ໃນວັນ​ທີ 23 ພຶດສະພາ 2016, ທີ່ ກະຊວງ​ການ​ຕ່າງປະ​ເທດ, ທ່ານ ສະ​ເຫຼີມ​ໄຊ ກົມມະ​ສິດ, ລັດຖະມົນຕີກະຊວງ​ການ​ຕ່າງປະ​ເທດ ​​ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມຂໍ່ານັບ​ຂອງ​ທ່ານ Hiroyuki Kishino,​​ ​ເອກ​ອັກຄະ​ລັດຖະທູດ​ວິສາມັນ​ຜູ້​ມີ​ອຳນາດ​ເຕັມ ​ແຫ່ງ ຍີ່ປຸ່ນ ປະຈຳ ສປປ ລາວ, ​ເນື່ອງ​ໃນ​ໂອກາດ​ທີ່ ທ່ານ​ ສະ​ເຫຼີມ​ໄຊ ກົມມະ​ສິດ ໄດ້​ຮັບ​ການ​ແຕ່ງ​ຕັ້ງ​ເປັນ​ລັດຖະມົນຕີ​ຕ່າງປະ​ເທດ​ ​ແຫ່ງ ສປປ ລາວ ຄົນ​ໃໝ່. ​ໃນ​ໂອກາດ​ດັ່ງກ່າວ, ທ່ານທູດກໍ່ໄດ້ສະແດງຄວາມຊົມເຊີຍ ແລະ ອວຍພອນໃຫ້ທ່ານລັດຖະມົນຕີຕ່າງປະເທດ ຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ຂອງ​ຕົນ, ຊົມເຊີຍ ແລະ ຕີລາຄາສູງຕໍ່ໝາກຜົນສຳເລັດ ແຫ່ງການສ້າງສາພັດທະນາປະເທດຊາດ ແລະ ການເຕີບໃຫຍ່ຂະຫຍາຍຕົວຂອງວຽກງານການທູດລາວ, ຍິນດີໃຫ້ການສະໜັບສະໜູນ ສປປ ລາວໃນການເປັນປະທານອາຊຽນ, ສະ​ແດງ​ຄວາມ​ພໍ​ໃຈ​ຕໍ່ການ​ພົວພັນ​ຮ່ວມ​ມື​ທີ່ມີໝາກຜົນ​ອັນ​ດີ ລະຫວ່າງ ​ລາວ-ຍີ່ປຸ່ນ ແລະ ຈະສືບຕໍ່ພົວພັນຮ່ວມມືກັບ ສປປ ລາວ ​ເພື່ອເສີມຂະຫຍາຍສາຍພົວພັນແບບ​ຄູ່​ຮ່ວມ​ມື​ຍຸດ​ທະ​ສາດ ລະຫວ່າງ ລາວ ​ແລະ ຍີ່ປຸ່ນ.

ໃນ​ໂອກາດ​ດັ່ງກ່າວ, ທ່ານ​ລັດຖະມົນຕີ​ຕ່າງປະ​ເທດ ກໍ​ໄດ້​ຕີ​ລາຄາ​ລາ​ສູງຕໍ່​ສາຍ​ພົວພັນ​​ແບບ​ຄູ່​ຮ່ວມ​ມື​ຍຸດ​ທະ​ສາດ ​ລະຫວ່າງ ​ສປປລາວ ​ແລະ ຍີ່ປຸ່ນທີ່ໄດ້​ຮັບ​ການ​ຂະ​ຫຍາຍ​ຕົວ​ຢ່າງບໍ່​ຢຸດຢັ້ງ, ເປັນ​ຕົ້ນ​ແມ່ນການ​ພົວ​ພັນ​ດ້ານ​ການ​ເມືອງ, ເສດ​ຖະ​ກິດ ແລະ ວັດ​ທະ​ນະ​ທຳ-ສັງ​ຄົ​ມ. ສະ​ແດງ​ຄວາມ​ຂອບ​ໃຈ​ຕໍ່​ການ​ປະ​ກອບ​ສ່ວນ​ຢ່າງ​ຕັ້ງ​ໜ້າ​ຂອງ ​ທ່ານ​ທູດ ໃນ​ໂອ​ກາດ​ການ​ຢ້ຽມ​ຢາມ ສ​ປ​ປ ລາວ ຢ່າງ​ເປັນ​ທາງ​ການ ຂອງ​ທ່ານ ຟູ​ມິ​ໂອະ ກິ​ຊິ​ດະ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ຍີ່​ປຸ່ນ ໃນ​ລະ​ຫວ່າງວັນ​ທີ 4 - 5 ພຶດ​ສະ​ພາ​ 2016 ຜ່ານ​ມາ. ສະ​ແດງ​ຄວາມ​ຂອບ​ໃຈ​ມາ​ຍັງ​ ລັດ​ຖະ​ບານ​ຍີ່​ປຸ່ນ ທີ່​ໄດ້​​ສືບ​ຕໍ່ໃຫ້​ການ​ຊ່ວຍ​ເຫລືອ​ແກ່ ສ​ປ​ປລາວໂດຍ​ສະ​ເພາະ​ແມ່ນ​ບັນ​ດາໂຄງ​ການ​ຊ່ວຍ​ເຫລືອ​ທາງ​ການ ເພື່ອ​ການ​ພັດ​ທະ​ນາ (ODA) ເຊິ່​ງ​ໄດ້​ປະ​ກອບ​ສ່ວນ​ສຳ​ຄັນໃນ​ການ​ພັດ​ທະ​ນາ​ພື້ນ​ຖານ​ໂຄງ​ລ່າງ ແລະ ຊັບ​ພະ​ຍາ​ກອນ​ມະ​ນຸດຂອງ​ລາວຢ່າງ​ມີ​ປະ​ສິດ​ທິ​ຜົນ. ຫວັງ​ຢ່າງ​ຍິ່ງ​ວ່າທ່ານ​ທູດຈະສືບ​ຕໍ່​ຊຸກ​ຍູ້​ໃຫ້​ມີ​ການ​ແລກ​ປ່ຽນຢ້ຽມ​ຢາມຂອງ​ຄະ​ນະ​ຜູ້​ແທນ​ຂັ້ນ​ສູງເຊິ່ງ​ກັນ ແລະ ກັນຢ່າງ​ເປັນ​ປົກ​ກະ​ຕິ, ລວມທັງການສືບ​ຕໍ່​ຊຸກ​ຍູ້​ການ​ຄ້າ, ການ​ລົງ​ທຶນ ແລະ ການ​ທ່ອງ​ທ່ຽວຈາກ​ຍີ່​ປຸ່ນເຂົ້າ​ມາ​ໃນ ສ​ປ​ປລາວ ໃຫ້​ເພີ່ມ​ຂຶ້ນ, ບັນ​ດາ​ໂຄງ​ການ ODA, ການ​ຈັດ​ສົ່ງ​ຊ່ຽວ​ຊານ-ອາ​ສາ​ສະ​ໝັກຍີ່​ປຸ່ນ ແລະ ການ​ຮ່ວມ​ມື​ດ້ານ​ການ​ສຶກ​ສາ-ວັດ​ທະ​ນະ​ທຳ.