ໃນຕອນເຊົ້າຂອງວັນທີ 21 ມິຖຸນາ 2021, ທີ່ ກະຊວງການຕ່າງປະເທດ, ນະຄອນຫຼວງວຽງຈັນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting) ແລະ ກອງປະຊຸມຄະນະກຳມະການ ເຂດປອດອາວຸດນິວເຄຼຍ ອາຊີຕາເວັນອອກສ່ຽງໃຕ້ (Executive Committee of the Southeast Asia Nuclear Weapon-Free Zone Commission ຫຼື SEANWFZ ExCo) ແບບທາງໄກ ພາຍໃຕ້ການເປັນປະທານຂອງ ບຣູໄນ ດາຣູຊາລາມ.

ກອງປະຊຸມຄັ້ງນີ້ ໄດ້ປຶກສາຫາລື ເພື່ອກະກຽມດ້ານຕ່າງໆ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 54 (AMM), ທີ່ຈະຈັດຂຶ້ນໃນເດືອນ ສິງຫາ 2021. ພ້ອມນັ້ນ, ກໍໄດ້ປຶກສາຫາລືເພື່ອກະກຽມ ໃຫ້ແກ່ກອງປະຊຸມເຈົ້າໜ້າທີ່ອາວຸໂສອາຊຽນ ບວກສາມ (APT SOM), ກອງປະຊຸມເຈົ້າໜ້າທີ່ອາວຸໂສອາຊີຕາເວັນອອກ (EAS SOM) ແລະ ກອງປະຊຸມເຈົ້າໜ້າທີ່ອາວຸໂສ ເວທີພາກພື້ນອາຊຽນ (ARF SOM), ທີ່ຈະຈັດຂຶ້ນໃນວັນທີ 22, 24 ແລະ 29 ມິຖຸນາ 2021 ຕາມລຳດັບ.

ກອງປະຊຸມ ຍັງໄດ້ຮັບຊາບຄວາມຄືບໜ້າ ໃນຂະບວນການສ້າງປະຊາຄົມອາຊຽນ ກໍຄືການຈັດຕັ້ງປະຕິບັດບັນດາບູລິມະສິດ ການເປັນປະທານອາຊຽນຂອງ ບຣູໄນ ດາຣູຊາລາມ ໃນປີ 2021 ເປັນຕົ້ນແມ່ນໂຄງການຝຶກງານໄລຍະສັ້ນ ສຳລັບພະນັກງານໜຸ່ມນ້ອຍຂອງອາຊຽນ ຢູ່ກອງເລຂາອາຊຽນ, ການຈັດກອງປະຊຸມສຳມະນາອາຊຽນ ວ່າດ້ວຍ ການຍຶດຖືຫຼັກການຮ່ວມມືຫຼາຍຝ່າຍ, ການຈັດກອງປະຊຸມສຳມະນາ ວ່າດ້ວຍເສດຖະກິດສີຟ້າ, ການທົບທວນການຈັດຕັ້ງປະຕິບັດກົດບັດອາຊຽນ ແລະ ອື່ນໆ. ນອກຈາກນີ້, ກໍໄດ້ຮັບຟັງການລາຍງານ ກ່ຽວກັບການຮ່ວມມື ກັບແຕ່ລະຄູ່ເຈລະຈາອາຊຽນ, ການພິຈາລະນາຂໍ້ສະເໜີ ໃນການສະເໜີເຂົ້າເປັນຄູ່ຮ່ວມຂະແໜງການຂອງອາຊຽນ ແລະ ການສະເໜີເຂົ້າເປັນຄູ່ຮ່ວມເຈລະຈາອາຊຽນຈາກປະເທດຕ່າງໆ.

ພາຍຫຼັງກອງປະຊຸມເຈົ້າໜ້າທີ່ອາວຸໂສອາຊຽນ ສຳເລັດລົງ, ທ່ານ ຮອງ​ລັດຖະມົນຕີ ທອງ​ຜ່ານ ສະຫວັນ​ເພັດ, ພ້ອມ​​ດ້ວຍຄະນະ ​ໄດ້​ສືບ​ຕໍ່ເຂົ້າ​ຮ່ວມກອງ​ປະຊຸມຄະ​ນະ​ກຳມະການ ເຂດປອດອາວຸດນິວເຄຼຍ ໃນອາຊີຕາເວັນອອກສ່ຽງໃຕ້ (SEANWFZ ExCo). ກອງປະຊຸມ ໄດ້​ຮັບ​ຊາບຄວາມ​ຄືບໜ້າ​ການຈັດ​ຕັ້ງ​ປະຕິບັດ ແຜນ​​ປະຕິບັດງານຂອງ​ສົນທິ​ສັນຍາ ວ່າດ້ວຍ ເຂດປອດອາວຸດນິວເຄຼຍ ອາຊີຕາເວັນອອກສ່ຽງໃຕ້ ສະບັບປີ 2018-2022. ກອງປະຊຸມຄັ້ງນີ້, ຍັງໄດ້ປຶກສາຫາລື ກ່ຽວກັບ ການກະກຽມ ໃຫ້ແກ່ກອງປະຊຸມຄະນະກຳມະທິການ ວ່າດ້ວຍ ເຂດປອດອາວຸດນິວເຄຼຍ​ໃນອາຊີຕາເວັນອອກສ່ຽງໃຕ້ ລະດັບລັດຖະມົນຕີ (SEANWFZCommissionMeeting) ​ທີ່ຈະ​ຈັດ​ຂຶ້ນໃນ​ເດືອນ ສິງຫາ 2021.