ໃນລະຫວ່າງວັນທີ 4-5 ມີນາ 2021 ທີ່ ຫ້ອງວ່າການ ແຂວງສະຫວັນນະເຂດ, ກະຊວງການຕ່າງປະເທດ, ກົມສົນທິສັນຍາ ແລະ ກົດໝາຍ ໄດ້ຈັດກອງປະຊຸມສຳມະນາ ວ່າດ້ວຍ ການຈັດຕັ້ງປະຕິບັດສົນທິສັນຍາພາກພື້ນ ແລະ ສາ ກົນ ກ່ຽວກັບການຕ້ານອາຊະຍາກຳຂ້າມຊາດ ລວມທັງການຕ້ານການຄ້າມະນຸດໃຫ້ແກ່ເຈົ້າໜ້າທີ່ ແລະ ພະນັກງານພະ ແນກການຕ່າງປະເທດຂອງແຂວງພາກກາງ ແລະ ພາກໃຕ້ ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດຮອງລັດຖະມົນຕີກະຊວງການຕ່າງປະເທດ. ພິເສດ, ທ່ານ ນາງ ຫຼິງທອງ ແສງຕາວັນ, ຄະນະປະຈຳພັກແຂວງ, ຮອງເຈົ້າແຂວງແຂວງສະຫວັນນະເຂດ ໄດ້ໃຫ້ກຽດກ່າວຄຳເຫັນຕ້ອນຮັບ ແລະ ໄດ້ແຈ້ງສະພາບຈຸດພິເສດ ກໍຄື ທ່າແຮງບົ່ມຊ້ອນ ແລະ ຍຸດທະສາດໃນການພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ.ເຂົ້າຮ່ວມກອງປະຊຸມຄັ້ງນີ້ງມີຜູ້ຕາງໜ້າ​ຈາກ​ຂະ​ແໜງ​ການ​ຕ່າງໆ​ທີ່​ກ່ຽວຂ້ອງ​ຂອງແຂວງສະຫວັນນະເຂດ, ບັນດາເຈົ້າໜ້າທີ່ ແລະ ພະແນກການຕ່າງປະເທດ ຈາກແຂວງພາກກາງ ແລະ ພາກໃຕ້, ນັກວິທະຍາກອນ ຈາກສູນກາງ (ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງແຮງງານ ແລະ ສະຫວັດດີການສັງຄົມ, ແລະ ສູນກາງສະຫະພັນແມ່ຍິງລາວ) ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ 60 ທ່ານຢ່າງພ້ອມພຽງ.

ຈຸດປະສົງຂອງກອງປະຊຸມສໍາມະນາຄັ້ງນີ້ ແມ່ນເພື່ອປະກອບສ່ວນ​ເສີມສ້າງຄວາມຮັບຮູ້ ແລະ ຄວາມເຂົ້າໃຈ ກ່ຽວກັບ ​ເນື້ອ​ໃນ ​ແລະ ບັນດາ​ຫລັກການ​ທີ່​ສຳຄັນ​ຂອງບັນດາສົນທິສັນຍາພາກພື້ນ ແລະ ສາກົນທີ່ພົວພັນ​ເຖິງ​ການຕ້ານອາຊະຍາກໍາຂ້າມຊາດ, ລວມທັງຕ້ານການຄ້າມະນຸດ ໃຫ້ແກ່ເຈົ້າໜ້າທີ່ ແລະ ພະນັກງານພະແນກການຕ່າງປະເທດຂອງ ແຂວງພາກກາງ ແລະ ພາກໃຕ້.

ໃນກອງປະຊຸມ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ແຈ້ງວ່າ ໃນລະດັບສາກົນ, ໂດຍສະເພາະອົງການ​ສະຫະ​ປະຊາ​ຊາດ ​​ໄດ້​ໃຫ້​ຄວາມ​ສໍາຄັນ​ເປັນ​ພິ​ເສດ​ ຊຶ່ງໃນ​ປີ 2010 ກອງ​ປະຊຸມສະມັດຊາ​ໃຫ່ຍຂອງ​ອົງການ​ສະຫະ​ປະຊາ​ຊາດ ​ໄດ້​ຮັບຮອງ​ເອົາ​ແຜນ​ປະຕິບັດ​ງານສາ​ກົນ​ ກ່ຽວ​ກັບ ​ການຕ້ານ​ການ​ຄ້າ​ມະນຸດ, ​ໄດ້​ຮັບຮອງ​ເອົາ​ຍັດຕິ​ເລກທີ 192 ກ່ຽວ​ກັບ​ການ​ເພີ່ມ​ທະວີ​ຄວາມ​ພະຍາຍາມ​ໃນ​ການ​ປະສານ​ງານ​ເພື່ອ​ຕ້ານ​ການ​ຄ້າ​ມະນຸດ ໃນປີ 2013 ແລະ ​ຕົກລົງເອົາ​ວັນ​ທີ 30 ກໍລະກົດ ຂອງ​ທຸກໆ​ປີ ​ເປັນ​ວັນ​ສາກົນ​ຕ້ານ​ການ​ຄ້າ​ມະນຸດ. ໃນລະດັບພາກພື້ນ ໂດຍສະເພາະ ອາຊຽນ ກໍໄດ້ກຳນົດເອົາການຕ້ານການຄ້າມະນຸດເປັນວາລະໜຶ່ງທີ່ສຳຄັນຂອງບັນດາປະເທດອາຊຽນ, ໄດ້ຮັບຮອງເອົາຖະແຫລງການຕ້ານການຄ້າມະນຸດ ໂດຍສະເພາະແມ່ຍິງ ແລະ ເດັກນ້ອຍ ໃນວັນທີ 29 ພະຈິກ 2004 ທີ່ ນະຄອນຫລວງວຽງຈັນ, ໄດ້ຮັບຮອງເອົາແຜນປະຕິບັດງານອາຊຽນ ແລະ ສົນທິສັນຍາວ່າດ້ວຍການຕ້ານການຄ້າມະນຸດໂດຍສະເພາະແມ່ຍິງ ແລະ ເດັກນ້ອຍ ໃນປີ 2015 (ສປປ ລາວ ເປັນພາຄີ 2017).

ພ້ອມກັນນັ້ນ, ​ເພື່ອ​ຮ່ວມ​ມື​ກັບສາກົນ ​ແລະ ພາກ​ພື້ນ, ກໍ່​ຄື​ກັບ​ບັນດາ​ປະ​ເທດ​ໄກ້​ຄຽງ, ສປປ ລາວ ພວກເຮົາຍັງໄດ້ເຂົ້າເປັນພາຄີ ແລະ ໃຫ້ສັດຕະຍາບັນສົນທິສັນຍາ ​ແລະ ​ລົງນາມສັນຍາ​ສອງ​ຝ່າຍຫຼາຍສະບັບທີ່ກ່ຽວຂ້ອງກັບການຕ້ານການຄ້າມະນຸດ ເປັນຕົ້ນແມ່ນສົນທິສັນຍາ​ໃນ​ຂົງ​ເຂດສິດທິມະນຸດ,ສົນທິສັນຍາ ວ່າດ້ວຍ ການຕ້ານອາຊະຍາກໍາຂ້າມຊາດທີ່ມີການຈັດຕັ້ງ, ສົນທິສັນຍາ​ກ່ຽວຂ້ອງ​ກັບແຮງງານ ແລະ ອື່ນໆ. ​

ໃນກອງປະຊຸມຄັ້ງນີ້, ບັນດາຜູ້​ເຂົ້າຮ່ວມ ຍັງໄດ້ປຶກສາຫາລື ແລະ ແລກປ່ຽນບົດຮຽນຄໍາຄິດຄໍາເຫັນຊຶ່ງກັນ ແລະ ກັນ ລະຫວ່າງ ເຈົ້າໜ້າທີ່ຂອງເຂດທີ່ມີຄວາມສ່ຽງໃນການຕົກເປັນຜູ້ຖືກເຄາະຮ້າຍຈາກ​ການ​ຄ້າ​ມະນຸດ​ ແລະ ຊອກຫາວິທີແກ້ໄຂທີ່ຖືກຕ້ອງ ແລະ ສອດຄ່ອງກັບລະບຽບການສາກົນ ໂດຍສະເພາະ ສົນທິສັນຍາພາກພື້ນ ແລະ ສາກົນທີ່ ສປປ ລາວ​ ເປັນ​ພາຄີ ​ແລະ ມີ​ພັນທະ​ຈັດ​ຕັ້ງ​ປະຕິບັດ ລວມທັງກົນໄກການຮ່ວມມື ແລະ ຈັດຕັ້ງປະຕິບັດວຽກງານດັ່ງກ່າວຂອງຂະແໜງການທີ່ກ່ຽວຂ້ອງ ໂດຍອີງໃສ່ກົດໝາຍ ແລະ ລະບຽບການພາຍໃນ ຂອງ ສປປ ລາວ. ພ້ອມດຽວກັນນັ້ນ, ກໍ​ໄດ້​ຮັບຊາບ​ວຽກ​ງານ​ຕ່າງ​ໆ ທີ່​ພົວພັນ ​ແລະ ປິ່ນ​ອ້ອມ ກ່ຽວກັບ ​ການ​ສະກັດ​ກັ້ນ ​ແລະ ຕ້ານ​ການ​ຄ້າ​ມະນຸດ​ຂອງ ສປປ ລາວ.