຽວກັນນັ້ນ, ທ່ານ ຮອງລັດຖະມົນຕີ ໂພໄຊ ໄຂຄຳພິທູນ ກໍໄດ້ສະແດງຄວາມຂອບໃຈຕໍ່ ກະຊວງການຕ່າງປະເທດຍີ່ປຸ່ນ ທີ່ໄດ້ຊຸກຍູ້ ແລະ ຂົນຂວາຍ ບັນດາໂຄງການຮ່ວມມື ແລະ ຊ່ວຍເຫຼືອຈາກລັດຖະບານຍີ່ປຸ່ນແກ່ ສປປ ລາວ ຕະຫຼອດໄລຍະຜ່ານມາ. ພິເສດ ກໍແມ່ນການສະໜັບສະໜູນ ສປປ ລາວ ໃນການເປັນປະທານອາຊຽນ ໃນປີ 2024 ທີ່ຈະມາເຖິງນີ້ ແລະ ການອະນຸມັດງົບປະມານເພີ່ມເຕີມໃຫ້ແກ່ ໂຄງການປັບປຸງອາຄານ ແລະ ສະໜອງອຸປະກອນທົດລອງ ໃຫ້ແກ່ ຄະນະວິສະວະກໍາສາດ, ມະຫາວິທະຍາໄລແຫ່ງຊາດ ຂອງ ສປປ ລາວ. ນ້ອກຈາກນັ້ນ, ທ່ານ ຮອງລັດຖະມົນຕີ ໂພໄຊ ໄຂຄຳພິທູນ ກໍໄດ້ສະເໜີໃຫ້ ກົມອາຊີຕາເວັນອອກ ສ່ຽງໃຕ້ ແລະ ຕາເວັນຕົກສ່ຽງໃຕ້ ກໍຄືກະຊວງການຕ່າງປະເທດຍີ່ປຸ່ນ ສືບຕໍ່ການປະສານງານ ແລະ ເຮັດວຽກຮ່ວມກັບ ພາກສ່ວນກ່ຽວຂ້ອງຂອງຝ່າຍລາວ ເພື່ອຮັດແໜ້ນການຮ່ວມມືໃນຕໍ່ໜ້າ ໂດຍສະເພາະການເພີ່ມທະວີການຮ່ວມມື ໃນຂົງເຂດເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ ໃຫ້ຫຼາຍຂຶ້ນຕື່ມໃນຕໍ່ໜ້າ.

ທ່ານ ອາຣິມະ ຢູທະກະ, ຫົວໜ້າກົມອາຊີຕາເວັນອອກ ສ່ຽງໃຕ້ ແລະ ຕາເວັນຕົກສ່ຽງໃຕ້, ກະຊວງການຕ່າງປະເທດຍີ່ປຸ່ນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ ແລະ ໄດ້ຢືນຢັນຄືນຄໍາໝາຍໝັ້ນຂອງຕົນ ໃນການເຮັດວຽກຢ່າງໃກ້ຊິດກັບຄູ່ຮ່ວມຕໍາແໜ່ງຝ່າຍລາວ ແລະ ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ປະເທດຍີ່ປຸ່ນ ເພື່ອຊຸກຍູ້ສົ່ງເສີມຂອບການຮ່ວມມືສອງຝ່າຍ, ການຮ່ວມມື ເພື່ອສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ. ພ້ອມດຽວກັນນັ້ນ, ສອງຝ່າຍ ຍັງໄດ້ສະເໜີແລກປ່ຽນຄໍາຄິດເຫັນກ່ຽວກັບ ສະພາບການ ແລະ ບັນຫາໃນພາກພື້ນ ແລະ ສາກົນ ຈໍານວນໜຶ່ງ ທີ່ສອງຝ່າຍມີຄວາມສົນໃຈຮ່ວມກັນ.

ໃນໂອກາດດຽວກັນ, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ຍັງໄດ້ຝາກຄວາມຢື້ຢາມຖາມຂ່າວ ໄປຍັງ ທ່ານ  ທະເກອິ ຊຸນຊຶເກະ, ຮອງລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ສະແດງຄວາມຍິນດີທີ່ຈະເຮັດວຽກ ແລະ ແລກປ່ຽນຄຳຄິດເຫັນກັບ ທ່ານ ຮອງລັດຖະມົນຕີ ທະເກອິ ອີກຄັ້ງ ໃນໂອກາດຈະເດີນທາງໄປຢ້ຽມຢາມ ປະເທດຍີ່ປຸ່ນ ໃນອະນາຄົດໃກ້ນີ້.