ໃນຕອນເຊົ້າຂອງວັນທີ 21 ກໍລະກົດ 2017, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ອີກາ ເປກາ ເອັນເຕໂຣ ສີມີລາ (Ilkka-PekkaSimila), ເອກອັກຄະລັດຖະທູດ ແຫ່ງ ສາທາລະນະລັດ ແຟັງລັງ ປະຈຳ ສປປ ລາວ, ໃນໂອກາດທີ່ສຳເລັດການປະຕິບັດໜ້າທີ່ການທູດຢູ່ ສປປ ລາວ, ຊຶ່ງມີສຳນັກງານຕັ້ງຢູ່ ຮ່າໂນ້ຍ, ສສ ຫວຽດນາມ.
ໃນໂອກາດນີ້, ທ່ານ ແສງເພັດ ຮຸ່ງບຸນຍວງ ກໍ່ໄດ້ສະແດງຄວາມຊົມເຊີຍຕໍ່ຜົນສຳເລັດຂອງການປະຕິບັດໜ້າທີ່ການທູດຢູ່ ສປປ ລາວ, ພ້ອມທັງສະແດງຄວາມຂອບໃຈ ທີ່ທ່ານທູດ ໄດ້ປະກອບສ່ວນຢ່າງຫ້າວຫັນໃນການຊຸກຍູ້ເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ລາວ-ແຟັງລັງ ໃຫ້ນັບມື້ດີຂຶ້ນເລື້ອຍໆ. ພ້ອມນີ້, ທ່ານຮອງລັດຖະມົນຕີ ໄດ້ຕີລາຄາສູງຕໍ່ການສະໜັບສະໜູນຊ່ວຍເຫຼືອຂອງລັດຖະບານ ແລະ ປະຊາຊົນ ແຟັງລັງ ເຂົ້າໃນຂົງເຂດວຽກງານຕ່າງໆຂອງ ສປປ ລາວ, ເປັນຕົ້ນແມ່ນການພັດທະນາພະລັງງານແບບຍືນຍົງ, ການຈັດສັນຊັບພະຍາກອນປ່າໄມ້ແບບຍືນຍົງ, ການຄຸ້ມຄອງສິ່ງແວດລ້ອມ ແລະ ການສ້າງຄວາມເຂັ້ມແຂງໃຫ້ແກ່ການບໍລິການດ້ານແຜນທີ່ແຫ່ງຊາດ ແລະ ກົດໝາຍສາກົນ, ຊຶ່ງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ. ພ້ອມດຽວກັນນັ້ນ, ກໍ່ໄດ້ສະເໜີໃຫ້ທັງສອງຝ່າຍສືບຕໍ່ໃຫ້ການສະໜັບສະໜູນຊຶ່ງກັນ ແລະ ກັນໃນເວທີສາກົນ ແລະ ພາກພື້ນ ເພື່ອຜົນປະໂຫຍດຂອງສອງປະເທດ ແລະ ການຮ່ວມມືເພື່ອການພັດທະນາ. ສປປ ລາວ ແລະ ສາທາລະນະລັດ ແຟັງລັງ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 21 ມັງກອນ 1975, ຊຶ່ງປີນີ້ແມ່ນຄົບຮອບ 42 ປີ. ໃນປີ 2015 ທີ່ຜ່ານມາ ສອງປະເທດ ໄດ້ຮ່ວມກັນຈັດພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 40 ປີ. ໃນຕອນທ້າຍ, ທ່ານຮອງລັດຖະມົນຕີ ໄດ້ອວຍພອນໃຫ້ທ່ານທູດ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນໜ້າທີ່ໃໝ່ທີ່ຍິ່ງໃຫຍ່ກວ່າເກົ່າ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.
ໃນໂອກາດນີ້, ທ່ານທູດ ກໍ່ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ສ. ແຟັງລັງ ໃນໄລຍະຜ່ານມາ, ສະແດງຄວາມຂອບໃຈຕໍ່ລັດຖະບານ ກໍຄືກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກຕະຫຼອດໄລຍະການປະຕິບັດໜ້າທີ່ວຽກງານການທູດຢູ່ ສປປ ລາວ ຈົນໄດ້ຮັບຜົນສຳເລັດຢ່າງຈົບງາມ.