ໃນໄລຍະວັນທີ 23-24 ພຶດສະພາ 2017, ທ່ານທອງຜ່ານສະຫວັນເພັດ, ຮອງລັດຖະມົນຕີກະຊວງການຕ່າງປະເທດໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມເຈົ້າໜ້າທີ່ອາວຸໂສແມ່ນໍ້າຂອງຕອນລຸ່ມ - ສະຫະລັດ ອາເມລິກາ ແລະ ກອງປະຊຸມເຈົ້າໜ້າທີ່ອາວຸໂສ ເພື່ອນແມ່ນໍ້າຂອງຕອນລຸ່ມ, ທີ່ ມະນີລາ, ສາທາລະນະລັດ ຟີລິບປິນ. ກອງປະຊຸມດັ່ງກ່າວໄດ້ດໍາເນີນໄປພາຍໃຕ້ການເປັນປະທານຂອງ ທ່ານ ນາງ ຊູຊານ ທອນເທິນ, ຮັກສາການຜູ້ຊ່ວຍລັດຖະມົນຕີກະຊວງການຕ່າງປະເທດ ແລະ ທ່ານ ແພັດທຣິກ ເມີຟີ, ຮອງຜູ້ຊ່ວຍລັດຖະມົນຕີກະຊວງການຕ່າງປະເທດ ສະຫະລັດ ອາເມລິກາ ແລະ ມີຄະນະຜູ້ແທນຈາກບັນດາປະເທດແມ່ນໍ້າຂອງຕອນລຸ່ມຄື: ກໍາປູເຈຍ, ສປປ ລາວ, ມຽນມາ, ໄທ, ສສ. ຫວຽດນາມ ພ້ອມດ້ວຍຄະນະຜູ້ແທນຈາກບັນດາປະເທດຄູ່ຮ່ວມພັດທະນາເຊັ່ນ: ສ. ອາເມລິກາ, ຍີ່ປຸ່ນ, ສ. ເກົາຫລີ, ອົດສະຕາລີ, ນິວຊີແລນ ແລະ ສະຫະພາບ ເອີຣົບ ເຂົ້າຮ່ວມຢ່າງພ້ອມພຽງ.
ກອງປະຊຸມເຈົ້າໜ້າທີ່ອາວຸໂສແມ່ນໍ້າຂອງຕອນລຸ່ມ - ສ. ອາເມລິກາ ໄດ້ຕີລາຄາຄືນໝາກຜົນຂອງການຈັດຕັ້ງປະຕິບັດບັນດາແຜນວຽກ ແລະ ໂຄງການຮ່ວມມືຕ່າງໆພາຍໃຕ້ຂອບການຮ່ວມມືດັ່ງກ່າວໃນໄລຍະຜ່ານມາ ພ້ອມທັງໄດ້ປຶກສາຫາລື ແລະ ປະກອບຄໍາເຫັນຕໍ່ຮ່າງຖະແຫລງການຂອງກອງປະຊຸມລັດຖະມົນຕີຕ່າງປະເທດແມ່ນໍ້າຂອງຕອນລຸ່ມ - ສ. ອາເມລິກາ ຄັ້ງທີ 10. ສໍາລັບກອງປະຊຸມເຈົ້າໜ້າທີ່ອາວຸໂສ ເພື່ອນແມ່ນໍ້າຂອງຕອນລຸ່ມ, ບັນດາເຈົ້າໜ້າທີ່ອາວຸໂສໄດ້ແລກປ່ຽນຄໍາເຫັນຮ່ວມກັນ ກ່ຽວກັບ ວິທີທາງເສີມຂະຫຍາຍການຮ່ວມມື ລະຫວ່າງບັນດາປະເທດສະມາຊິກ ກໍຄືປະກອບຄໍາເຫັນຕໍ່ຮ່າງແຜນປະຕິບັດງານຂອງໂຄງການຄູ່ຮ່ວມມື ເພື່ອພື້ນຖານໂຄງລ່າງທີ່ຍືນຍົງ ສໍາລັບປີ 2017-2018 ທີ່ ສ. ອາເມລິກາ ສະເໜີຂຶ້ນມາໃຫມ່ ເພື່ອປະກອບສ່ວນເຂົ້າໃນການຈັດຕັ້ງປະຕິບັດໂຄງການດັ່ງກ່າວໃຫ້ເປັນຮູບປະທໍາເທື່ອລະກ້າວ. ນອກຈາກນີ້, ບັນດາເຈົ້າໜ້າທີ່ອາວຸໂສຍັງໄດ້ປຶກສາຫາລື ກ່ຽວກັບ ທ່າອ່ຽງອັນພົ້ນເດັ່ນຂອງພາກພື້ນທີ່ທຸກຝ່າຍມີຄວາມສົນໃຈຮ່ວມກັນ ແລະ ຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບ ທິດທາງການຮ່ວມມືໃນຕໍ່ໜ້າ. ທັງໝົດນີ້ ກໍເພື່ອກະກຽມທາງດ້ານເນື້ອໃນໃຫ້ແກ່ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງຕອນລຸ່ມ - ສ. ອາເມລິກາ ຄັ້ງທີ 10 ຊຶ່ງມີແຜນຈະຈັດຂຶ້ນ ທີ່ມະນີລາ, ຟີລິບປິນ ໃນຕົ້ນເດືອນສິງຫາ 2017 ທີ່ຈະມາເຖິງນີ້.