ໃນວັນທີ 16-17 ສິງຫາ 2018 ທີ່ ສູນຝຶກອົບຮົມ ແລະ ການຮ່ວມມືສາກົນຫຼັກ, ນະຄອນຫຼວງວຽງຈັນ ກະຊວງ​ການ​ຕ່າງປະ​ເທດ ​ໄດ້​ຈັດ​ຕັ້ງ​ກອງ​ປະຊຸມເຜີຍແຜ່ນິຕິກຳຂອງ ສປປ ລາວ ທີ່ພົວພັນກັບຂະແໜງການຕ່າງປະເທດ ຈຳນວນ 02 ສະບັບຄື: ກົດໝາຍ ວ່າດ້ວຍ ສົນທິສັນຍາ ແລະ ສັນຍາສາກົນ, ກົດໝາຍ ວ່າດ້ວຍ ການເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ ພາຍ​ໃຕ້ການ​ເປັນ​ປະທານຮ່ວມຂອງ ​ທ່ານ ນາງ. ຄໍາເພົາ ​ເອີນ​ທະ​ວັນ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ໂດຍມີບັນດາທ່ານຫົວໜ້າຫ້ອງການ, ຫົວໜ້າກົມ, ຮອງຫົວໜ້າຫ້ອງການ, ຮອງຫົວໜ້າກົມ, ຫົວໜ້າ, ຮອງຫົວໜ້າພະແນກ ແລະ ຜູ້ຕາງໜ້າຈາກບັນດາກົມພາຍໃນກະຊວງການຕ່າງປະເທດ, ບັນດາກະຊວງ ແລະ ອົງການທີ່ກ່ຽວຂ້ອງເຂົ້່າຮ່ວມທັງໝົດຈຳນວນ 130 ທ່ານ.

ຜູ້ເຂົ້າຮ່ວມກອງປະຊຸມໄດ້ຮັບຟັງການສະເໜີເນື້ອໃນຂອງກົດໝາຍ ວ່າດ້ວຍ ສົນທິສັນຍາ ແລະ ສັນຍາສາກົນ, ຊຶ່ງຖືກຮັບຮອງໂດຍສະພາແຫ່ງຊາດ ໃນວັນທີ 8 ພຶດສະພາ 2017 ໂດຍແມ່ນທ່ານ ສົມຄິດ ວັນຄຳ, ຮອງຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດເປັນຜູ້ບັນຍາຍ. ຈຸດປະສົງແມ່ນສືບຕໍ່ເຜີຍແຜ່ກົດໝາຍສະບັບນີ້ເພື່ອສ້າງຄວາມຮັບຮູ້ ແລະ ເຂົ້າໃຈໃຫ້ແກ່ພະນັກງານ-ລັດຖະກອນກະຊວງການຕ່າງປະເທດ, ບັນດາກະຊວງ ແລະ ອົງການທີ່ກ່ຽວຂ້ອງ ເພື່ອຮັບ ປະກັນການຈັດຕັ້ງປະຕິບັດກົດໝາຍດັ່ງກ່າວຢ່າງເປັນເອກະພາບ ແລະ ມີປະສິດທິຜົນສູງ.

ໃນກອງປະຊຸມຜູ້ເຂົ້າຮ່ວມຍັງໄດ້ຮັບຟັງການສະເໜີເນື້ອໃນຂອງກົດໝາຍ ວ່າດ້ວຍ ການເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ ຊຶ່ງຖືກຮັບຮອງໂດຍສະພາແຫ່ງຊາດ ໃນວັນທີ 24 ທັນວາ 2014 ໂດຍແມ່ນ ທ່ານ ພັທ ພູນສະຫວັດ ວໍລະລາດ, ຮອງຫົວໜ້າກົມຄຸ້ມຄອງຄົນຕ່າງປະເທດ, ກະຊວງປ້ອງກັນຄວາມສະຫົງບເປັນຜູ້ບັນຍາຍ. ຈຸດປະສົງແມ່ນເພື່ອສ້າງຄວາມຮູ້ ແລະ ເຂົ້າໃຈ ໃຫ້ພະນັກງານ-ລັດຖະກອນຂອງຂະແໜງການຕ່າງປະເທດ ກ່ຽວກັບ ລະບຽບການ ແລະ ຂັ້ນຕອນຕ່າງທກ່ຽວກັບການເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ. ໃນກອງປະຊມ, ຜູ້ເຂົ້າຮ່ວມຍັງໄດ້ແລກປ່ຽນຄຳຄິດເຫັນກ່ຽວກັບບັນຫາຕົວຂີງທີ່ພົບພໍ້ໃນການປະສານງານດ້ານການສ້າງ ແລະ ການປະຕິບັດສົນທິສັນຍາ ແລະ ສັນຍາສາກົນໃນໄລຍະຜ່ານມາ ແລະ ຍົກບັນຫາໃຫ້ເຫັນຕົວຈີງຕ່າງໆທີ່ພົວພັນກັບການເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ.