ໃນ​ວັ​ນ​ທີ 7 ມິ​ຖຸ​ນາ 2021, ທີ່ ເມືອງ​ຊົງ​ຊິງ, ສ​ປຈີນ, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ທັງ​ເປັນ​ຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສອ​າ​ຊຽນຂອງ ສ​ປ​ປ ລ​າວໄດ້​ນຳ​ພາ​ຄະ​ນະ​ຜູ້​ແທນ​ລາວ ເຂົ້າ​ຮ່ວ​ມກອງປະຊຸມເຈົ້າໜ້າທີ່ອາວຸໂສ ວ່າດ້ວຍ ການຈັດຕັ້ງປະຕິບັດຖະແຫຼງການແຫ່ງການປະພຶດ ຂອງບັນດາຝ່າຍໃນທະເລຈີນໃຕ້ ຄັ້ງທີ 19, ພາຍ​ໃຕ້​ການ​ເປັນ​ປະ​ທານ​ຮ່ວ​ມຂອງຟີ​ລິບ​ປິນ ແລະ ສ​ປ ຈີນໃນ, ​ໂອ​ກາດກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ ​ອາ​ຊຽນ-ຈີນ ສະ​ໄໝ​ພິ​ເສດ ເພື່ອ​ສະ​ເຫຼີມ​ສະຫຼອງ ​ຄົບ​ຮອບ 30 ປີ ແຫ່ງ​ການ​ພົວ​ພັນ​ຮ່ວມ​ມື ອາ​ຊຽນ-ຈີນ. ກອງ​ປະ​ຊຸມ​ຄັ້ງ​ນີ້ ຖື​ເປັນ​ຄັ້ງ​ທຳ​ອິດ ​ທີ່​ບັນ​ດ​າ​ເຈົ້າ​ໜ້າ​ທີ່​ອາ​ວຸ​ໂສ​ອາ​ຊຽນ ແລະ ສ​ປ ຈີນ ໄດ້​ມີ​ໂອ​ກາດ​ພົບ​ປະ​ກັນ​ແບບ ​ເຊິ່ງ​ໜ້າພາຍຫຼັງ​ທີ່​ມີ​ການ​ແຜ່​ລະ​ບາດ​ຂອງ​ພະ​ຍາດ​ໂຄ​ວິດ-19 ນັບ​ຕັ້ງ​ແຕ່​ທ້າຍ​ປີ 2019 ເປັນ​ຕົ້ນ​ມາ.

ໃນກອງປະຊຸມ, ບັນດາເຈົ້າໜ້າທີ່ອາວຸໂສ ຂອງບັນດາປະເທດສະມາຊິກອາຊຽນ ແລະ ສປ ຈີນ ໄດ້ທົບທວນຄືນການ ຈັດຕັ້ງປະຕິບັດຖະແຫຼງການແຫ່ງການປະພຶດ ຂອງບັນດາຝ່າຍໃນທະເລຈີນໃຕ້ ຫຼື ດີ​ໂອ​ຊີ ພ້ອມທັງຕີລາຄາສູງຕໍ່ຄວາມ​ຄືບ​ໜ້າ​ໃນ​ການຈັດຕັ້ງປະຕິບັດ​ບັນ​ດາ​ກິ​ດຈະ​ກຳ ແລະ ຂໍ້​ລິ​ເລີ່ມ ແນ​ໃສ່​ສົ່ງ​ເສີ​ມ​ຄວາມ​ໄວ້​ເນື້ອ​ເຊື່ອ​ໃຈ ແລະ ຄວາມ​ເຊື່ອ​ໝັ້ນ ເຊິ່ງ​ກັນ ແລະ ກັນ ລະ​ຫວ່າງ ​ບັນ​ດາ​ປະ​ເທດ​ສະ​ມາ​ຊິກອາ​ຊຽນ ແລະ ສ​ປ ຈີນໃນ​ທ່າມ​ກາງ​ການ​ແຜ່​ລະ​ບາດ​ ຂອງ​ພະ​ຍາດ​ໂຄວິດ-19. ພ້ອມ​ດຽວ​ກັນ​ນີ້, ກອງ​ປະ​ຊູມໄດ້​ຕົກ​ລົງ​ເຫັນ​ດີ ໃຫ້​ລິ​ເລີ່ມ​ການ​ປຶກ​ສາ​ຫາ​ລືການ​ຮ່າງແຜນວຽກ ເພື່ອຈັດຕັ້ງປະຕິບັດ ດີໂອຊີ ສະບັບ​ໃໝ່ສໍາລັບສົກປີ 2022-2026, ລວມ​ທັງຊຸກ​ຍູ້ໃຫ້​ຈັດ​ຕັ້ງ​ປະ​ຕິ​ບັດ​ບັນ​ດາ​ກິ​ດຈະ​ກຳ ແລະ ຂໍ້​ລິ​ເລີ່ມ ​ທີ່​ຍັງ​ຄົງ​ຄ້າງ ພາຍ​ໃຕ້​ແຜນ​ວຽກ ດີໂອຊີ ສຳ​ລັບ​ສົກປີ 2016-2021 ໃຫ້​ເປັນ​ຮູບ​ປະ​ທຳ.

ນອກຈາກ​ນີ້, ບັນ​ດາ​ປະ​ເທດສະ​ມາ​ຊິກອາ​ຊຽນ ແລະ ສ​ປ ຈີນ ໄດ້ເຫັນດີເປັນເອກະພາບ ກ່ຽວກັບ ຄວາມສໍາຄັນໃນການລິເລີ່ມ ການເຈລະຈາ ດ້ານເນື້ອໃນ ໂດຍ​ໝູນ​ໃຊ້​ຊ່ອງ​ທາງ​ດີ​ຈີ​ຕອນ ເນື່ອງຈາກສະພາບການແຜ່ລະບາດ ຂອງພະຍາດໂຄວິດ-19 ຍັງສືບຕໍ່ແຜ່ລະບາດເປັນວົງກ້ວາງຢູ່ໃນພາກພື້ນ ເພື່ອ​ກະ​ກຽມ​ໃຫ້​ແກ່​ຂະ​ບວນການ​ລິ​ເລີ່ມ​ການ​ເຈ​ລະ​ຈາ​ຮ່າງ​ກົດ​ແຫ່ງ​ການ​ປະ​ພຶດ ຫຼື ຊີ​ໂອ​ຊີ ຮອບ​ທີ​ສອງ ໃຫ້​ສາ​ມາດ​ສຳ​ເລັດພາຍ​ໃນ​ເວ​ລາ​ທີ່​ໄດ້​ກຳ​ນົດ​ໄວ້.

------------------//------------------