ໃນຕອນເຊົ້າຂອງ ວັນທີ 29 ມີນາ 2024 ທີ່ ກະຊວງການຕ່າງປະເທດ ໄດ້ຈັດພິທີປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ, ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 78 ປີ ແລະ ​ສະ​ຫຼຸບຕີລາຄາ​ວຽກ​ງານກໍ່​ສ້າ​ງ ພັກ-ພະ​ນັກ​ງານ ແລະ ປັບ​ປຸງ​ກົງ​ຈັກ​ການ​ຈັດ​ຕັ້ງ ປະ​ຈຳ​ປີ 2023 ແລະ ແຜນການທິດທາງໃນປີ 2024 ພາຍໃຕ້ການເປັນປະທານຂອງ ສະຫາຍ ຕິ່ງ ສຸກສັນ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການຕ່າງປະເທດ ​ເຊີ່ງມີບັນດາຄະນະພັກ-ຄະນະນຳ, ສະມາຊິກພັກ ​ແລະ ພະນັກງານ-ລັດຖະກອນ ພາຍ​ໃນກະຊວງເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ຕິ່ງ ສຸກສັນ, ຮອງເລຂາຄະນະບໍລິຫານງານພັກກະຊວງ ໄດ້ຂຶ້ນບັນຍາຍເອກະສານ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ, ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 78 ປີ, ຊຶ່ງ ສະຫາຍໄດ້ຍົກໃຫ້ເຫັນປະຫວັດແຫ່ງການກຳເນີດ, ການເຕີບໃຫ່ຍຂະຫຍາຍຕົວ ແລະ ຜົນງານອັນໃຫຍ່ຫຼວງ ຂອງພັກປະຊາຊົນປະຕິວັດລາວຕະຫຼອດໄລຍະ 69 ໃນພາລະກິດຕໍ່ສູ້ປົດປ່ອຍຊາດ, ການປົກປັກຮັກສາ ແລະ ສ້າງສາປະເທດຊາດຕະຫຼອດໄລຍະຜ່ານມາ, ທັງໄດ້ຍົກໃຫ້ເຫັນທາດແທ້ຂອງພັກປະຊາຊົນປະຕິວັດລາວ ເຊີ່ງແມ່ນພັກຂອງຊົນຊັ້ນກຳມະກອນ ເປັນຕົວແທນທີ່ຈົ່ງຮັກພັກດີ ຕໍ່ສິດຜົນປະໂຫຍດຂອງຊົນຊັ້ນກຳມະກອນ, ຊາວຜູ້ອອກ ແຮງງານລາວທີ່ຮັກຊາດ, ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ ແລະ ມູນເຊື້ອອັນດີງາມຂອງພັກເປັນພື້ນຖານແຫ່ງແນວຄິດ, ເປັນເຂັມທິດໃຫ້ແກ່ການຈັດຕັ້ງ ແລະ ການເຄື່ອນໄຫວຂອງພັກ, ເສີມຂະຫຍາຍລັດທິຮັກຊາດອັນແທ້ຈິງສົມທົບກັບລັດທິສາກົນອັນຜ່ອງໃສຂອງຊົນຊັ້ນກຳມະກອນ, ເພື່ອນໍາເອົາຄວາມເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນ.

ສໍາລັບວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ, ສະຫາຍ ໄດ້ຍົກໃຫ້ເຫັນມູນເຊື້ອການຕໍ່ສູ້ຕ້ານພວກລ່າເມືອງຂຶ້ນ ຂອງອ້າຍນ້ອງທະຫານ ແລະ ປະຊາຊົນຢູ່ເມືອງທ່າແຂກ ໂດຍສະເພາະແມ່ນບັ້ນຮົບປ້ອງກັນຕົວເມືອງທ່າແຂກ ເຊີ່ງແມ່ນໜື່ງໃນບັ້ນຮົບຕໍ່ສູ້ທີ່ສໍາຄັນທີ່ສຸດຢູ່ໃນລາວ ເຖິງຈະບໍ່ໄດ້ຮັບໄຊຊະນະ ແລະ ຖືກປາບປາມຢ່າງນອງເລືອດກໍ່ຕາມ ແຕ່ມັນກໍ່ເປັນການ ປຸກລະດົມນ້ໍາໃຈຮັກຊາດ, ຄຽດແຄ້ນສັດຕູຂອງປະຊາຊົນລາວບັນດາເຜົ່າ ພ້ອມກັນລຸກຮືຂຶ້ນດ້ວຍຄວາມເກັ່ງກ້າສາມາດ ແລະ ມີໄຫວພິບ. ບັ້ນຮົບດັ່ງກ່າວ ໄດ້ກາຍເປັນເຫດການປະຫວັດສາດແຫ່ງການຕໍ່ສູ້ຢ່າງພິລະອາດຫານຂອງປະຊາຊົນລາວ ແລະ ກາຍເປັນກະແສຟອງໃຫ້ແກ່ການປະຕິວັດຊາດ ປະຊາທິປະໄຕ ຂອງພວກເຮົາກ້າວໄປສູ່ການປົດປ່ອຍຊາດຢ່າງສົມບູນ.

ຫຼັງຈາກນັ້ນ, ສະຫາຍຮອງເລຂາຄະນະບໍລິຫານງານພັກກະຊວງ ກໍ່ໄດ້ເຜີຍແຜ່ເຊື່ອມຊຶມຄໍາສັ່ງແນະນໍາ ຂອງຄະນະຈັດຕັ້ງສູນກາງພັກ ສະບັບເລກທີ 13 /ຄຈສພ, ລົງວັນທີ 11 ມັງກອນ 2024 ກ່ຽວກັບການຈັດຕັ້ງປະຕິບັດມະຕິກົມການເມືອງສູນກາງພັກ ວ່າດ້ວຍການເລືອກເຟັ້ນ ແຕ່ງຕັ້ງ, ສັບປ່ຽນໜ້າທີ່ ຂອງພະນັກງານນໍາພາ-ຄຸ້ມຄອງ ແລະ ຄຳສັ່ງແນະນຳ ສະບັບເລກທີ 14/ຄຈສພ, ລົງວັນທີ 11 ມັງກອນ 2024 ກ່ຽວກັບການຈັດຕັ້ງປະຕິບັດ ມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ ເພື່ອເຮັດໃຫ້ບັນດາສະຫາຍ ຄະນະພັກ, ຄະນະໜ່ວຍພັກ ແລະ ຜູ້ທີ່ເຮັດວຽກເປັນເສນາທິການ ໃຫ້ຂັ້ນເທິງດ້ານວຽກງານຈັດຕັ້ງ ແລະ ພະນັກງານ ໃນແຕ່ລະຂັ້ນ ໄດ້ເຂົ້າໃຈ ຫຼັກການ, ມາດຕະຖານ, ເງື່ອນໄຂ, ວິທີການ ແລະ ຂັ້ນຕອນ ໃນການເລືອກເຟັ້ນ, ແຕ່ງຕັ້ງ, ສັບປ່ຽນຫນ້າທີ່ ແລະ ການປະເມີນຕີລາຄາມາດຕະຖານ ແລະ ຄຸນນະພາບຂອງພະນັກງານ ຕາມທິດຊີ້ນໍາຂອງຂັ້ນເທິງວາງອອກ.

ໂດຍຖືເອົາໂອກາດດຽວກັນນີ້, ກະຊວງການຕ່າງປະເທດ ຍັງໄດ້ສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານປະຈໍາປີ 2023 ຜ່ານມາ ແລະ ວາງທິດທາງແຜນການປະຈໍາປີ 2024 ຂອງກະຊວງການຕ່າງປະເທດ ແລະ ເຜີຍແຜ່ຜັນຂະຫຍາຍບັນດາເນື້ອໃນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ໂດຍແມ່ນ ສະຫາຍ ໄມທອງ ທຳມະວົງສາ, ກຳມະການຄະນະພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານບັນດາເອກະສານ ດັ່ງກ່າວ ໂດຍໄດ້ຍົກໃຫ້ເຫັນຜົນສໍາເລັດໃນດ້ານຕ່າງໆ, ພ້ອມທັງຕີລາຄາດ້ານດີ,​ ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ໃນໜຶ່ງປີຜ່ານມາ. ນອກຈາກນັ້ນ, ສະຫາຍ ຍັງໄດ້ສະຫຼຸບຕີລາຄາການປະຕິບັດວຽກງານພັກ-ພະນັກງານ ຂອງກະຊວງການຕ່າງປະເທດປະຈໍາປີ 2023 ແລະ ທິດທາງແຜນການປະຈໍາປີ 2024 ຊຶ່ງໄດ້ຊີ້ໃຫ້ເຫັນເຖິງຜົນສໍາເລັດຫຼາຍດ້ານ ແລະ ບັນຫາທ້າທາຍທີ່ຈະຕ້ອງໄດ້ມີການປັບປຸງແກ້ໄຂໃນຕໍ່ໜ້າ.

ໃນຕອນທ້າຍພິທີ, ສະຫາຍຮອງເລຂາຄະນະບໍລິຫານງານພັກກະຊວງການຕ່າງປະເທດ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍໄດ້ເນັ້ນໜັກໃຫ້ບັນດາສະມາຊິກພັກ ຕ້ອງສືບຕໍ່ເອົາໃຈໃສ່ ເປັນຕົ້ນແມ່ນ: ການຄົ້ນຄວ້າ ໃຫ້ເລິກເຊິ່ງຕໍ່ມູນເຊື້ອປະຫວັດຄວາມຄວາມເປັນມາ ແລະ ແນວທາງນະໂຍບາຍຂອງພັກ, ການເພີ່ມທະວີເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ, ເອົາໃຈໃສ່ຢ່າງເປັນເຈົ້າການດ້ານວຽກງານການເມືອງແນວຄິດ ໃຫ້ແກ່ພະນັກງານ, ສະມາຊິກພັກ ທີ່ຢູ່ໃນ​ໃນ​ຄວາມຮັບຜິດຊອບ​ຂອງ​ຕົນ​ ເພື່ອໃຫ້​ຮັບ​ຮູ້​ເຂົ້າ​ໃຈ​ເຖີງສະພາບ​ຄວາມ​ຫຍຸ້ງ ຍາກທາງດ້ານເສດຖະກິດ-ການເງິນ ທີ່ເກີດຂຶ້ນໃນປັດຈຸບັນ ​ພ້ອມ​ທັງ​ມີ​ສະຕິ​ຕໍ່​ກົນອຸບາຍ​ຫັນປ່ຽນ​ໂດຍ​ສັນ ຕິ​ຂອງ​ສັດຕູ ໄປພ້ອມໆກັບການເພີມທະວີຄວາມເອົາໃຈໃສ່ຕື່ມ ວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ເດັດດ່ຽວແກ້ໄຂປະກົດການຫຍໍ້ທໍ້ພາຍໃນພັກ ຢ່າງເດັດຂາດ ແລະ ທັນການ ​ໂດຍ​ສະ​ເພາະ​​ໃນສະພາບ​ເງື່ອນ​ໄຂໃນ​ປັດຈຸບັນ.