ວັນທີ 2 ກຸມພາ 2023, ທີ່ ກອງເລຂາອາຊຽນ, ຈາກາກຕາ, ອິນໂດເນເຊຍ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ພາຍໃຕ້ການເປັນປະທານຂອງ ອິນໂດເນເຊຍ ເພື່ອກະກຽມໃຫ້ແກ່ ກອງປະຊຸມລັດຖະມົນຕີຕ່າງປະເທດ ທີ່ຈະຈັດຂື້ນໃນວັນທີ 3-4 ກຸມພາ 2023.

     ກອງປະຊຸມຄັ້ງນີ້ ໄດ້ຮັບຊາບ ບູລິມະສິດສໍາລັບການເປັນປະທານອາຊຽນຂອງ ອິນໂດເນເຊຍໃນປີ 2023 ແລະ ໄດ້ປຶກສາຫາລືກ່ຽວກັບຄວາມຄືບໜ້າໃນການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊຽນຄັ້ງທີ 40 ແລະ 41 ແລະ ກອງປະຊຸມສຸດຍອດທີ່ກ່ຽວຂ້ອງ ເປັນຕົ້ນເປັນແມ່ນການເສີມສ້າງປະຊາຄົມອາຊຽນໃຫ້ມີຄວາມເຂັ້ມແຂງ, ການກະກຽມຮ່າງວິໄສທັດປະຊາຄົມອາຊຽນ ຫຼັງປີ 2025, ການສ້າງແຜນດໍາເນີນງານໃນການຮັບເອົາ ຕີມໍເເລັດເຕ ເຂົ້າເປັນ ສະມາຊິກອາຊຽນ, ການຜັນຂະຫຍາຍຄໍາຕົກລົງ ຂອງຜູ້ນໍາອາຊຽນ ວ່າດ້ວຍ ການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນໍາອາຊຽນ ກ່ຽວກັບ ມຽນມາ, ຖະເເຫຼງການຜູ້ນໍາອາຊຽນ ວ່າດ້ວຍ ການເຊື່ອມສານ 4 ຂົງເຂດບູລິມະສິດການຮ່ວມມືພາຍໃຕ້ເເນວຄວາມຄິດອາຊຽນ ກ່ຽວກັບ ອິນໂດ-ປາຊີຟິກ, ການສະໝັກເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ຂອງ ຊາອຸດິອາຣັບບີ ແລະ ມານດິບ.

     ກອງປະຊຸມ ຍັງໄດ້ປຶກສາຫາລື ກ່ຽວກັບ ການຮັດແໜ້ນການພົວພັນກັບພາຍນອກ, ລວມທັງການກະກຽມການຈັດກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ ກັບບາງຄູ່ເຈລະຈາອາຊຽນ ເຊັ່ນ: ການຈັດກອງປະຊຸມສຸດຍອດສະເຫຼີມສະຫຼອງອາຊຽນ-ຍີ່ປຸ່ນ ໃນປີ 2023 ແລະ ອາຊຽນ-ອົດສະຕຣາລີ ໃນປີ 2024.

      ພາຍຫຼັງສໍາເລັດກອງປະຊຸມເຈົ້າໜ້າທີ່ອາວຸໂສອາຊຽນ, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ສືບຕໍ່ເຂົ້າຮ່ວມກອງປະຊຸມຄະນະກໍາມະການ ວ່າດ້ວຍ ເຂດປອດອາວຸດນິວເຄລຍໃນອາຊີຕາເວັນອອກສ່ຽງໃຕ້ ເພື່ອປຶກສາຫາລື ກ່ຽວກັບ ຄວາມເປັນໄປໄດ້ໃນການອະນຸຍາດໃຫ້ປະເທດທີ່ມີນິວເຄຣຍ ຮ່ວມລົງນາມ ໃນອະນຸສັນຍາຂອງສົນທິສັນຍາ ວ່າດ້ວຍ ເຂດປອດອາວຸດນິວເຄຣຍໃນອາຊີຕາເວັນອອກສ່ຽງໃຕ້.

---------------------------