ໃນວັນທີ 04 ມີນາ 2019, ຢູ່ທີ່ກະຊວງການຕ່າງປະເທດ ໄດ້ມີການພົບປະສອງກະຊວງຕ່າງປະເທດ ແຫ່ງ ສປປ ລາວ ແລະ ສ.ເຊັກ, ໂດຍ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີ ກະຊວງການຕ່າງປະເທດ ໄດ້ຕ້ອນ ຮັບການເຂົ້າພົບປະ ຂອງ ທ່ານ ມິໂຣສະເລັບ ສະຕາເຊັກ(Miloslav Stasek), ຮອງລັດຖະມົນຕີການຕ່າງປະເທດ ແຫ່ງ ສາທາລະນະລັດ ເຊັກ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ເນື່ອງໃນໂອກາດທີ່ຄະນະມາເຂົ້າຮ່ວມກອງປະຊຸມປະຈຳປີ ຂອງບັນດາຫົວໜ້າສຳນັກງານສະຖານທູດ ສ. ເຊັກ ປະຈຳ ອາຊີ-ປາຊີຟິກ, ທີ່ຈັດຂຶ້ນຢູ່ນະຄອນຫຼວງວຽງຈັນ ໃນລະຫວ່າງວັນທີ 1-4 ມີນາ 2019. ໃນໂອກາດດຽວກັນ ກໍ່ເພື່ອສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືອັນດີງາມມີມາແຕ່ຍາວນານ ລະຫວ່າງ ສອງປະເທດ ລາວ ແລະ ສ. ເຊັກ.

ສປປ ລາວ ແລະ ສ.ເຊັກ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 5 ກັນຍາ 1962. ຕະຫຼອດໄລຍະທີ່ຜ່ານມາ ສອງປະເທດໄດ້ມີການພົວພັນກັນຢ່າງເປັນປົກກະຕິ. ສອງປະເທດໄດ້ໃຫ້ການຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນ ໃນກອບສອງຝ່າຍ ແລະ ຫຼາຍຝ່າຍ ໃນເວທີພາກພື້ນ ແລະ ສາກົນ.

ໃນການປະຊຸມພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມືໃນໄລຍະຜ່ານມາ, ຊຶ່ງ ສ. ເຊັກ ໄດ້ຊ່ວຍສ້າງຊັບພະຍາກອນມະນຸດ ໃຫ້ແກ່ລາວເຮົາເປັນຈຳນວນຫຼາຍສົມຄວນ ແລະ ໃນຕໍ່ໜ້າສະເໜີໃຫ້ສືບຕໍ່ຮ່ວມມືກັນໃນຂະແໜງສຶກສານີ້, ນອກນັ້ນ ຊຸກຍູ້ໃຫ້ ສ. ເຊັກ ມາສຶກສາຄວາມເປັນໄປໄດ້ໃນການລົງທຶນຢູ່ລາວ ແລະ ໄດ້ທັງແລກປ່ຽນຄຳຄິດເຫັນ ເຊິ່່ງກັນ ແລະ ກັນ ກ່ຽວກັບ ສະພາບການພັດທະນາເສດຖະກິດ-ສັງຄົມອັນພົ້ນເດັ່ນຂອງແຕ່ລະປະເທດ ກໍ່ຄື ບັນຫາພາຍໃນພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈ. ພ້ອມກັນນັ້ນ, ສອງຝ່າຍຍັງໄດ້ປຶກສາຫາລືທິດທາງການເສີມຂະຫຍາຍການຮ່ວມມືກັນໃຫ້ນັບມື້ນັບເຂັ້ມແຂງ ແລະ ມີບາດກ້າວອັນໃໝ່ ໂດຍແນ່ໃສ່ຜົນປະໂຫຍດຂອງປະຊາຊົນສອງຊາດ ເພື່ອປະກອບ ສ່ວນເຂົ້າໃນພາລະກິດສ້າງສາສັນຕິພາບ, ແລະ ການຮ່ວມມືເພື່ອການພັດທະນາພາຍໃນພາກພື້ນ ແລະ ໃນໂລກ.

         ນອກຈາກນັ້ນ, ຄະນະຜູ້ແທນ ສ. ເຊັກ ຍັງໄດ້ເຂົ້າຮ່ວມ ພິທີເປີດອາຄານຫຼັງໃໝ່ຂອງໂຮງໝໍມິດຕະພາບ 150 ຕຽງ, ຊຶ່ງການກໍ່ສ້າງອາຄານດັ່ງກ່າວ ແມ່ນໄດ້ຮັບການຮ່ວມມືດ້ານວິຊາການຈາກບໍລິສັດຮັບເໝົາກໍ່ສ້າງ ຂອງ ສ. ເຊັກ ແລະ ໄດ້ຮັບການຕ້ອນຮັບຢ່າງອົບອຸ່ນ ຈາກ ຄະນະນຳຂອງ ກະຊວງສາທາລະນະສຸກ ແລະ ແພດໝໍ ຂອງ ໂຮງໝໍມິດຕະພາບ 150 ຕຽງ ເປັນຈຳນວນຫຼວງຫຼາຍ, ຊຶ່ງໃຫ້ກຽດເປັນປະທານໃນການຕ້ອນຮັບຄະນະຜູ້ແທນ ສ. ເຊັກ ຄັ້ງນີ້ ໃນພິທີເປີດອາຄານໂຮງໝໍ 150 ຕຽງດັ່ງກ່າວ ໂດຍແມ່ນ ທ່ານ ຮສ. ດຣ ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ແຫ່ງ ສປປ ລາວ.