ໃນວັນທີ 03 ມັງກອນ 2018, ທີ່ ກະຊວງການຕ່າງປະເທດ, ຄະນະຮັບຜິດຊອບ ໄດ້ຈັດກອງປະຊຸມເພື່ອປຶກສາຫາລືຮ່າງຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ ແລະ ຮ່າງຂໍ້ຕົກລົງວ່າດ້ວຍມາດຖານຕຳແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ພາຍໃຕ້ການເປັນປະທານຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ. ກອງປະຊູມ ໄດ້ພ້ອມກັນລະດົມຄວາມຄິດເຫັນ ແລະ ປຶກສາຫາລື 02 ຮ່າງນິຕິກຳດັ່ງກ່າວ ຢ່າງເລິກເຊິ່ງ ແລະ ກົງໄປກົງມາ ເພື່ອຮັບປະກັນໃຫ້ມີເນື້ອໃນລະອຽດ ແລະ ຄົບຖ້ວນ. ຫຼັງຈາກນັ້ນ, ກອງປະຊຸມ ໄດ້ຕົກລົງເປັນເອກະພາບ ຮັບຮອງເອົາເນື້ອໃນຮ່າງເບື້ອງຕົ້ນຂອງນິຕິກຳທັງ 02 ສະບັບ ເພື່ອນຳໄປທາບທາມຄວາມຄິດເຫັນນຳອົງການປົກຄອງຂັ້ນແຂວງໃນຂອບເຂດທົ່ວປະເທດ, ຊຶ່ງການນຳເອົາ 02 ນິຕິກຳດັ່ງກ່າວລົງໄປທາບທາມ ຄາດວ່າ ຈະສຳເລັດໃນຕົ້ນປີ 2018 ທີ່ຈະມາເຖິງນີ້.