ໃນຕອນ​ເຊົ້າ​ຂອງວັນ​ທີ 16 ມັງກອນ 2023, ທີ່ ກະຊວງການຕ່າງປະເທດ, ​ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສ​ປ​ປ ລາວ ໄດ້​ຕ້ອນ​ຮັບ​ການ​ເຂົ້າ​ຢ້ຽມ​ອຳ​ລາ ຂອງ​ ທ່ານ ດຣ. Pratito Soeharyo, ເອກ​ອັກ​ຄະ​ລັດ​ຖະ​ທູດ ວິ​ສາ​ມັນ ​ຜູ້​ມີ​ອຳ​ນາດ​ເຕັມ ​ແຫ່ງ ສາທາລະນະລັດ ອິນໂດເນເຊຍ ປະ​ຈຳ ສ​ປ​ປ ລາວ ໃນ​ໂອ​ກາດ​ທີ່​ສຳ​ເລັດການປະຕິບັດ​ໜ້າ​ທີ່​ການ​ທູດ​ຢູ່ ສ​ປ​ປ ລາວ.

ໃນ​ໂອ​ກາດ​ດັ່ງ​ກ່າວ​, ທ່ານ​ ສະເຫຼີມໄຊ ກົມມະສິດ ໄດ້​ສະ​ແດງ​ຄວາມ​ຊົມ​ເຊີຍ ​ຕໍ່​ຜົນ​ສຳ​ເລັດ​ໃນ​ການ​ປະ​ຕິ​ບັດ​ໜ້າ​ທີ່​ການ​ທູດ​ຂອງ​ ທ່ານເອກອັກຄະລັດຖະທູດ, ​ຕະຫຼອດ​ໄລ​ຍະ 4 ປີກວ່າຜ່ານມາ, ນັບຕັ້ງແຕ່ເດືອນພຶດສະພາ 2018 ທີ່ໄດ້ມີການເຄື່ອນ​ໄຫວ​ຢ່າງ​ຫ້າວ​ຫັນ ໃນການ​ສະ​ໜັບ​ສະ​ໜູນ ແລະ ປະ​ກອບ​ສ່ວນ​ອັນ​ສຳ​ຄັນ ເຂົ້າໃນ​ການ​ເສີມ​ຂະ​ຫ​ຍາຍ​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ອັນດີງາມ ລະ​ຫວ່າງ ສ​ປ​ປ ລາວ ແລະ ສ. ອິນໂດເນເຊຍ, ໂດຍສະເພາະ ການສະເຫຼີມສະຫຼອງ ຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ. ອິນໂດເນເຊຍ ໃນປີ 2022 ຜ່ານມາ. ໃນນາມເປັນປະເທດປະສານງານ ແລະ ທູດອາວຸໂສ, ທ່ານເອກອັກຄະລັດຖະທູດ ກໍ່ໄດ້ນໍາພາບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈໍາ ສປປ ລາວ ເດີນທາງໄປຢ້ຽມຢາມ ແຂວງຜົ້ງສາລີ ແລະ ແຂວງອຸດົມໄຊ ດ້ວຍຜົນສໍາເລັດອັນງົບງາມ. ພ້ອມນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ຜ່ານທ່ານເອກອັກຄະລັດຖະທູດ ໄປຍັງລັດຖະບານ ແລະ ປະຊາຊົນອິນໂດເນເຊຍ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວ ຕະຫຼອດມາ, ເປັນຕົ້ນ ການພັດທະນາຊັບພະຍາກອນມະນຸດ, ເສດຖະກິດ-ການຄ້າ, ການລົງທຶນ ແລະ ອື່ນໆ, ເຊິ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມດຽວກັນນັ້ນ, ທ່ານ ສະເຫຼີມໄຊ ກົມມະສິດ ກໍໄດ້ຝາກຄວາມຢື້ຢາມຖາມຂ່າວ ແລະ ສະແດງຄວາມຍິນດີຕ້ອນຮັບ ທ່ານລັດຖະມົນຕີກະຊວງການຕ່າງປະເທດ ອິນໂດເນເຊຍ ທີ່ຈະເດີນທາງມາເຂົ້າຮ່ວມກອງປະຊຸມຄະນະກໍາມະທິການຮ່ວມ ວ່າດ້ວຍການຮ່ວມມື ລາວ-ອິນໂດເນເຊຍ ຄັ້ງທີ 2, ຢູ່ ສປປ ລາວ ໃນໄວໆນີ້, ພ້ອມທັງ​ອວຍ​ພອນ​ໃຫ້​ ທ່ານເອກອັກຄະລັດຖະທູດ ຈົ່ງ​ເດີນ​ທາງ​ກັບ​ຄືນ​ປະ​ເທດ​ດ້ວຍ​ຄວາມ​ສະ​ຫວັດ​ດີ​ພາບ ແລະ ປະ​ສົບ​ຜົນ​ສຳ​ເລັດ​ ໃນ​ໜ້າ​ທີ່​ວຽກ​ງານ​ໃໝ່ ​ທີ່​ທ່ານ​ທູດຈະ​ໄດ້​ຮັບຜິດຊອບໃນ​ອະ​ນາ​ຄົດ​ອັນ​ໃກ້​ນີ້, ໂດຍສະເພາະໃນການເປັນປະທານອາຊຽນ ຂອງ ອິນໂດເນເຊຍ ໃນປີ 2023 ນີ້.

ສອງຝ່າຍເຫັນວ່າ, ທ່າແຮງບົ່ມຊ້ອນຂອງການພົວພັນຮ່ວມມືໃນດ້ານຕ່າງໆ ລະຫວ່າງ ສປປ ລາວ ແລະ ອິນໂດເນເຊຍ ແມ່ນມີຫຼາຍ, ສອງຝ່າຍຈະສືບຕໍ່ຊຸກຍູ້ການພົວພັນຮ່ວມມືໃນດ້ານຕ່າງໆ ໃຫ້ນັບມື້ນັບເກີດດອກອອກຜົນ, ໂດຍສະເພາະການສືບຕໍ່ເຮັດໃຫ້ມູນຄ່າການຄ້າ ລະຫວ່າງສອງຝ່າຍ ເພີ່ມຂຶ້ນຕື່ມໃນອະນາຄົດ.

ໃນໂອກາດດຽວກັນນີ້, ທ່ານ​ ເອກອັກຄະລັດຖະທູດ ອິນໂດເນເຊຍ ໄດ້​ສະ​ແດງ​ຄວາມ​ຂອບ​ໃຈ ຕໍ່​ລັດ​ຖະ​ບານລາວ ໂດຍ​ສະ​ເພາະ​ກະ​ຊວງ​ການ​ຕ່າງ​ປະ​ເທດ ​ທີ່​ໄດ້​ເອົາ​ໃຈ​ໃສ່ ແລະ ໃຫ້​ການ​ຮ່ວມ​ມື​ຊ່ວຍ​ເຫຼືອ​ໃນ​ການ​ປະ​ຕິ​ບັດ​ໜ້າ​ທີ່​ການ​ທູດຂອງຕົນ ຕະຫຼອດ​ໄລ​ຍະ​ເວ​ລາ 4 ປີ ກວ່າຜ່ານມາ ແລະ ຈະສືບຕໍ່ປະກອບສ່ວນເສີມຂະຫຍາຍການພົວພັນຮ່ວມມື ລະຫວ່າງ ອິນໂດເນເຊຍ ແລະ ສປປ ລາວ ຕໍ່ໄປ, ທັງຫວັງ​ວ່າ ລັດ​ຖະ​ບານລາວ ຈະ​ສືບ​ຕໍ່​ໃຫ້​ການ​ຮ່ວມ​ມື​ຕໍ່​ທ່ານທູດຜູ້​ທີ່​ຈະ​ມາ​ຮັບ​ໜ້າ​ທີ່​ຕໍ່​ໄປ ເພື່ອ​ພ້ອມ​ກັນ​ສືບ​ຕໍ່​ພັດ​ທະ​ນາ​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ອັນດີງາມລະ​ຫວ່າງ ສອງ​ປະ​ເທດ​ ໃຫ້​ສືບ​ຕໍ່​ຂະ​ຫ​ຍາຍ​ຕົວ​ຍິ່ງໆ​ຂຶ້ນ.