ໃນຕອນເຊົ້າຂອງວັນທີ 28 ພະຈິກ 2024, ທີ່ ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ດຣ. ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ (Dr. Bader Abdulla Saeed bin Saayed Almatrooshi), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະນະຄອນ ເອເມຣັດ ອາຣັບ ປະຈຳ ສປປ ລາວ, (ສໍານັກງານການທູດຕັ້ງຢູ່ ນະຄອນຫຼວງ ຮ່າໂນ້ຍ, ສສ. ຫວຽດນາມ), ເນື່ອງໃນໂອກາດທີ່ທ່ານມາເຂົ້າຮ່ວມພິທີສະເຫຼີມສະຫຼອງວັນຊາດ ແຫ່ງ ສປປ ລາວ ຄົບຮອບ 49 ປີ.

ໃນໂອກາດນີ້, ທ່ານລັດຖະມົນຕີ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ທ່ານເອກອັກຄະລັດຖະທູດ ດຣ. ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ ພ້ອມດ້ວຍຄະນະ, ພ້ອມທັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສະຫະນະຄອນ ເອເມຣັດ ອາຣັບ ພາຍຫຼັງທີ່ໄດ້ສ້າງຕັ້ງສາຍພົວພັນການທູດນຳກັນໃນວັນທີ 15 ຕຸລາ 1996 (ຄົບຮອບ 28 ປີ) ສືບຕໍ່ໄດ້ຮັບການພັດທະນາຂຶ້ນຢ່າງຕໍ່ເນື່ອງ, ສອງຝ່າຍ ມີຄວາມເພິ່ງພໍໃຈຕໍ່ການພົວພັນຮ່ວມມືສອງຝ່າຍ ແລະ ໃຫ້ການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນສອງປະເທດ ເປັນແຕ່ລະໄລຍະ, ລວມທັງໄດ້ມີການແລກປ່ຽນບັນດາສານສະແດງຄວາມຊົມເຊີຍໃນໂອກາດສຳຄັນຕ່າງໆຂອງຜູ້ນຳສອງປະເທດ ຢ່າງເປັນປົກກະຕິ. ພ້ອມນີ້, ທ່ານລັດຖະມົນຕີ ກໍ່ໄດ້ສະເໜີໃຫ້ທ່ານທູດ ສືບຕໍ່ຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືທີ່ສອງຝ່າຍໄດ້ລົງນາມກັນແລ້ວນັ້ນ ໃຫ້ມີປະສິດທິພາບ ແລະ ປະສິດທິຜົນສູງສຸດ, ຢືນຢັນຄືນຄວາມຫມາຍຫມັ້ນຂອງລັດຖະບານລາວ ຍິນດີສືບຕໍ່ເຮັດວຽກຢ່າງໃກ້ຊິດກັບຝ່າຍ ສະຫະນະຄອນ ເອເມຣັດ ອາຣັບ ເພື່ອຊຸກຍູ້ການຮ່ວມມືໃນຂະແໜງການຕ່າງໆທີ່ມີທ່າແຮງຮ່ວມກັນ ເປັນຕົ້ນແມ່ນຂົງເຂດ ເສດຖະກິດ-ການຄ້າ, ການລົງທຶນ, ບໍ່ແຮ່, ພະລັງງານສະອາດ, ກະສິກຳ, ແຮງງານ, ການໂຮງແຮມ, ການທ່ອງທ່ຽວ ແລະ ການສຶກສາ. ພ້ອມນັ້ນ, ກໍ່ໄດ້ສະເໜີໃຫ້ ທ່ານທູດ ສືບຕໍ່ຊຸກຍູ້ບັນດານັກທຸລະກິດ-ນັກລົງທຶນ ແລະ ນັກທ່ອງທ່ຽວ ຈາກ ສະຫະນະຄອນ ເອເມຣັດ ອາຣັບ ເຂົ້າມາ ສປປ ລາວ ຫຼາຍຂຶ້ນ ໂດຍສະເພາະ ໃນປີ 2024 ນີ້ ສປປ ລາວ ແມ່ນຫາກໍ່ສໍາເລັດການຈັດກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມສຸດຍອດກ່ຽວຂ້ອງ, ແລະ ປີນີ້ ກໍ່ເປັນປີທ່ອງທ່ຽວລາວ 2024.

ໃນຂະນະດຽວກັນ, ທ່ານທູດ ດຣ. ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ ກໍ່ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍຕໍ່ ທ່ານ ທອງສະຫວັນ ພົມວິຫານ ໃນໂອກາດທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃຫມ່, ຊົມເຊີຍຜົນສໍາເລັດການເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 44-45,  ທ່ານຈະຊຸກຍູ້ສົ່ງເສີມໃຫ້ນັກທຸລະກິດຢູ່ປະເທດມາລົງທຶນຢູ່ລາວຫຼາຍຂຶ້ນ, ໃນຫຼາກຫຼາຍຂະແໜງການ, ໃນຂົງເຂດທ່າບົກ, ໂລຈິດສະຕິກ, ການຂົນສົ່ງ, ພະລັງງານສີຂຽວ ແລະ ການທ່ອງທ່ຽວ ຂອງ ສປປ ລາວ ທີ່ມີທ່າແຮງ ເພື່ອໃຫ້ປະຊາຊົນໄປມາຫາສູ່ກັນ ອາດສຶກສາການເປີດຖ້ຽວບິນໂດຍກົງ, ການເພີ່ມໄລຍະເວລາການຍົກເວັ້ນວີຊານັກທ່ອງທ່ຽວ ແລະ ອື່ນໆ, ທັງນີ້ ກໍ່ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງປະເທດ, ສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອຈາກລັດຖະບານ ແຫ່ງ ສປປ ລາວ ໃນໄລຍະຜ່ານມາ, ໂດຍສະເພາະ ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ກໍຄື ສປຊ.