ໃນລະຫວ່າງວັນທີ 16-20 ພະຈິກ 2018 ທີ່ຜ່ານມາ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານການສຳຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ(MIA), ທ່ານ ພົນຕີ ຄໍາສີ ວົງຄໍາຊາວ, ຫົວໜ້າຫ້ອງວ່າການກະຊວງປ້ອງກັນປະເທດ, ຄະນະຊີ້ນໍາວຽກງານ MIA ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ ໄດ້ເດີນທາງໄປຢ້ຽມຢາມການປະຕິບັດງານຢູ່ພາກສະໜາມ ຂອງຄະນະວິຊາການຮ່ວມ ລາວ-ອາເມລິກາ ໃນການສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ, ຄັ້ງທີ 01 ປະຈໍາສົກປີ 2018-2019, ຢູ່ເຂດແຂວງຊຽງຂວາງ.
ການເດີນທາງໄປຢ້ຽມຢາມຂອງຄະນະດັ່ງ ກ່າວໃນຄັ້ງນີ້ແມ່ນເພື່ອຕິດຕາມ ແລະ ກວດກາການປະຕິບັດງານໃນວຽກງານດ້ານມະນຸດສະທຳ, ເພື່ອເປັນການສະແດງເຖິງ ຄວາມເອົາໃຈໃສ່ຊີ້ນໍາ ນໍາພາຈາກເຈົ້າໜ້າທີ່ຂັ້ນສູງຂອງລັດຖະບານ ແຫ່ງ ສປປ ລາວ ໃນການແກ້ໄຂບັນຫາຄົນອາເມ ລິກາ ທີ່ຫາຍສາບສູນໃນປາງສົງຄາມຢູ່ລາວຕາມການຮ້ອງຂໍຂອງລັດຖະບານອາເມລິກາ ແລະ ຖືໂອກາດລົງຢ້ຽມຢາມຖາມຂ່າວແກ່ບັນດາອ້າຍ, ເອື້ອຍ, ນ້ອງ ແລະ ພໍ່ແມ່ປະຊາຊົນ ທີ່ພວມປະຕິບັດງານຢູ່ພາກສະໜາມເພື່ອປຸກລະດົມກໍາລັງໃຈ ແລະ ມີຄວາມທຸ່ນທ່ຽງໃນການປະຕິບັດໜ້າທີ່ຂອງຕົນໃຫ້ສໍາເລັດຕາມທີ່ໄດ້ຄາດໝາຍໄວ້.
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ MIAໄດ້ໃຫ້ກຽດຂຶ້ນໂອ້ລົມຕໍ່ບັນດາພະນັກງານວິຊາການປະຈໍາພາກສະໜາມຈາກ ກະຊວງການຕ່າງປະເທດ, ກະຊວງປ້ອງກັນປະເທດ ແລະ ອໍານາດການປົກຄອງທ້ອງຖິ່ນທີ່ກ່ຽວຂ້ອງ ໂດຍການເປັນກຽດເຂົ້າຮ່ວມຂອງທ່ານຫົວໜ້າຫ້ອງວ່າການປົກຄອງແຂວງຊຽງຂວາງ, ທ່ານເຈົ້າເມືອງເມືອງຄໍາ ແລະ ເມືອງໜອງແຮດ ຢູ່ທີ່ຄ້າຍພັກເມືອງຄໍາ, ແຂວງຊຽງຂວາງ. ນອກນີ້, ຄະນະຍັງໄດ້ເຄື່ອນໄຫວຢ້ຽມຢາມການປະຕິບັດງານຕົວຈິງຢູ່ຈຸດຂຸດຄົ້ນ, ເຂດເມືອງຄໍາ, ເມືອງໜອງແຮດ ແລະ ຮັບຟັງການລາຍງານສະພາບການປະຕິບັດວຽກງານຢູ່ແຕ່ລະຈຸດຂຸດຄົ້ນ ຈາກຫົວໜ້າພາກສະໜາມຝ່າຍລາວ ແລະ ຝ່າຍອາເມລິກາ, ຊື່ງມີຄວາມເປັນເອກະພາບກັນວ່າການປະຕິບັດງານແມ່ນໄດ້ດໍາເນີນໄປດ້ວຍບັນຍາກາດອັນດີ, ທັງນີ້, ກໍຍ້ອນຄວາມເອົາ ໃຈໃສ່ ແລະ ຄວາມຮັບຜິດຊອບສູງໃນການປະຕິບັດໜ້າທີ່ຂອງພະນັກງານວິຊາການທັງສູນກາງ ແລະ ທ້ອງຖິ່ນກໍຄືການອູ້ມຊູສະໜັບສະໜູນຂອງພໍ່ແມ່ປະຊາຊົນລາວທີ່ດໍາລົງຊີວິດຢູ່ບໍລິເວນດໍາເນີນການຂຸດຄົ້ນຕົວຈິງ.
ໃນໄລຍະຜ່ານມາ, ລັດຖະບານ ກໍ່ຄືປະຊາຊົນລາວ ໄດ້ໃຫ້ການຮ່ວມມືເປັນຢ່າງດີໃນວຽກງານມະນຸດສະທໍາຕໍ່ກັບຝ່າຍສະຫະລັດ, ທັງນີ້ແມ່ນແນໃສ່ນໍາເອົາສິ່ງເສດເຫຼືອຂອງທະຫານອາເມລິກາ ທີ່ເສຍຊີວິດໃນປາງສົງຄາມຢູ່ລາວ ສົ່ງຄືນໃຫ້ຄອບຄົວຂອງພວກກ່ຽວເທົ່າທີ່ສາມາດຊອກຄົ້ນໄດ້.
ການຮ່ວມມືໃນດ້ານນີ້ ໄດ້ຮັບຜົນສຳເລັດເປັນຢ່າງດີໂດຍຕະຫຼອດມາ ກໍ່ຍ້ອນມີການຮ່ວມມືຂອງລັດຖະບານ, ເຈົ້າໜ້າທີ່ກ່ຽວຂ້ອງຂອງລາວທຸກໆຂັ້ນແຕ່ສູນກາງລົງຮອດທ້ອງຖິ່ນ ແລະ ການຮ່ວມມືອັນດີຂອງປະຊາຊົນລາວບັນດາເຜົ່າ, ອັນເປັນການສະແດງໃຫ້ເຫັນເຖິງນະໂຍບາຍມະນຸດສະທຳ ອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ປະຊາຊົນອາເມລິກາ, ໂດຍສະເພາະຕໍ່ຄອບຄົວຍາດພີ່ນ້ອງຂອງຜູ້ທີ່ຫາຍສາບສູນໃນປາງສົງຄາມຢູ່ລາວ.