ໃນວັນທີ 17 ພະຈິກ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ເວ​ທີ​ປຶກ​ສາ​ຫາ​ລືການຮ່ວມມືແຫ່ງອາຊີ (ACD) ໃນຮູບແບບທາງໄກ,ໂດຍການເປັນປະທານຮ່ວມຂອງ ລັດຖະມົນຕີຕ່າງປະເທດ ສາທາລະນະລັດ ຕວັກກີ ແລະ ລັດຖະມົນຕີຕ່າງປະເທດ ຣາຊະອານາຈັກ ບາເຣນ, ເຊິ່ງມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າຈາກບັນດາປະເທດສະມາຊິກ ເອຊີດີ, ເລຂາທິການ ACD ແລະ ອົງການຈັດຕັ້ງສາກົນຕ່າງໆ ເຂົ້າຮ່ວມ.

ກອງປະຊຸມໄດ້​ຕີ​ລາຄາ​ສູງຕໍ່​ຄວາມ​ຄືບ​ໜ້າ​ຂອງ ການຈັດ​ຕັ້ງ​ປະຕິບັດບັນດາກິດຈະກຳຕ່າງໆ ໃນໄລຍະປີ 2020-2021 ຜ່ານມາ ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ແລະ ໄດ້ແລກປ່ຽນຄຳຄິດເຫັນ ກ່ຽວກັບ ວິໄສທັດໃໝ່ ສຳລັບ ການຮ່ວມມື ACD ໃນອະນາຄົດ, ເຊິ່ງກອງປະຊຸມຄັ້ງນີ້ໄດ້ຮັບຮອງເອົາແຜນແມ່ບົດ ເອຊີດີ (ACD Blueprint) 2021-2030 ເພື່ອເປັນທິດທາງໃນການສືບຕໍ່ສົ່ງເສີມການຮ່ວມມືໃນພາກພື້ນອາຊີ ໂດຍເໜັ້ນໃສ 6 ຂົງເຂດ ບູລິມະສິດຄື: 1.) ການຄໍ້າປະກັນທາງດ້ານອາຫານ, ນໍ້າ ແລະ ພະລັງງານ; 2.) ການເຊື່ອມຈອດ; 3) ການຮ່ວມມືດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ; 4) ການສຶກສາ ແລະ ການພັດທະນາທາງດ້ານຊັບພະຍາກອນມະນຸດ; 5) ການຮ່ວມມືດ້ານວັດທະນະທໍາ ແລະ ທ່ອງທ່ຽວ; ແລະ 6) ແນວທາງການພັດທະນາແບບຮອບດ້ານ ແລະ ຍືນຍົງ. ພ້ອມນີ້, ກອງປະຊຸມຍັງໄດ້ມີພິມີມອບ-ຮັບໜ້າທີ່ປະທານ ACD ລະຫວ່າງ ຕວັກກີ, ປະທານຜູ້ເກົ່າ ແລະ ບາເຣນ, ປະທານຜູ້ໃໝ່ ແລະ ໄດ້ປຶກສາຫາລືການກະກຽມໃຫ້ແກ່ກອງປະຊຸມສຸດຍອດ ACD ທີ່ ປະເທດ ກາຕ້າ ຈະເປັນເຈົ້າພາບຈັດຂຶ້ນໃນປີ 2023.

ໃນໂອກາດນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ປະກອບຄຳຄິດຄຳເຫັນຕໍ່ກອງປະຊຸມ ໂດຍໄດ້ຕີລາຄາສູງຕໍ່ບັນດາກິດຈະກຳທີ່ໄດ້ຈັດຕັ້ງປະຕິບັດໃນຂອບການຮ່ວມມື ACD ໃນໄລຍະຜ່ານມາ ແລະ ໄດ້ສະແດງຄວາມຊົມເຊີຍຕໍ່ ບາເຣນ ທີ່ຈະຮັບໜ້າທີ່ເປັນປະທານ ACD ຜູ້ໃໝ່ໃນໄລຍະປີ 2021-2022 ພ້ອມທັງຊົມເຊີຍຜົນສຳເລັດການເປັນປະທານ ACD ຂອງ ຕວັກກີ ໃນໄລຍະ 2 ປີຜ່ານມາ. ພ້ອມນີ້, ໄດ້ສະແດງຄວາມໃຫ້ເຫັນເຖິງຄວາມມຸ້ງໝັ້ນຂອງ ສປປ ລາວ ທີ່ຈະສືບຕໍ່ຮ່ວມມືກັບບັນດາປະເທດສະມາຊິກ ACD ຢ່າງໃກ້ຊິດ ເພື່ອສ້າງໃຫ້ພາກພື້ນອາຊີ ເປັນພາກພື້ນທີ່ມີການພັດທະນາແບຍືນຍົງ, ທົ່ວເຖິງ ແລະ ມີການເຊື່ອມໂຍກ ແລະ ເຊື່ອມຈອດກັນຢ່າເຂັ້ມແຂງ.

ຂອບການຮ່ວມມື ເອຊີດີ ໄດ້ຖືກສ້າງຕັ້ງຂຶ້ນໃນປີ 2002, ສະມາຊິກເອຊີດີ ກໍ່ຕັ້ງ​ໃນເບື້ອງຕົ້ນມີ18 ປະເທດ, ໃນນັ້ນ ລວມມີ ສປປ ລາວ ແລະ ສະມາຊິກ ອາຊຽນ ອື່ນໆ. ມາເຖິງປະຈຸບັນ, ACD ມີສະມາຊິກທັງໝົດ 36 ປະເທດຄື: ອັບການິດສະຖານ, ບາເຣນ, ບັງກະລາເທດ, ພູຖານ, ບຣູໄນ, ກຳປູເຈຍ, ສປ ຈີນ, ອິນເດຍ, ອິນໂດເນຍເຊຍ, ອີຣ່ານ, ຍີ່ປຸ່ນ, ກາຊັກສະຖານ, ກູເວດ, ກາສະຖານ, ສ.ເກົາຫຼີ, ສປປ ລາວ, ມາເລເຊຍ, ມົງໂກລີ, ມຽນມາ, ໂອມານ, ປາກີສະຖານ, ຟີລິບປິນ, ກາຕາ, ລັດເຊຍ, ຊາອຸດິອາລາເບຍ, ສິງກະໂປ, ສີລັງກາ, ທາຈິກິດສະຖານ, ຕວັກກີ, ໄທ, ສະຫະລັດອາຣັບ ເອມິເຣດ, ອຸສະເບກິດສະຖານ, ສສ ຫວຽດນາມ, ເນປານ, ສ່ວນ ປາເລດສະຕິນ ເຂົ້າ​ເປັນ​ສະ​ມາ​ຊິກ ເອ​ຊີ​ດີ ເປັນປະເທດທີ່ 36, ຊຶ່ງ​ໄດ້​ຮັບ​ຮອງ​ເອົາ​ໃນ​ກອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ ເອ​ຊີ​ດີ ຄັ້ງ​ທີ 16 ໃນ​ເດືອນ​ພຶດ​ສະ​ພາ 2019 ທີ່ ໂດ​ຮາ, ກາ​ຕ້າ.