ໃນຕອນບ່າຍຂອງວັນທີ 29 ກຸມພາ 2024, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕາງໜ້າລັດຖະບານ ແຫ່ງ ສປປ ລາວ ຮັບການສະໜັບສະໜູນການເປັນປະທານອາຊຽນ 2024 ຈາກ ລັດຖະບານ ແຫ່ງ ຣາຊະອານາຈັກໄທ, ໂດຍແມ່ນ ທ່ານ ນາງ ມໍລະກົດ ສີສະຫວັດ, ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ຕາງໜ້າລັດຖະບານໄທມອບການສະໜັບສະໜູນດັ່ງກ່າວ.

ການສະໜັບສະໜູນໃນຄັ້ງນີ້ ແມ່ນຈະນໍາໃຊ້ເຂົ້າໃນການປະກອບສ່ວນປັບປຸງສ້ອມແປງຕຶກກຽດຕິຍົດ ຂອງສະໜາມບິນສາກົນວັດໄຕ ເພື່ອຈັດຊື້ເຄື່ອງມືອຸປະກອນອໍານວຍຄວາມສະດວກຕ່າງໆ, ເຄື່ອງໃຊ້ຫ້ອງການ ແລະ ອຸປະກອນຕົບແຕ່ງພາຍໃນຕຶກອາຄານ ລວມມູນຄ່າ 5 ລ້ານບາດ (ປະມານ 3.208.150.000 ກີບ).