ໃນວັນທີ 7 ເມສາ 2021 ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ແບບທາງໄກ, ພາຍໃຕ້ການເປັນປະທານອາຊຽນຂອງ ບຣູໄນ ດາຣູຊາລາມ (ປະທານອາຊຽນ ສົກປີ 2021) ແລະ ມີການເຂົ້າຮ່ວມຂອງບັນດາເຈົ້າໜ້າທີ່ອາວຸໂສປະເທດອາຊຽນອື່ນ ແລະ ຮອງເລຂາທິການໃຫຍ່ອາຊຽນຢ່າງພ້ອມພຽງ.
ກອງປະຊຸມໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດບັນດາບູລິມະສິດການເປັນປະທານອາຊຽນຂອງ ບຣູໄນ ດາຣູຊາລາມ ສົກປີ 2021 ພາຍໃຕ້ຄຳຂວັນ: “ພວກເຮົາຫ່ວງໄຍ, ພວກເຮົາກຽມພ້ອມ, ພວກເຮົາພ້ອມກັນຈະ ເລີນ” (We Care, We Prepare, We Prosper). ພ້ອມກັນນັ້ນ, ກອງປະຊຸມກໍໄດ້ຮັບຊາບການຈັດຕັ້ງປະຕິບັດບັນດາຂໍ້ລິເລີ່ມອາຊຽນ ເພື່ອຮັບມື ແລະ ແກ້ໄຂຜົນກະທົບຈາກການແຜ່ລະບາດຂອງພະຍາດໂຄວິດ-19 ເປັນຕົ້ນ: ການຜັນຂະ ຫຍາຍແຜນຟື້ນຟູຮອບດ້ານອາຊຽນ, ການນໍາໃຊ້ກອງທຶນອາຊຽນສ່ວນໜຶ່ງ ເພື່ອຈັດຊື້ຢາວັກແຊັງຕ້ານພະຍາດໂຄວິດ-19 ສໍາລັບປະຊາຊົນອາຊຽນ, ການສ້າງຕັ້ງສູນສາທາລະນະສຸກສຸກເສີນ ແລະ ພະຍາດລະບາດພາກພື້ນອາຊຽນ, ການສ້າງແລວການເດີນທາງອາຊຽນ; ແລະ ອື່ນໆ. ນອກນັ້ນ, ກອງປະຊຸມຍັງໄດ້ຮັບຊາບຄວາມຄືບໜ້າ ໃນການກະກຽມຮ່າງວິໄສທັດປະຊາຄົມອາຊຽນ ຫຼັງປີ 2025.
ກອງປະຊຸມ ຍັງໄດ້ປຶກສາຫາລື ກ່ຽວກັບຄວາມຄືບໜ້າໃນການສະເໜີເຂົ້າເປັນພາຄີ ຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ (TAC) ຂອງປະເທດນອກພາກພື້ນ ທີ່ມີຄວາມສົນໃຈ, ແລະ ປຶກສາຫາ ລື ກ່ຽວກັບການຮັດແໜ້ນການພົວພັນກັບພາຍນອກ ລວມທັງການສະເໜີເຂົ້າເປັນຄູ່ຮ່ວມມືກັບອາຊຽນ ຂອງປະເທດນອກພາກພື້ນ.
ສຸດທ້າຍ, ກອງປະຊຸມຍັງໄດ້ປຶກສາຫາລືການກະກຽມເບື້ອງຕົ້ນໃຫ້ແກ່ກອງປະຊຸມສຸດຍອດຜູ້ນໍາອາຊຽນ ແບບບໍ່ເປັນທາງການ ແລະ ກອງປະຊຸມລັດຖະມົນຕີສາມຝ່າຍ ແບບເປີດກວ້າງ ລະຫວ່າງ ອາຊຽນ ແລະ ອັງກິດ.
-----------------------------------------------------------------------------------------