ໃນຕອນບ່າຍຂອງວັນທີ 24 ຕຸລາ 2016, ທີ່ ພະຣາຊະວັງ, ນະຄອນຫຼວງບາງກອກ, ຣາຊະອານາຈັກໄທ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ຕາງໜ້າລັດຖະບານ ແລະ ປະຊາຊົນລາວ ເຂົ້າວາງພວງມາລາ ແລະ ເຊັນປຶ້ມໄຫວ້ອາໄລ ຕໍ່ການສິ້ນພະຊົນຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ແຫ່ງ ຣາຊະອານາຈັກໄທ.

ໃນຕອນເຊົ້າຂອງວັນທີ 19 ຕຸລາ 2016, ທີ່ ກະຊວງການຕ່າງປະເທດ ໄດ້ຈັດຊຸດຝຶກອົບຮົມວຽກງານພັກ-ພະນັກງານ ໃຫ້ແກ່ບັນດາສະຫາຍຄະນະໜ່ວຍພັກ ພາຍໃນອົງຄະນະພັກກະຊວງການຕ່າງປະເທດຂຶ້ນ, ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ, ມີນັກວິທະຍາກອນມາຈາກກົມກໍ່ສ້າງພັກ ແລະ ກົມປ້ອງກັນພັກ-ພະນັກງານ, ຄະນະຈັດຕັ້ງສູນກາງພັກ, ມີບັນດາສະຫາຍຄະນະພັກ, ຄະນະນຳກະຊວງ ແລະ ບັນດາສະຫາຍຄະນະໜ່ວຍພັກ, ກຳມະການພັກ ພາຍໃນອົງຄະນະພັກກະຊວງ ເຂົ້າຮ່ວມທັງໝົດ.

ວັນ​ທີ 18 ຕຸລາ 2016, ທີ່ ສະຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ຣາຊະອານາຈັກໄທ​ ປະຈຳ ​ສປປ ລາວ, ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເຊັນປຶ້ມໄຫວອາໄລ ຕໍ່ເຫດການສິ້ນພະຊົນ ຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ແຫ່ງ ຣາຊະອານາຈັກໄທ ໃນວັນທີ 13 ຕຸລາ 2016 ທີ່ຜ່ານມາ. ການເຊັນປຶ້ມໄຫວ້ອາໄລຄັ້ງນີ້ ມີເນື້ອໃນຂຽນວ່າ: ໃນນາມ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມ ສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ການສິ້ນພະຊົນຂອງ ພະບາດສົມເດັດ ພະເຈົ້າມະຫາຊີວິດ ພູມີພົນ ອະດຸນຍະເດດ ແຫ່ງ ຣາຊະອານາຈັກໄທ.