ໃນຕອນເຊົ້າວັນທີ 16 ທັນວາ 2021, ທີ່ ກະຊວງການຕ່າງປະເທດ,ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ຍື່ນໜັງສືແຕ່ງຕັ້ງຂອງ ສະຫາຍ ຫງວຽນ ວັນ ຈຸງ, ກົງສຸນໃຫຍ່ ແຫ່ງ ສສ ຫວຽດນາມ ຄົນໃໝ່ ປະຈຳ ນະຄອນປາກເຊ, ແຂວງຈຳປາສັກ, ສປປ ລາວ.

ໃນໂອກາດນີ້, ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ ສະຫາຍ ຫງວຽນ ວັນ ຈຸງທີ່ຖືກແຕ່ງຕັ້ງມາເປັນກົງສຸນໃຫຍ່ ແຫ່ງ ສສ ຫວຽດນາມ ຄົນໃໝ່ ປະຈໍາ ແຂວງຈຳປາສັກ, ສປປ ລາວ, ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ ສສ ຫວຽດນາມ ທີ່ໄດ້ປະກອບສ່ວນອັນສໍາຄັນ ເຂົ້າໃນການຊ່ວຍເຫຼືອພັດທະນາເສດຖະກິດ-ສັງຄົມ ຂອງ ສປປ ລາວ ໃນຫຼາຍຂະ     ແໜງການຕະຫຼອດໄລຍະຜ່ານມາ ແລະ ເຊື່ອໝັ້ນວ່າ ດ້ວຍຄວາມຮູ້ຄວາມສາມາດ, ປະສົບການໃນຂົງເຂດວຽກງານການຕ່າງປະເທດຂອງ ສະຫາຍ ຫງວຽນ ວັນ ຈຸງ ຈະປະກອບສ່ວນພັດທະນາ 4 ແຂວງພາກໃຕ້ ຂອງລາວ ກໍ່ຄື ແຂວງຈໍາປາສັກ, ສາລະວັນ, ອັດຕະປື ແລະ ເຊກອງ ເພື່ອຊຸກຍູ້ການພົວພັນຮ່ວມມື ລະຫວ່າງ 4 ແຂວງພາກໃຕ້ ຂອງລາວ ກັບ ບັນດາແຂວງຂອງ ສສ ຫວຽດນາມ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ພິເສດ, ຮອງລັດຖະມົນຕີກະຊວງການຕ່າງປະເທດ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການຮ່ວມມືກັນຢ່າງສະໜິດແໜ້ນ ແລະ ມີປະສິດທິພາບສູງ ລະຫວ່າງ ກະຊວງການຕ່າງປະເທດລາວ ກັບ ສະຖານທູດ ແລະ ສະຖານກົງສູນໃຫຍ່ ສສ ຫວຽດນາມ ໃນໄລຍະຜ່ານມາ, ເຮັດໃຫ້ສາມາດຊຸກຍູ້ການພົວພັນອັນເປັນມູນເຊື້ອທີ່ດີລະຫວ່າງສອງຝ່າຍ ໃຫ້ຂະຫຍາຍຕົວ ແລະ ມີຜົນສໍາເລັດຫຼາຍດ້ານ ເຖິງແມ່ນວ່າຫຼາຍກິດຈະກໍາຈະໄດ້ຮັບຜົນກະທົບ ຈາກການແຜ່ລະບາດ ຂອງພະຍາດໂຄວິດ-19, ແຕ່ການນໍາຂັ້ນສູງຂອງສອງປະເທດ ກໍ່ຍັງມີການໄປມາຫາສູ່ກັນຢ່າງບໍ່ຂາດ.

ໃນໂອກາດດຽວກັນນີ້, ສະຫາຍ ຫງວຽນ ວັນ ຈຸງ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ສະຫາຍ ໂພໄຊ ໄຂຄຳພິທູນ ແລະ ຈະສືບຕໍ່ໃຫ້ການຮ່ວມມືກັບ ກະຊວງການຕ່າງປະເທດ ແລະ ບັນດາຂະແໜງການຖ້ອງທິ່ນຂອງ ສປປ ລາວ ໂດຍສະເພາະແມ່ນການປະກອບສ່ວນພັດທະນາ 4 ແຂວງພາກໃຕ້ ຂອງລາວ, ຊຸກຍູ້ການພົວພັນຮ່ວມມື ລະຫວ່າງ ບັນດາແຂວງພາກໃຕ້ ຂອງລາວ ກັບ ບັນດາແຂວງຂອງ ສສ ຫວຽດນາມ ໃຫ້ນັບມື້ນັບ   ແໜ້ນແຟ້ນຍິ່ງໆຂຶ້ນ ແລະ ໃຫ້ການຮ່ວມມືຢ່າງໃກ້ຊິດ ກໍ່ຄືສືບຕໍ່ໃຫ້ການສະຫນັບສະຫນູນ ການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະການຟື້ນຟູເສດຖະກິດໃນໄລຍະ ແລະ ຫລັງການແຜ່ລະບາດຂອງພະຍາດ COVID -19 ໃຫ້ໄດ້ຮັບໝາກຜົນເປັນຮູບປະທໍາຫຼາຍຂຶ້ນ.